دوم قرنتیان 2 - Gilaki New Testament

¹ پس تصمیم بیگیفتٚم کی شیمی ورجأ نأیم کی ایوأردِه شیمی غم و غورصه و نأرأحتی‌یَ بأعیث نٚبم.

² چونکی اگه من شیمی نأرأحتی‌یَ بأعیث ببم، دِه کی بأقی مأنِه کی مٚرَه خوشألَ کونه، جغرز هوشأنی کی اوشأنٚ غمَ بأعیث بوبوستم؟

³ هنٚ وأسی، او موضویأنَ می آخری دسخطٚ میأن بینیویشتم کی وختی بأمؤم، اوشأنی کی وأستی مٚرَه خوشألَ کونٚد، می غم و غورصه بأعیث نٚبٚد. چونکی ایطمینأن دأرم کی می خوشألی شیمی همٚتأنٚ خوشألی ایسه.

⁴ رأس‌رأسِی او دسخطَ نیویشتن مِرِه خٚیلی سخت بو، چونکی خٚیلی غم و غورصه دأشتیم. حِئقتَ بٚخأیید، نیویشتنٚ وخت گریه کودیم. نخأستیم او دسخطٚ اَمرأ شٚمٚره غورصه بدم، ولی شٚمٚره وأستی نیشأن بٚدأبیم کی چندر شٚمٚره دوس دأرم و شٚمٚره دیل دٚوٚستم.

او خطأکأرَ بٚبٚخشید

⁵ بدأنید اونی کی تومأمٚ اَ غورصه‌یأنَ بأعیث بوبوسته و می دسخطٚ دورون جٚه اون بینیویشتم، فقد مٚرَه نرجأنِه، بلکی ویشترٚ شومأن یا دٚسٚ کم غورصه خوردنَ ای عیده جٚه شٚمٚره بأعیث بوبوسته. ولی نخأیٚم ویشتر جٚه اَن اونی سٚر ایرأدگیر ببم.

⁶ چونکی او آدم شیمی کردکأرأنٚ وأسی کی اونی اَمرأ بوکودید، تِنبیه بوبوسته، اَندر کی اونی رِه وٚست ایسه.

⁷ اَسه وأستی اونَ بٚبٚخشید و دیل تسلأیی بدید، اَطو نٚبه ایمکأن دأره غم و غورصه فیشأر اونَ جٚه پأ تأوٚده.

⁸ پس خأهیش کونم شیمی دوس دأشتٚنَ اونَ نیشأن بدید.

⁹ او دسخطَ بینیویشتم کی شٚمٚره ایمتحأن بوکونم و بیدینٚم کی چندر می جَا ایطأعت کونیدی.

¹⁰ او وخت کی شومأن اینفرَ بٚخشیدی، منم اونَ بٚخشم. و اگه اینفرَ من بٚبخشم، اگه مسیح وئأله و شیمی خأطرٚ وأسی بٚخشم، البت اگه فیکر کونیدی می بٚخشئن رأس‌رأسِی لأزیم ایسه.

¹¹ ایچی دِه کی بأعیث بِه اَ آدمَ بٚبخشیم، اَن ایسه کی نوأستی وئألیم کی شیطان جٚه اَ فورصت بهره بٚبره، چونکی اَمأن جٚه اونی حیله‌یأن خٚوٚر دأریم.

اَمأن خودا رِه خوشبو عطر ایسیم

¹² جٚه اَ گب دٚوأریم. من هوطو کی شؤئؤندوبوم، تروآسٚ شهرَ فأرِسئم و خوداوند خورومٚ فورصتأن بوجود بأوٚرد کی مسیح اینجیلٚ پیغأمَ مردومَ وأگویا بوکونم.

¹³ ولی اویَه اَمی برأر تیتوسَ نیأفتٚم و اونی وأسی خٚیلی دیلوأپس بوبوستم. پس، اویَه آدمأنٚ اَمرأ خوداحافظی بوکودم و بوشؤم مقدونیه کی بلکی تیتوسَ اویَه بیأفٚم.

¹⁴ ولی خودایَ شوکر کی همیشٚک اَمٚرَه مسیح پیروزی میأن شیریک چأکونه، و هر جیگأ شیم، اَمٚرَه بٚکأر گیره کی مسیحَ مردومَ بشنأسأنیم. و اینجیلٚ پیغأمَ ایتأ خوشبو عطرٚ مأنستَن همٚتأ جیگأ پٚخشَ کونیم.

¹⁵ و جٚه اویَه کی مسیح اَمی زٚندیگی دورون ایسأ، اَمأن خودا رِه ایتأ خوشبو عطر ایسیم، ایتأ عطر کی اونی بو همٚتأنٚ دومأغَ فأرٚسِه، چی اوشأنی کی گونأ بوکودٚد چی اوشأنی کی نیجأت بیأفتٚد.

¹⁶ اوشأنی رِه کی گونأ رأ دورون قدم اوسأنٚده و هلأکٚ بوستنٚ ور شٚده، اَمأن محکوم بوستنٚ وأشتنأکٚ بویَ دیهیم، ولی اوشأنی رِه کی نیجأتٚ رأ دورون قدم اوسأنٚده، ایتأ عطر ایسیم کی همه چی‌یَ تأزٚگی و تأزه زٚندیگی بٚخشه. ولی کیسه کی بتأنه و قأبیل بٚبه کی اَطویی اینجیلَ موعیظه بوکونه؟

¹⁷ اَمأن خٚیلیأنٚ مأنستَن نیئیم کی خودا کلامٚ اَمرأ تیجأرت کونٚده و اوشأنٚ هدف فقد اَن ایسه کی جٚه اَ رأ خورومٚ موأجب بٚدأرٚد، بلکی جٚه خودا ور اوسه بوبوستیم کی مسیح قودرتٚ اَمرأ و ایتأ تیمیزٚ قلب و خودا ایرأده اَمرأ گب بٚزنیم.