دوم قرنتیان 9 - Gilaki New Testament

اورشلیمٚ ایمأندأرأنَ کومک کودن

¹ البت گومأن نوکونم خأطر اَوٚردٚن اَ موضو ینی ایمأندأرأنَ کومک کودن لأزیم بٚبه.

² چونکی دأنٚم کی شومأن خودتأن چی شوق و ذوقی کومک رسأنئنٚ رِه دأریدی. من گولأزٚ اَمرأ، او ایمأندأرأن کی مقدونیه شین ایسٚدَ بوگفتم کی شومأن اَخائیه شهرأنٚ دورون جٚه پأرسأل کومکٚ رِه حأضیر بید. رأس‌رأسِی، شیمی هه شوق و ذوق بو کی خٚیلی جٚه اَشأنَ تِشویق بوکوده کی کومک بوکونٚد.

³ ولی چونکی اوشأنَ بوگفتم کی شیمی پیشکشأن حأضیر ایسه، اَسه اَ برأرأنَ اوسه کونم کی جٚه اَ موضو ایطمینأن بیأفٚم، اَطو نٚبه کی او وٚصفأن کی جٚه شومأن بوگفتیم، دوروست نٚبه.

⁴ چونکی اگه بعضی جٚه مقدونیه ایمأندأرأن می اَمرأ بأیٚد و بیدینٚد کی جٚه او همه وٚصفٚ پٚسی، هنو شیمی پیشکشأن حأضیر نییٚه، او وخت هم اَمأن شرم کونیمی، هم شومأن!

⁵ پس لأزیم بدأنستم کی جٚه اَ برأرأن خأهیش بوکونم کی می جَا پیشتر بأیٚد و او پیشکشأن کی وعده بٚدأ بید، حأضیرَ کونٚد. اَطویی، او وختی کی من اَیٚم، شیمی کومکأن آمأده ایسه، و اَن نیشأن دِهه کی شٚمٚره زور نوکودد، بلکی شیمی میلٚ اَمرأ پیشکش فأدأیید.

⁶ جٚه خأطر ندید کی هر کس کم بکأره، کمم اوچینه؛ و اونی کی خٚیلی بکأره، خٚیلی اوچینه.

⁷ هیکسَ وأدأر نوکونید کی ویشتر جٚه اونچی کی خو دیلٚ دورون دأره، فأدٚه بلکی بنید اَندر کی میل دأره، فأدٚه چونکی خودا اونَ دوس دأره کی خوشألی اَمرأ پیشکش فأدِه.

⁸ ولی خودا قأدیر ایسه هرتأ برکتَ ویشتر جٚه شیمی ایحتیأج، شٚمٚره عطأ بوکونه، تأ اَطو نٚبه کی فقد شیمی ایحتیأجأن موهیأ بٚبه، بلکی جٚه اونی ایضأفه بتأنید خورومٚ خیدمتأن و البأقیأنٚ کومکٚ رِه ایستفأده بوکونید.

⁹ اوطو کی بینیویشته بوبوسته: «اون دٚسٚ دیلوأزی اَمرأ اوشأنی کی ایحتیأج دأرده‌یَ کومک کونه و اونی محبت و خورومٚ کأرأن همیشٚک اونی رِه گولأز ایسه.»

¹⁰ ولی خودا کی کیشأورزٚ رِه دأنه آمأده کونه کی بکأره و اوچینه و بوخوره، شٚمٚره‌یٚم دأنه فرأوأن عطأ کونه کی بٚکأرید، و شیمی مأصولَ برکت فأدِه کی بتأنید، جٚه اون البأقیأنٚ کومکٚ رِه اَندر کی بِه ویشتر، ایستفأده بوکونید.

¹¹ هطویه، خودا خٚیلی زیأد شٚمٚره عطأ کونه کی شومأنم دٚس و دیلوأزی اَمرأ کس‌کسَ کومک بوکونید. و او وخت کی شیمی پیشکشأنَ اوشأنی کی ایحتیأج دأرده‌یَ فأرٚسأنیم، شیمی خورومٚ کأرأنٚ وأسی خودایَ شوکر کونٚده.

¹² هنٚ وأسی، جٚه شیمی پیشکشأن دونه خورومٚ آخرپٚسی بٚدٚس اَیِه: ایتأ اَنکی ایمأندأرأنٚ ایحتیأجأن رفع بِه، اویتأ اَنکی بأعیث بِه کی اونی وأسی خودایَ شوکر بوکوند.

¹³ اوشأنی کی، اوشأنَ کومک کونیدی، فقد او پیشکشأنٚ کی دٚس و دیلوأزی اَمرأ اوشأنَ و همٚتأنَ فأدیدی رِه خوشأل نٚبٚده بلکی خودایٚم شوکر گده، چونکی اَ کأر ثأبیت کونه کی شومأن جٚه مسیح اینجیل ایطأعت کونیدی.

¹⁴ اَشأن خودا تومأمٚ نوبوستٚنی و عجیبٚ فیضٚ وأسی کی شیمی میأن نیشأن بٚدأ بوبوسته، جولفٚ محبت و شوق و ذوقٚ اَمرأ شِمِره دوعأ کونٚده.

¹⁵ خودایَ شوکر اونی پیشکش، عیسا مسیح وأسی، ایتأ خوروم پیشکش کی کلمه‌یأنٚ اَمرأ نشأ وٚصف کودن!