دوم قرنتیان 10 - Gilaki New Testamentپولس جٚه خو خیدمت دفأع کونه 1 هسأ، مسیح فروتنی و مهرٚوأنی اَمرأ جٚه شومأن ایتأ خأهیش دأرم. هطویه، اَ خأهیشَ هو پولس دأره کی ای عیده جٚه شومأن دروأره‌یٚ اون گیدی: «او وخت کی جٚه اَمأن دؤر ایسٚه، خطٚ نیشأنٚ اَمرأ خو دسخطأنَ نیویسه، ولی وختی اَیِه اَمی ورجأ، نیأره حتّا ایتأ کلمه گب بٚزٚنه!» 2 می خأسته اَن ایسه کی ایتأ کأر نوکونید کی وختی فأرسٚم شیمی ورجأ، می کردکأر شیمی اَمرأ ایهأنت اَمرأ بٚبه. نخأیٚم کأر به اویَه فأکشه کی وأدأر ببم ایتأ عیده جٚه شٚمٚره تِنبیه بوکونم، ینی اوشأنَ کی گومأن کونٚده می کأرأن و گبأن، روحأنی نییٚه و اینسأنی ایسٚه. 3 اگه‌چی من ایتأ معمولی و سوستٚ اینسأن ایسٚم، ولی می روحأنی جنگأنٚ میأن جٚه اینسأنی رأ روشأن، پیروزی رِه ایستفأده نوکونم. 4 او اَسلحه کی اَمأن جنگستنٚ رِه بٚکأر بریم، دونیأیی اَسلحه نییٚه، بلکی قلعه‌یأنٚ جٚه بین بردنٚ وأسی ایتأ ایلاهی قودرت دأره! 5 اَمأن هرتأ دلیل و ایدعأ کی غرور اَمرأ ایسه و خودا شنأختٚ موقأبیل قد فأکشه‌یَ، ایشکنیم و هرتأ فیکر کی درزٚبینٚ کونه‌یَ اسیرَ کونیم و مسیح موطیع چأکونیمی. 6 اَمأن آمأده بأشٚ دورون ایسأییم کی هر وخت شیمی ایطأعت کأمیلَ بوسته، هرتأ سٚرکشی‌یَ البأقیأنٚ میأن موجأزأت بوکونیم! 7 شیمی عأیب اَن ایسه کی می ظأهیرَ دینیدی، هنٚ وأسی فقد سوستی و درمأندگی دینیدی، ولی بأطینٚ موضویأنَ دیقت نأریدی. اَطویی، اگه اینفر جٚه شومأن ایدعأ کونه کی جٚه مسیح ور ایتأ قودرت و ایختیأرَ صأب ایسه، رأس‌رأسِی منم تأنٚم اَجور ایدعأ بوکونم. 8 ولی من اَ قودرت و ایختیأرَ شیمی کومکٚ رِه بٚکأر دٚوٚستم، نه شیمی اَذِت آزأرٚ رِه. بلکی گومأن بوکونید کی ویشتر جٚه می ایختیأرأنٚ حد گولأز کودأندرم؛ ولی اَطو نییٚه. 9 اَنَ نیویسٚم کی گومأن نوکونید کی وختی می دسخطأنٚ دورون شٚمٚره شمأتٚت کونم، می نیّت فقد شیمی ترسأنئن ایسه و وٚست. 10 چونکی ای عیده گده: «اونی دسخطأن سنگین و پورقودرت ایسه، ولی اونی حوضور سوست و اونی موعیظه‌یأن بی‌ارزش ایسه!» 11 اَجور آدمأن وأستی بدأنٚد کی هوطو کی اَمی دسخطأنٚ میأن و اَمی غیبتٚ دورون سختگیر ایسیم، کأرٚ میأن و وختی حأضیرٚم ایسیم سختگیر بیمی. 12 اَمأن نیأریم کی اَمٚرَه اوشأنی اَمرأ کی خوشأنَ اَلکی گولأز کونٚده، ایتأ رده میأن بٚنیم. اَمٚرَه‌یٚم اوشأنٚ اَمرأ موقأیسه نوکونیم. اَشأنٚ کأر عأقیلأنه نییٚه کی خوشأنَ کس‌کسٚ اَمرأ قیأس کونٚده، و خوشأنَ او معیأرأنٚ اَمرأ سنجیدی کی خودشأن بٚنأده! 13 ولی اَمأن ایختیأرأن و اونچی کی اَمی شین نیه‌یَ گولأز نوکونیمی؛ بلکی او سأمأنٚ کأرأنٚ گولأز کونیمی کی خودا اَمٚرَه بیسپأرده، او سأمأن کی خیدمت شیمی میأنم اونی دورون نٚهأ. 14 پس وختی ایدعأ کونیمی کی ایپچه ایختیأر شیمی رو دأریم، و ایتأ حق شیمی گردن دأریم، اَمی پأیَ ویشتر جٚه خو حد جولو نٚنیم، چونکی خودا نقشه موطأبٚق، اَمأن اوّلی آدمأنی بیم کی مسیح اینجیلٚ پیغأمَ شٚمٚره فأرسأنِئیم. 15 اَنٚم بٚگم کی هیوخت نخأستیم او زحمتأنَ کی البأقیأن شِمِره بٚکشِئده، اَمٚرَه دوچوکأنیم و اوشأنَ گولأز بوکونیم، بلکی اَمی نأجه اَن ایسه کی شیمی ایمأن روشد بوکونه و خودا هو رأ روشٚ مرزٚ دورون، اَمی خیدمت شیمی میأن پٚخشَ بٚه. 16 اونی پٚسی تأنیمی اینجیلٚ پیغأمَ او شهرأنَ کی جٚه شومأن دورتر ایسٚدم فأرٚسأنیم، او شهرأنَ کی تأ هسأ هیکس اَ پیغأمَ اویَه فأنرٚسأنِه، اَطویی بعضیأنٚ مأنستَن البأقیأنٚ کأرٚ دورون دنکفیم و البأقیأنٚ کأرَ گولأز نوکونیمی. 17 اَطو کی موقدسٚ کیتأبأنٚ دورون بینیویشته بوبوسته: «اگه اینفر خأیه ایچی رِه گولأز بوکونه، او کأرَ کی خوداوند بوکوده‌یَ گولأز بوکونه.» 18 چونکی موهیم اَن نییٚه کی اینفر خو جَا و خو کأرأنٚ جَا کی انجأم بٚدأ وٚصف بٚگه و گولأز بوکونه، بلکی موهیم اون ایسه کی خوداوند اونَ تِشویق بوکونه. |
© 2024 Transform Iran
Transform Iran