دوم تسالونیکیان 2 - Gilaki New Testament

مسیح وأگردٚستن

¹ هسأ، اَی جأنٚ دیلٚ ایمأندأرأن، وئألید موضویأنی‌یَ دروأره‌یٚ اَمی خوداوند، عیسایٚ مسیح وأگردٚستن و اَمی چوطویی جمَ بوستن اونی ورجأ، شِمِره وأشکأفأنیم: خأهیش کونیم

² ولأنید اوشأنی وأسی کی گده خوداوندٚ روج، جٚه اَسه شورو بوبوسته، شیمی فیکرأن، رأحت سوست و پریشأنَ بد. اوشأنی گبأنَ بأوٚر نوکونید، حتّا اگه ایدعأ بٚدأرٚد کی نوبوّت یا کی ایلهأمی دأرٚده یا ایتأ نأمه جَا کی وأنمود کونٚده اَمی جَا ایسه ایتکأ بوکونٚد.

³ ولأنید هیذره هیکس شٚمٚره گول بٚزٚنه، چونکی او روج نأیِه، مگه اَنکی اوّل خودا ضد ایتأ بدگومأنی و شورش ویریزه و او مردأی کی خودا قأنونأنَ خو پأ جیر لقد دٚمٚج کونِه ظأهیرَ بٚه، هو آدمی کی جهندمٚ هلاکتٚ جَا محکوم ایسه.

⁴ اون هرچی اَمرأ کی خودا دؤخأده بٚبه و عیبأدت وأسی ایستفأده بٚبه موخألفت کونِه. حتّا شِه معبدٚ دورونی و اویَه نیشینه و ایدعأ کونِه کی خودایه.

⁵ آیا جٚه‌ خأطر ببردید او وختی کی شیمی ورجأ ایسأبوم، اَنَ گفتیم؟

⁶ خودتأن دأنیدی کی چی اونی اَمؤنٚ رِه مأنع ایسه، چونکی اون فقد تأنه او وختأنی آشیکأرَ بٚه کی اونی وخت فأرٚسِه بی.

⁷ او کوفر اَسأیٚم قأیم قأیٚمٚکی عمل کودأندٚره و هطویم جیگأ بوخورده ایسِه کی اونی کی اونٚ مأنع ایسه جٚه رأ بٚدٚرَ شِه.

⁸ بأزون او شرورٚ مٚردأی ظأهیرَ بِه. امّا او وختی کی اَمی خوداوند عیسا وأگردٚه، خو دٚهٚن نَفسٚ اَمرأ اونَ هلأکٚ کونِه و خو حوضورٚ اَمرأ اونَ جٚه بین بٚره.

⁹ اَ شرورٚ مردأی، شیطانٚ قودرتٚ اَمرأ ظأهیرَ بِه و اونی دٚس دستمال بِه؛ اون خو عجأیبٚ غرأیبٚ کأرأنٚ وأسی همٚتأنَ گول زٚنِه، پیله‌دأنه موجیزه‌یأن انجأم دِهه.

¹⁰ او آدمأنی کی اونی جَا گول خورٚده، هو آدمأنی ایسٚد کی رأستٚ رأیَ قوبیل نوکودٚده و جهندم رأیَ پیش بیگیفتٚده. اَشأن حِئقتَ دوس نأرٚده و اونَ قوبیل نوکونٚده کی نیجأت بیأفٚد.

¹¹ جٚه اَ خأطر خودا وئأله کی گول بوخورٚد، اَویرَ بد و اَ دورُغأنَ قوبیل بوکوند.

¹² آخرپٚسی، تومأمٚ اوشأنی کی دورُغَ قوبیل کونٚده و دوروستی‌یَ قوبیل نأرٚده و شرورٚ کأرأنٚ وأسی خوشألَ بٚده، رأس‌رأسِی محکوم بٚده.

ایمأندأرأن، وأستی قأیم بئیسٚد

¹³ اَی برأرأن و خودا جأنٚ دیلأن، اَمأن وأستی همیشٚک خودایَ شیمی وأسی شوکر بوکونیم، چونکی خودا جٚه هو اوّل شٚمٚره اینتخأب بوکوده کی نیجأت بٚبخشه و خو پأکٚ روحٚ قودرتٚ اَمرأ و شیمی ایمأنٚ وأسی شٚمٚره رأس‌رأسِی پأکَ کونٚه.

¹⁴ جٚه اَ خأطر، اون اَمی اَمرأ او نیجأتٚ خوروم خٚوٚرَ شٚمٚره برسأنه، شٚمٚره دعوت بوکوده کی اَمی خوداوند، عیسایٚ مسیحٚ جلالٚ میأن شیریک بیبید.

¹⁵ پس اَی جأنٚ دیلٚ برأرأن و خأخورأن، هسأ کی اَ مأجرأیأنَ فأندرستید قأیم بئیسید و او حِئقتأنَ کی شیمی ورجأ ایسأبیم یا نأمه‌یأنٚ اَمرأ شٚمٚره بأمؤختیم، سفت دوچوکید.

¹⁶ اَمی خوداوند عیسایٚ مسیح خودش و اَمی پئر خودا، خو لوطف اَمرأ کی تومأنٚ نیبه، اَمٚرَه محبت بوکود و ایتأ اَبدی اومید و آرأمٚش بٚبخشه،

¹⁷ شیمی دیلأنَ آرأمٚش بٚبخشه و شٚمٚره ایتأ نیرو بٚبخشه کی همیشٚک شیمی کردکأرأن و گبأن خُب بٚبه.