دوم قرنتیان 12 - Gilaki New Testamentپولس رویأ و اونی جیسمٚ نأخوشی 1 هرچن می جَا اَجور گولأز کودن فأیده نأرِه، ولی وأستی ایدأمه بدم و جٚه رویأیأنی کی بیدِم و موکأشفه‌یأنی کی خوداوند مٚرَه بٚبخشه وٚصف بوکونم. 2 ایتأ مردأکَ در مسیح شنأسٚم، کی چأرده سأل پیشتر ببرده بوبوسته سیومی آسمأنٚ میأن، جأنٚ دورون یا بیرون جٚه جأن، نأنٚم، خودا دأنه. 3 و دأنٚم کی اَ مردأی، جأنٚ دورون یا بیرون جٚه جأن، وأزم نأنٚم، خودا دأنه، بهشتٚ میأن ببرده بوبوسته. 4 و نوگفتنی چیأن بشتأوست، ایچیأنی کی هیکس نتأنه زوأنٚ سٚر بأوٚره. 5 دروأره‌یٚ اَطوچی آدم گولأز کونم، ولی دروأره‌یٚ خودم، فقد می سوستیأنَ گولأز کونم 6 اگه چی حتّا اگه میل بٚدأرم کی گولأز بوکونم، ایتأ کأر کی جٚه عقلٚ رو نٚبه نییٚه، چونکی حِئقتَ وأگویا کونم، ولی جٚه اَ کأر دوری کونم، کی هیکس دروأره‌یٚ من هیچی ویشتر گومأن نوکونه، جغرز اونچی کی در من دینه یا می جَا ایشتأوه. 7 ولی اونی وأسی کی جٚه اَ موکأشفه‌یأن کی قأقَ کونه مٚرَه غرورٚ ایحسأس دٚس نٚده، ایتأ خأر می جأنٚ دورون مٚرَه فأدأ بوبوسته، ینی شیطان اوسه کوده، کی مٚرَه اَذِت آزأر بوکونه. 8 سه وأر خودایَ ایلتمأس بوکودم کی اونَ می جَا اوسأنه. 9 ولی اون بٚفرمأسته: «فقد ایچی کی لأزیم دأری، می فیض ایسه، چونکی می قودرت سوستی دورون کأمیلَ بِه.» پس هسأ خوشألی اَمرأ می سوستیأنٚ رِه گولأز کونم، کی مسیح قودرت می سٚر بأیٚه. 10 هه دلیلٚ رِه، مسیح خأطرٚ وأسی سوستیأن، بی‌حورمتیأن، سختیأن، اَذِت آزأرأن و موشکلأنٚ دورون خوشألم. چونکی او وخت کی سوستم، او وخت پورقوّتم. پولس قرنتیانَ عنأیت و محبت دأره 11 شومأن مٚرَه وأدأشتید کی ایتأ نأدأنٚ مأنستَن، می وٚصفَ بٚگم، هسأ کی، شومأن خودتأن وأستی مٚرَه تِشویق بوکوده بید. چونکی گرچی هیچ ایسٚم، ولی جٚه اَ «پیله روسولأن» هیچی کم نأرٚم. 12 او وخت کی شیمی اَمرأ ایسأ بوم و صبر و حوصله اَمرأ، خودایَ خیدمت کودأندوبوم، اون می دٚسٚ اَمرأ خٚیلی موجیزه‌یأن و کأرأنی کی آدمَ قأقَ کونه انجأم بٚدأ. هه موجیزه‌یأن، اَنٚ رِه دلیل و گووأ ایسٚد کی من خودا روسول و اوسه کوده ایسٚم. 13 فقد ایتأ کأر البأقی کیلیسایأن دورون انجأم بٚدأم، ولی شِمِره نوکودم، اَن ایسه کی شیمی سٚربأر نوبوستم و شیمی جَا مألی کومک نخأستم، خأهیش کونم می اَ تقصیرَ بٚبٚخشید! 14 هسأ سیومی وأر رِه قصد دأرم شیمی ورجأ بأیٚم؛ اَی دفأیٚم شیمی سٚربأر نٚبم، چونکی شیمی مألَ نخأیٚم بلکی شٚمٚره خأیم! جٚه خأطرَ ندید کی شومأن می زأکأن ایسید؛ زأکأنٚ وظیفه نییٚه کی خوشأنٚ پئر و مأرٚ زٚندیگی‌یَ فأرٚس فوروس بوکونٚد، بلکی پئر و مأر وأستی خوشأنٚ زأکأنٚ ایحتیأجأنَ فأرٚس فوروس بوکونٚد. 15 منم تومأمٚ می میلٚ اَمرأ حأضیر ایسٚم کی هر چی دأرم و حتّا مٚرَه شیمی فٚدأ بوکونم کی جٚه نظرٚ روحأنی تقویت بیبید؛ گرچی هرچی ویشتر شٚمٚره محبت کونم، شیمی محبت مٚرَه کمترَ بِه! 16 ای عیده جٚه شومأن تصدِق کونیدی کی شیمی سٚربأر نوبوم. ولی ایتأ عیده دِه ایمکأن دأره گومأن بوکوند کی حیله‌گر بوم و بعضی رأ روشأنٚ اَمرأ شیمی جَا بهره ببردم! 17 ولی چوطو؟ مگه اوشأنی کی شیمی ورجأ اوسه کودم، جٚه شومأن بهره ببردٚد؟ 18 او وخت کی جٚه تیتوس خأهیش بوکودم کی شیمی ورجأ بأیٚه و اَمی اویتأ برأرَ اونی اَمرأ اوسه کودم، مگه اَشأن شیمی جَا بهره ببردٚد؟ مگه اَمی رأ روش ایجور نوبو؟ 19 بلکی فیکر کونیدی کی تومأمٚ اَ گبأن اونی رِه ایسه کی ایوأردِه شیمی لوطفَ بٚدٚس بأوٚرٚم. ولی اصلن اَطو نییٚه! خودا شأهید ایسه کی اَمی منظور جٚه اَ گبأن، کومک شٚمٚره ایسه اَی جأن و دیلٚ ریفِقأن، چونکی خأییم شومأن بٚنأ بیبید و روحأنی عألمٚ دورون قوّت فأگیرید. 20 چونکی ترسٚم او وختی کی بأیٚم شیمی ورجأ، جٚه دِئنٚ شیمی وضع خوشألَ نٚبم؛ او وخت شومأنم جٚه می کردکأر شیمی وضعٚ اَمرأ، خوشألَ نیبید. ترسٚم کی بأیٚم و بیدینٚم کی شیمی میأن بحث، حیسأدت، توندَ بوستن، اَلکی گولأز، توهمت، ایفترأ، غرور و سیوأ بوستن بمأنه. 21 هطویه، ترسٚم وختی اَی دفأیٚم شیمی ورجأ بأیٚم، ایوأردِه خودا مٚرَه شیمی وأسی شرمنده بوکونه. ترسٚم کی ایوأردِه مأتم بیگیرم، چونکی خٚیلی جٚه شومأن کی پیشتر جٚه اَن گونأ بوکودٚد، نأپأکی، جینسی گونأیأن و اوجور فسق و فوجورٚ جَا کی بوکودٚد، توبه نوکودد. |
© 2024 Transform Iran
Transform Iran