دوم قرنتیان 5 - Gilaki New Testament

اَمِرِه، مٚردن ینی خودا اَمرأ ایسأن

¹ چونکی دأنیمی وختی اَ زیمینی خیمه کی اَسه اونی دورون زٚندیگی کودأندریم فوگورده، ینی وختی بیمیریم و اَ خأکی جأنأنَ بٚنیم و بیشیم، آسمأنٚ دورون خأنه‌یأن ینی اَبدی جأنأنی دأریم کی اَمِرِه خودا دٚسٚ اَمرأ چأکوده بوبوسته، نه اینسأنٚ دٚسٚ اَمرأ.

² هسأ کی اَ جأنٚ دورون زٚندیگی کونیمی، چندر زلّه و دؤرسفته بیمی. هنٚ وأسی شوقٚ اَمرأ او روجٚ رأفأ ایسأییم کی اَمی آسمأنی جأنَ ایتأ تأزه رختٚ مأنستَن دوکونیم.

³ یقین او وخت بودونٚ جأنٚ روحأن نیبیمی.

⁴ اَمأن اَ خأکی جأنٚ اَمرأ، فیشأرٚ جیر ایسأییم و آه و نٚأره کونیمی؛ ولی هطویم نخأییمی بیمیریم و جٚه اَ جأن خلأصَ بیم، بلکی خأییم هطو کی ایسیم اَمی آسمأنی جأنَ دوکونیم کی اَ جٚه بین شؤئؤنی جأنأن او اَبدی زٚندیگی دورون غرقَ بٚه.

⁵ اونچی کی خودا اَمِرِه فرأهم بیدِه اَن ایسه؛ و اَنی وأسی کی ایطمینأن بٚدأریم همٚتأ اَ برکتأنَ اَمی سأم کونه، روح‌القدسَ اَمٚرَه بیعأنه فأدأ.

⁶ هنٚ وأسی، ای‌رٚوٚند دیلگرم ایسیم، و دأنیمی تأ وختی کی اَ خأکی جأنٚ دورون ایسأییم، اَبدی خأنه میأن خوداوند اَمرأ زٚندیگی نوکونیمی.

⁷ اَمأن اَ کأرأنَ نه دِئنٚ اَمرأ بلکی ایمأنٚ اَمرأ بأوٚر کونیمی.

⁸ هنٚ وأسی، جٚه مٚردن ترس نأریم، بلکی اونی پیشأشو شیم، چونکی دأنیمی مٚردنٚ پٚسی خوداوندٚ ورجأ شیمی، و اَمی آسمأنی خأنه دورون زٚندیگی کونیمی.

⁹ ولی چی اَ دونیأ دورون، اَ جأنٚ دورون بئیسیم، و چی آسمأن دورون مسیح اَمرأ، اَمی هدف اَن ایسه کی ای‌رٚوٚند هرچی کودأندریم، اونی خوشألی‌یَ بٚدٚس بأوریم.

¹⁰ چونکی اَمأن همٚتأن مسیح دأوری تختٚ موقأبیل ایسیم و هرتأ جٚه اَمأن او کأرأنٚ آخرپٚسی‌یَ کی وختی اَمی جأنٚ دورون ایسأبیم بوکودیمَ دینه، چی خُب چی بد.

عیسا مسیح اَمٚرَه خودا اَمرأ آشتی دِهه

¹¹ هنٚ وأسی، چونکی اَجور ترس و ایحترأم خودا رِه اَمی دیل دورون نٚهأ، حقٚ سعی زنیمی کی مردومَ نیجأتٚ ور هیدأیت بوکونیم. خودا جٚه اَمی دیل وأخٚوٚر ایسه و دأنه کی اونچی گیمی، هو حِئقت ایسه. اومید دأرم کی شومأنم اَ موضو‌یَ بٚفأمٚسته بید.

¹² فیکر نوکونید کی ایوأردِه اَلکی گولأزَ شورو بوکودیم! اَطو نییٚه، بلکی خأییمی ایتأ دلیل بٚدأرید کی بتأنید اَمٚرَه گولأز بوکونید و او عیده جٚه دورُغی معلمأنٚ جوأبَ بدید کی نشوٚ نمأیَ گولأز کونٚده نه اونچی‌یَ کی دیل دورون نٚهأ.

¹³ مگه گومأن کونیدی کی اَمی عقلَ جٚه دٚس بٚدأییم کی دروأره‌یٚ اَمأن اَطویی گب زنیمی؟ حتّا اگه اَطو بٚبه، اَنٚ وأسی ایسه کی خودا جلال بیأفه! و اگه اَمی عقل سألیمه شِمِره ایفأقه ایسه.

¹⁴ هرچی کونیمی، اَمی صرفٚ رِه نییٚه، بلکی اَنٚ وأسی ایسه کی مسیحٚ دوس دأشتٚن تومأمٚ کمأل اَمی وجود و جأنَ بیگیفته. و چونکی ایمأن دأریمی کی مسیح خو جأنَ امّا همٚتأنٚ رِه فٚدأ بوکوده، اَنٚم ایمأن دأریم کی اَمأن اَمی پیشتر زٚندیگی دورون کی گونأ اَمرأ ایتأ بوبوسته بو میأن بٚمٚردیم.

¹⁵ مسیح همه کسٚ رِه بٚمٚرد کی تومأمٚ اوشأنی کی زٚنده ایسٚد ینی اوشأنی کی جٚه اون اَبدی زٚندیگی فأگیفتده، دِه خوشأنٚ رِه و خوشأنٚ خأسته‌یأنٚ فأرٚسِئنٚ رِه زٚندیگی نوکونٚد، بلکی هونی خوشألی رِه زٚندیگی بوکونٚد کی اَشأنٚ رِه بٚمٚرد و دووأره زٚنده بوسته.

¹⁶ هنٚ وأسی جٚه اَنٚ پٚسی اَمی مسیحی برأرأنَ، دونیأ مردومٚ فیکرٚ موطأبٚق و ظأهیرٚ وأسی قیضأوت نوکونیم. ای وخت منم دروأره‌یٚ مسیح اَطویی قیضأوت کودیم و بأوٚر دأشتیم کی اون ایتأ معمولی آدم ایسه. ولی اَسه دِه اَجور فیکر نأرٚم.

¹⁷ اونی کی مسیح شین بِه، ایتأ تأزه آدمَ شمأیل بِه. اون دِه او پیشترٚ اینسأن نییٚه؛ بلکی تومأمٚ کمأل ایتأ تأزه زٚندیگی‌یَ بٚسٚرأ گیفته.

¹⁸ تومأمٚ اَ خُبیأن جٚه او خودا ور ایسه کی عیسا مسیح فدأکأری وأسی، اَمٚرَه خو اَمرأ آشتی بٚده، و اَ مسئولیتٚ اَمٚرَه بیسپأرده کی اَ آشتی پیغأمَ البأقیأنم فأرٚسأنیم.

¹⁹ اَمی پیغأم اَن ایسه کی خودا در مسیح بو و مردومَ خو اَمرأ آشتی وأسی دؤخأدی کی اوشأنٚ گونأیَ بٚبخشه و اونی اَثرٚ پأکَ کونه.

²⁰ اَمأن مسیح سفیرأن ایسیم. خودا بوسیله اَمأن شیمی اَمرأ گب زٚنِه. او وخت کی اَمأن ایچی جٚه شومأن خأییم اَنٚ مأنه کی مسیح اونَ جٚه شومأن خأیه. هنٚ وأسی، جٚه اونی ور جٚه شومأن خأییمی کی خودا لطف و محبتَ رٚدَ نوکونید و اونی اَمرأ آشتی بوکونید.

²¹ چونکی خودا مسیحَ کی هیوخت گونأ نوکوده، اَمی وأسی گونأ چأکود، کی امّا بتأنیم بٚوأسطه مسیح خودا ورجأ قأبیلٚ قوبیل بیبیم.