دوم قرنتیان 6 - Gilaki New Testament

¹ اَنٚ وأسی، اَمأن خودا همکأرأن جٚه شومأن خأییم کی جٚه خودا فیض غأفیلَ نیبید.

² چونکی خودا فٚرمأیه: «تی ایجگره‌یَ مونأسبٚ وختٚ دورون بشتأوستم. نیجأتٚ روج میأن، تی کومک رِه بودووٚستم.» اَسه هو «مونأسبٚ وخت» ایسه. ایمرو هو «نیجأتٚ روج» ایسه.

پولسٚ موشکلأن

³ اَمأن ایجور زٚندیگی و کردکأر کونیمی کی هیکسٚ لغزشٚ بأعیث نیبیم، کی اَمی خیدمت ملأمت نٚبه.

⁴ رأس‌رأسِی اَمی حقٚ سعی اَن ایسه کی هرتأ کأرٚ دورون ثأبیت بوکونیم کی خودا رأس‌رأسِی خیدمتگوزأرأن ایسیم. هرجور رنج و سختی و زحمتَ تحمول بوکودیم؛

⁵ شلأق بوخوردیم؛ زندأن دٚکفتیم؛ مردوم اَمٚرَه، غیظ اَمرأ فوتورکستٚد؛ ویشتر جٚه اَنکی جأن بٚدأریم کأر بوکودیم؛ بی‌خوأبی و ویشتأیی بٚکشِییم.

⁶ اَمی خورومٚ زٚندیگی اَمرأ، روحأنی فیکرأنٚ اَمرأ، صبرٚ اَمرأ، مهرٚوأنی اَمرأ، روح‌القدسٚ حوضورٚ اَمرأ اَمی میأن، و اَمی بی‌ریأ محبت اَمرأ همٚتأنَ ثأبیت بوکودیم کی اَمی ایدعأیأن بجأ ایسه.

⁷ ای‌رٚوٚند حِئقتَ بوگفتیم؛ خودا هرتأ کأرٚ میأن اَمٚرَه کومک بوکوده؛ روحأنی اسلحه‌یأنٚ اَمرأ اَمی رأستٚ دٚسٚ میأن حمله رِه و اَمی چپٚ دٚسٚ میأن دفأع رِه، بجنگستیم.

⁸ چی اَمٚرَه ایحترأم بٚنٚد و چی ایحترأم نٚنٚد، چی اَمی وٚصفَ بٚگد و چی ایرأد بیگیرٚد، همیشٚک خوداوندٚ رِه وفادأر مأنیمی. مردوم اَمٚرَه دورُغگو دأنٚده، هسأ اَنکی جغرز حِئقت گب نزنیمی.

⁹ بعضی وختأن گومنأم و بیخودٚ آدمأنٚ مأنستَن بیدِه بیمی، ولی خٚیلیأن اَمٚرَه شنأسٚده. همیشٚک مٚردنٚ پأترس اَمِرِه نٚهأ، ولی هنو زٚنده‌ییم و خودایَ خیدمت کونیمی. اَمی جأن زخمَ بوسته ولی جٚه پأ دنکفتیم.

¹⁰ دیل بٚشکفته‌ ایسیم، ولی هطویم جٚه خوداوندٚ خوشألی پور ایسیم. فِقِریم، ولی خٚیلیأنَ روحأنی گنجأنٚ اَمرأ ثروتمند چأکونیمی. هیچی صأب نیئیم، ولی همٚچی دأریم.

¹¹ اَی جأنٚ دیلٚ ریفِقأن کی قرنتسٚ میأن ایسأیید، شیمی اَمرأ صأفٚ صأدٚق گب بٚزِییم و اَمی دیلَ شِمِره وأکودیم.

¹² ولی اگه هنو اَمی میأن سردی نٚهأ، اَمی بی‌محبتی وأسی نییٚه، بلکی جٚه کمی شیمی محبت ایسه.

¹³ شیمی اَمرأ اَمی زأکأنٚ مأنستَن گب زنٚم. شیمی دیلَ اَمی محبتٚ رِه، وأکونید و شومأنم شیمی محبتَ اَمٚرَه نیشأن بدید.

ایمأندأر و بی‌ایمأنٚ شؤئؤن اَمؤن

¹⁴ بی‌ایمأنٚ اَمرأ بٚدأ بستأن ندأرید و دونچکید. مگه بِه کی پأکی و گونأ میأن دوچوکستن بمأنه؟ مگه نور و ظولومأت کس‌کسٚ اَمرأ ایرتبأط دأرٚد؟

¹⁵ یا مسیح و شیطان میأن سأزش نٚهأ؟ مگه ایتأ ایمأندأر و بی‌ایمأنٚ میأن شٚبأهت نٚهأ؟

¹⁶ یا خودا معبدَ شأ بُتخأنه اَمرأ ایتأ بدأنیم؟ چونکی شومأن زٚنده معبد ایسید و خودا شیمی میأن جأجیگأ دأره! هطو کی اون بٚفرمأسته: «من در اَشأن ایسأم و اَشأنٚ میأن زٚندیگی کونم، و من اوشأنٚ خودا بٚم و اَشأن می قوم.»

¹⁷ هنٚ وأسی ایسه کی خودا فٚرمأیه: «جٚه گونأکأرأنٚ میأن بیشید بیرون! شٚمٚره جٚه اَشأنٚ میأن سیوأ وأکونید! نجستٚ چیأنَ دٚس نزنید کی شٚمٚره قوبیل بوکونم.

¹⁸ او وخت من شیمی پئر بٚم و شومأن می پٚسرأن و دوخترأن! اَن ایسه خوداوندٚ قأدیر و موطلقَ فرمأیش!»