دوم یوحنا 1 - Gilaki New Testament

¹ جٚه کیلیسا شیخ، او بأنو رِه کی اینتخأب بوبوسته و اونی زأکأن کی رأس‌رأسِی اوشأنَ دوس دأرم و من فقد نییٚم، بلکی همٚتأنی کی دوروستی‌یَ بشنأختٚده.

² اَ محبت او دوروستی وأسی ایسه کی اَمی دورون نٚهأ و تأ اَبد اَمی میأن مأنِه.

³ چونکی اَمأن اونَ رأس‌رأسِی ایمأن دأریم و کس‌کسَ رأس‌رأسِی محبت کونیم، فیض و بخشش و آرأمی جٚه خودا ور کی پئر ایسه و عیسا مسیح کی اونی پٚسر ایسه اَمی اَمرأ ایسه.

ایطأعت کودن حِئقتٚ جَا

⁴ چندر خوشألم فأندرستٚم بعضی جٚه تی زأکأن اَیَه ایسأده کی حِئقتٚ جَا ایطأعت کونٚده و اَمی پئر خودا حوکمأنَ حیفظ کونٚد.

⁵ بأنوی عزیز، جٚه اَ خأطر اَ نأمه‌یَ شِمِره بینیویشتم کی شیمی خأطر بأوٚرٚم او قدیمی حوکمَ کی خودا جٚه اوّل اَمٚرَه فأدأ و او حوکم اَنه کی کس‌کسَ محبت بوکونیم.

⁶ اگه خودایَ دوس دأریم، وأستی اونَ حوکمٚ ایطأعت بوکونیم و اونی حوکم جٚه اوّل اَن بو کی کس‌کسَ محبت بوکونیم.

⁷ اَ گبأنَ زنٚم چونکی اَ دونیأ دورون معلمأنٚ زیأدی ایسأده کی دورُغ گده. اَشأن قوبیل نأرٚده کی عیسایٚ مسیح ایتأ اینسأنَ مأنستَن و ایتأ بٚدٚن اَمی بدنٚ مأنستَن اَ دونیأیَ بأمؤ. اَجور آدمأن دورُغگو و مسیح ضد ایسٚد.

⁸ پس، اوشأنی جَا دوری بوکونید کی اوشأنٚ مأنستَن نیبید تأ او خوروم پأدأشَ کی آسمأنٚ جَا شٚمٚره فأدأ بوبوسته جٚه دٚس ندید کی همه‌یٚ اَمأن اونی بٚدٚس اَوٚردٚنٚ وأسی حقٚ سعی بٚزِییم. پس حقٚ سعی بٚزنید کی خودا جَا خودتأنٚ خوروم پأدأشَ تومأم و کمأل فأگیرید.

⁹ چونکی اگه مسیحٚ آموجه‌یأنٚ جَا دورَ بید، خودا جأیٚم دورَ بیدی. امّا اگه مسیح آموجه‌یأنَ وفادأر بئیسید، خودایٚم دأریدی. به اَ شیکل هم "پئرَ" دأرید و هم "پٚسرَ".

¹⁰ اگه اینفر شیمی ورجأ بأیِه و اَ آموجَ شِمِره نأوٚره، اونٚ شیمی خأنه دورون رأ ندید و حتّا اونٚ سلأمٚم نوکونید،

¹¹ چونکی اگه اوشأنٚ اَمرأ شؤئؤن و اَمؤن بوکونید، اوشأنٚ مأنستَن بیدی.

ختمٚ کلام

¹² خٚیلی گبأن دأرم کی بٚزٚنم، امّا نخأیٚم همه‌یٚ اَ نأمه دورونی شٚمٚره بینیویسٚم، چونکی اومید دأرم کی خٚیلی زود شیمی ورجأ بأیٚم و شٚمٚره بیدینٚم. بأزون تأنیم رو در رو کس‌کسٚ اَمرأ گب بٚزنیم و اَمی خوشألی کأمیلَ بٚه.

¹³ تی اینتخأب بوبوسته خأخور زأکأن، سلأم رٚسأنده.