دوم قرنتیان 1 - Gilaki New Testament

¹ اَ دسخط جٚه پولسٚ ور ایسه کی خودا ایرأده اَمرأ اینتخأب بوبوسته کی عیسا مسیح روسول بٚبه و هطویم اَمی برأر جَا تیموتائوسٚ ور. اَ دسخطَ خودا کیلیسایَ قُرِنتُس میأن و هطویم همٚتأ مسیحیأن اَسر تأ اوسرٚ اَخائیه اوستأن نیویسٚم.

² جٚه اَمی پئر خودا و اَمی خوداوند عیسا مسیح، شِمِره فیض و آرأمٚش خأیم.

خودا دیل تسلأیی دٚئن تومأمٚ موشکلأنٚ رِه وٚست ایسه

³ خودایَ شوکر، اَمی خوداوند عیسا مسیحٚ پئر، کی مهروأنیأنٚ پئر و همٚتأ دیل‌تسلأییأنٚ خودا ایسه.

⁴ اون اَمٚرَه دیل تسلأیی دِهه کی اَمأنٚم هه تسلأیَ اوشأنی‌یَ فأدیم کی رنجٚ میأن ایسأده و اَمی دیلسوجی و تِشویقَ لأزیم دأرٚد.

⁵ یقین بدأنید کی هرچی مسیح رِه ویشتر زحمت بیدینیم، اونی جَا ویشتر دیل تسلأیی و دیلگرمی فأگیریمی.

⁶ حتّا وختی سختیأنٚ بأرٚ جیر اَمی کمر فوچومه، اَنٚم شیمی نیجأت و دیل تسلأیی شین ایسه. چونکی وختی اَمأن خودمأنم دیل تسلأیی یأفیمی و دیلگرم بیمی، حتم شٚمٚره‌یٚم دیلگرمَ کونیمی. او وخت تأنیدی صبرٚ اَمرأ هو رنجأنَ تحمول بوکونید کی اَمأن تحمول بوکودیم.

⁷ و ایطمینأن دأریمی وختی اَمی رنجأنٚ دورون شیریک بیدی، او دیل تسلأیی و دیلگرمی میأن کی خودا اَمٚرَه بٚخشه‌یٚم شیریک بیدی.

⁸ جأن و دیلٚ ایمأندأرأن، حتم بشتأوستیدی کی آسیا دورون چندر سختی بٚکشِییم. موشکلأنٚ فیشأر اَندر بو کی زٚنده مأنستٚنٚ اومیدَ نأشتیم،

⁹ و ایحسأس کودیمی کی مٚردنَ محکوم بوبوستیم، چونکی اَمی نیجأتٚ رِه، جٚه اَمی دٚس هیتأ کأر برنأمؤیی. ولی اَ زحمتأن ایتأ خورومٚ آموج اَمٚرَه فأدأ کی دِه اَمٚرَه موتکی نیبیم، بلکی او خودایی کی حتّا تأنه مورده‌یأنٚ زٚنده کونه‌یَ توٚکول بوکونیم. پس همه چی‌یَ خودا دٚس بیسپأردیم.

¹⁰ اونم اَمٚرَه کومک بوکوده و جٚه ایتأ وأشتنأکٚ مٚردن نیجأت بٚدأ؛ و جٚه اَنٚ پٚسی‌یٚم اومید دأریمی کی اَمٚرَه نیجأت دِهه.

¹¹ ولی شومأنم وأستی اَمٚرَه شیمی دوعأیأنٚ اَمرأ کومک بوکونید. او وخت کی بیدینید او دوعأیأن وأسی کی اَمی سلأمتی رِه کونیدی، خودا اَطو پورشوکو جوأب دِهه، او وخت خودایَ ویشتر شوکر کونیدی.

اَمی کردکأر شیمی اَمرأ همیشٚک صأف و صأدٚق بو

¹² اونچی کی اَمی گولأزٚ بأعیث بِه، اَن ایسه کی تومأمٚ اَمی صدأقتٚ اَمرأ تأنیمی بیگیم کی اَمی کردکأرٚ میأن مردومٚ اَمرأ و بوخصوص شیمی اَمرأ، همیشٚک صأف و صأدٚق بیم، و اَمی چومٚ اومید فقد خوداوندٚ کومکَ رو نٚهأ بو، نه اَمی قوّتٚ سٚر.

¹³ او دسخطأن کی شٚمٚره بینیویشتیم، همٚتأ آشیکأر و وأضیح بود و هیوخت ایتأ موضو‌یَ سٚردٚوٚسته نوگفتیم. و اومید دأرم

¹⁴ هوطو کی ایپچه اَمٚرَه بٚشنأختیدی، ایتأ روج اَمٚرَه تومأم و کمأل بٚشنأسید و اَمٚرَه گولأز بوکونید. او وخت اَمأنٚم او روج کی اَمی خوداوند عیسا، وأگرده شٚمٚره گولأز کونیمی.

¹⁵ شیمی روحأنی فأمَ اَجور ایطمینأن دأشتیم کی تصمیم بیگیفتٚم اَنٚ پٚسی کی دو وأر شٚمٚره بیدِم، دو وأر شٚمٚره برکت بدم؛

¹⁶ اوّلی وأر، می رأ دورون کی شؤئؤندوبوم مقدونیه و دویُمی وأر، او وخت کی جٚه اویَه وأگردستأندوبود. او وخت شومأن مٚرَه یوهودیه سٚفر دورون کومک کونیدی.

¹⁷ هسأ مومکین ایسه کی وأوٚرسید چٚره می تصمیمَ عوضَ کودم. ینی شک دأشتیم یا ویشترٚ مردومٚ اَ دونیأ مأنستَن بوبوستم کی وختی گده «بله» اَشأن منظور «نه» ایسه؟

¹⁸ نه، اَطو نییٚه. او خودایی کی اونی گبأن رأست ایسه و شأ اونَ ایعتمأد کودن، شأهید ایسه کی اَمی گبأنٚم شأ ایعتمأد کودن و وختی گیمی «بله»، اَمی منظور هو «بله» ایسه.

¹⁹ چونکی خودا پٚسر، عیسا مسیح، اونی نییٚه کی وختی گه «بله»، اونی منظور «نه» بٚبه، بلکی همیشٚک هر چی گه، هونَ انجأم دِهه؛ و اَمی پیغأم و موعیظه ینی من و سیلاس و تیموتائوس، دروأره‌یٚ اَجور آدم بو.

²⁰ اونه کی تومأمٚ خودا وعده‌یأنَ، حتّا اگه خٚیلی بٚبٚد، انجأم دِهه، و اَمأنٚم همٚتأ جیگأ وأگویا بوکودیم کی اون چندر خو وعده‌یأنٚ سٚر اَمین و بأوفأ ایسه، کی اون جلال بیأفه.

²¹ اَجور خودا ایسه کی اَمٚرَه شیمی اَمرأ در مسیح قأیم چأکود و اَمٚرَه مَسح بوکوده کی اونی اینجیلٚ پیغأمَ همه کسَ فأرٚسأنیم،

²² و خو مُهرَ اَمی رو بٚزِه کی اونی شین ایسیم و روح‌القدسَ اَمی دیلأنٚ دورون بٚنأ کی دونبألترٚ برکتأنٚ بیعأنه ایسه.

²³ خودایَ شأهید گیرم کی اگه شیمی ورجأ وأنگردستم، اَنٚ وأسی بو کی نخأستیم شٚمٚره می سختٚ شمأتتأنٚ اَمرأ اَذِت بوکونم.

²⁴ هنٚم بٚگم کی می منظور اَن نییٚه کی شیمی سٚر پیله‌تری بوکونیم و بیگیم کی چوطو شیمی ایمأنَ انجأم بدأیید. اَمی نیّت اَن ایسه کی کس‌کسٚ اَمرأ همدیل و همجأن کأر بوکونیم کی جٚه خوشألی پور بیبید، چونکی شیمی ایمأنٚ وأسی ایسه کی قأیم ایسأیید.