دوم قرنتیان 8 - Gilaki New Testament

مقدونیه کیلیسایأنٚ دٚسٚ دیلوأزی

¹ هسأ اَی ایمأندأرأن، خأیم شٚمٚره وأخبدأرَ کونم کی او فیض و لوطف کی خودا مقدونیه کیلیسایأنَ عطأ بوکوده، چی خورومٚ مِیوه‌یأنی بٚبأر بأوٚرده.

² مقدونیه ایمأندأرأن هرچن ایمتحأنأنٚ میأن خٚیلی رنج بٚکشِئد، ولی همیشٚک خوشألٚد؛ و هرچن خٚیلی فِقِرٚده، ولی خٚیلی دٚسٚ دیلوأز ایسٚد.

³ چونکی من شأهید ایسٚم کی اَشأن نه فقد خوشأنٚ دٚس رسٚ اَندر، بلکی ویشتر جٚه اونم کومک بوکودٚد. اوشأن میل و تومأمٚ رضأیتٚ اَمرأ،

⁴ جٚه اَمأن بٚخأستٚد کی اوشأنٚ مألی کومکأنَ بٚبرم اورشلیمٚ مسیحیأنٚ رِه کی ایمأندأرأنَ کومک کودنٚ خوشألی دورون شیریک بٚبٚد.

⁵ او کأر کی اوشأن بوکودٚد، ویشتر جٚه اون بو کی اَمأن اونی رأفأ ایسأبیم. اَشأن اوّل قول بٚدأد کی خوداوندٚ ایرأده‌یَ بجأ بأوٚرٚد، و بأزون وأگویا بوکودٚد کی حأضیر ایسٚد هرتأ خیدمت کی جٚه اوشأن بخأییم انجأم بٚدٚد.

⁶ هنٚ وأسی جٚه تیتوس خأهیش بوکودیم کی ایوأردِه شیمی دِئنٚ رِه بأیٚه کی شٚمٚره تِشویق بوکونه کی شومأنم ایتأ سأم اَ خورومٚ خیدمتٚ دورون قوبیل بوکونید، چونکی اون پیشتر اَ کأرَ شیمی میأن بٚسٚرَ گیفته بو.

⁷ شومأن ویشتر موضویأنٚ میأن جٚه البأقی آدمأن پیشترید: شیمی ایمأن ویشتر ایسه، ویشتر سوخنرأن دأرید، شیمی دأنش جولفتر ایسه، شیمی شوق و ذوق خیدمتٚ رِه ویشتر ایسه و اَمٚرَه‌یٚم خٚیلی محبت دأرید. پس خأیم اَ خورومٚ خیدمتٚ دورون ینی پیشکش فأدأنم، جٚه البأقیأن پیشتر بیبید.

⁸ اَن ایتأ فرمأن نییٚه و نگم کی حتم اَ کأرَ بوکونید. بلکی البأقی کیلیسایأن ذوق و شوقَ مثأل اَوٚرم، کی شومأنم بتأنید نیشأن بدید شیمی محبت رأس‌رأسِی ایسه و فقد گب نییٚه.

⁹ چونکی شومأن جٚه اَمی خوداوند عیسا مسیح فیض، خٚوٚر دأریدی کی هرچن خو آسمأنی موقأمٚ دورون پورقوّت بو، بأمؤ اَ دونیأ کی شٚمٚره کومک بوکونه و فِقِر بوبوسته، کی خو فقرٚ اَمرأ شٚمٚره فرأوأنی بٚده.

¹⁰ پس هسأ می فیکر اَن ایسه: او کأرَ کی پأرسأل سٚر بیگیفتید، اَسه تومأنَ کونید. چونکی شومأن فقد او اوّلی آدمأنی نیبید کی البأقیأنٚ کومکٚ موضو‌یَ پیش فأکشِئید، بلکی پأ پیش بنأیید و اونم عملی‌ بوکودید.

¹¹ پس هو شور و شوقٚ اَمرأ کی اَ خیدمتَ سٚر بیگیفتید، اونَ تومأنَ کونید، و جٚه اونچی دأرید تأ اویَه کی تأنیدی کومک بوکونید. او کأر کی جٚه اوّل شوق و ذوقٚ فرأوأنٚ اَمرأ پیشنهأد بوکودید، اَسه بعمل بأوٚرید

¹² کومک چندر بٚبه موهیم نییٚه، بلکی خودا رِه اَ موضو سٚر شیمی دوس دأشتٚن و توجه موهیم ایسه. اَنٚم بٚگم کی، اون رأفأ نئیسأ کی شومأن ویشتر جٚه شیمی توأن پیشکش فأدید، بلکی اَندر کی تأنیدی.

¹³ البت می منظور اَن نییٚه کی البأقیأن شیمی غورصه و رنجٚ اَمرأ رفأه میأن بئیسٚد!

¹⁴ بلکی ایجور کس‌کسَ کومک بوکونید کی همه ای میقدأر و ایجور بٚدأرید. هسأ شومأن ایضأفه دأریدی؛ هنٚ وأسی تأنیدی اَشأنَ کومک بوکونید. دونبألترم اگه شومأن ایحتیأج بٚدأرید، اوشأن شیمی نیأزَ رفع و روجو کونٚده. اَطویی هرتأن خو ایحتیأجٚ اَندر دأره.

¹⁵ اَ بینیویشته‌یَ خأطر بأوٚرید کی فٚرمأیه: «اوشأنی کی خٚیلی جم بوکوده بود هیچی ایضأفه نأشتٚد و اوشأنی کی ایپچه جمَ کوده بود هیچی کم نأشتٚد.» پس شومأنم وأستی البأقیأنٚ ایحتیأجأنٚ شیریک بیبید.

تیتوس شِه قرنتیانٚ ورجأ

¹⁶ خودایَ شوکر کی اون تیتوسٚ دیلٚ دورون هو دوس دأشتٚنَ بوجود بأوٚرده کی اَمأن شٚمٚره دأریم.

¹⁷ وختی جٚه اون خأهیش بوکودم کی بأیٚه شیمی ورجأ، خوشألی اَمرأ قوبیل بوکوده. رأس‌رأسِی اون اَندر شیمی دِئن رِه شوق و ذوق دأشتی کی خؤرَه جٚه پیشتر تصمیم دأشتی بأیٚه.

¹⁸ تیتوسٚ اَمرأ، ایتأ دِه برأرم اوسه کونم کی اونی خیدمتأنٚ وأسی اینجیلٚ رِه، همٚتأ کیلیسایأن اونَ شنأسٚده و اونٚ رِه ایحترأم نٚهٚده.

¹⁹ کیلیسایأن فقد اونَ ایحترأم نٚنده، بلکی اونَ اَمی همسفر بٚنأده کی کس‌کسٚ اَمرأ، اَ پیشکشیأنَ بٚبرم اورشلیم. اَ خیدمت خوداوندٚ جلالٚ بأعیث بِه و هطویم اَمی علأقه‌یَ کومک کودن اوشأنَ رِه کی ایحتیأج دأرده‌یَ نیشأن دِهه.

²⁰ اَنٚم بٚگم کی وختی کس‌کسٚ اَمرأ سٚفر بوکونیم، دِه هیکس اَمٚرَه شک نأرِه، چونکی ایحتیأط کونیمی نوکونه اینفر دروأره‌یٚ اَنکی اَ پیشکشأن کی دٚسٚ دیلوأزی اَمرأ فأدأ بوبوسته، چوطو ایستفأده و جمَ بِه، جٚه اَمأن ایرأد بیگیره.

²¹ اَمأن ایحتیأط کونیمی کی خوداوندٚ حوضورٚ میأن اونچی کی دوروست ایسه انجأم بٚدیم، هطویم خأییمی البأقیأنم اَنَ بدأنٚد. هنٚ وأسی ایسه کی اَجور دیچِئیم.

²² ایتأ دِه برأرم شیمی ورجأ اوسه کونم کی همیشٚک اونی حقٚ سعی و دوروست بؤئؤنَ خیدمتأن و جوروأجورٚ کأرأنٚ دورون بیدِییم. هسأ کی اونَ بوگفتم شومأن چندر مردومٚ کومکٚ رِه علأقه و میل دأریدی، اونی شوق و ذوق شیمی ورجأ اَمؤنٚ رِه ویشتر بوبوسته.

²³ ولی اگه اینفر وأوٚرسِه کی تیتوس کیسه، بیگید کی اون می همکأر ایسه و شیمی کومکٚ رِه بأمؤ. دروأره‌یٚ او دوتأ برأرم تأنید بیگید کی اَ سأمأنٚ کیلیسایأن نمأینده‌یأن ایسٚد و همیشٚک مسیح نأمٚ رِه گولأز کودنٚ بأعیث بود.

²⁴ پس خأهیش کونم او محبتَ کی مِرِه دأریدی، اَشأنٚم نیشأن بدید و جٚه اوشأن مهرٚوأنی اَمرأ پذیرأیی بوکونید کی همٚتأ کیلیسایأن بدأنٚد کی شٚمٚره بودونٚ عیلّت گولأز نوکودیم.