اوّل تیموتائوس 6 - Gilaki New Testament

¹ همٚتأ مسیحی غولأمأن وأستی خوشأنٚ اربأبأنٚ اَمرأ نهایتٚ ایحترأمٚ اَمرأ رفتأر بوکوند کی مردوم خودا نأم و اونٚ آموجَ بدگویی نوکونٚد.

² اگه اربأبم مسیحی بٚبه، نوأ اونٚ جَا سوء‌ ایستفأده بوکوند و کأرٚ جیر جیویزد، بلکی برعکس وأستی بِیتر کأر بوکوند، چٚره کی ایتأ مسیحی برأرَ خیدمت کونٚده. اَ نوکتٚه‌یأنَ ایمأندأرأنَ بأموج و اَشأنَ تِشویق بوکون کی اوشأنَ ایجرأ بوکوند.

ایشتیوأ آموج و پولدوستی خطر

³ اگه اینفر ایجور دِه بأموجه و اَمی خوداوند عیسا مسیحٚ دوروستٚ آموجٚ اَمرأ و دیندأری آموجه‌یأنٚ اَمرأ موأفق نٚبه،

⁴ اَجور آدم گولأزٚ جَا پورَ بِه و درک و فأمٚ جَا خألِه بِه و دوس دأره کلماتٚ مأنی رِه نأخوشی اَمرأ جنگٚ‌ دعوأ و درگیری بٚدأره، چیزی کی بأعیث بِه حسودی، بوگو موگو، بی‌حورمتی گبأن، شیطانی بدگومأنیأن

⁵ و همیشٚکی درگیری افرأدٚ میأن کی اَشأنٚ عقل فأسیدَ بوسته و حِئقتَ پوشتَ کودٚد بوجود بأیِه و گومأن کونٚده کی دین‌ دأشتٚنٚ اَمرأ تأنٚد مأل و مینألَ بٚدٚس بأوٚرٚد!

⁶ ولی دین‌ دأشتٚن قأنع بؤئونٚ اَمرأ، ایتأ پیله ثیروته.

⁷ اَمأن چیزی اَمی اَمرأ اَ دونیأ دورون نأوٚردیم و چیزی‌یٚم نبریم.

⁸ پس اگه لیوأس و غذأ اَمِرِه وٚسته وأستی قأنع و رأضی بیبیم.

⁹ چون اوشأنی کی مأل و مینألٚ جمَ کودنٚ دونبأل دووٚده، دِئر یا زود نأخوشی کأرأنَ دٚس زنٚده؛ اَ کأرأن، خودشأنَ ضربه زٚنِه، اوشأنٚ فیکرَ فأسیدَ کونه، اوشأنَ خرأبَ کونه و نأبودی ور فأکشِه.

¹⁰ چون مأل و مینألٚ دوس دأشتٚن، همه جور شرورٚ کأرأنٚ ریشه‌ ایسه. بعضیأن کی مأل و مینألٚ آروزو دأشتید، ایمأنٚ جَا رو وأگردأنِده، خوشأنٚ جوروأجور دردأنٚ گریفتأرَ کودٚد.

تیموتائوسٚ وظیفه‌یأن

¹¹ اَی تیموتائوس، تو مردٚ خودایی! اَ زشتٚ کأرأنٚ جَا تٚرَه جیویزأن و رأستی و پرهیز کودنَ تٚرَه پیش بیگیر؛ خودایَ ایعتمأد بٚدأر؛ آدمأنَ محبت بوکون؛ صبر بٚدأر و مهرٚوأن بوبو.

¹² ایمأنٚ خورومٚ جنگٚ دورون بٚخُبی جنگ بوکون و او همیشٚکی زٚندیگی‌یَ بٚدٚس بأوٚر کی خودا تٚرَه اونٚ رِه دؤخأده، هو زمأت کی ایتأ عألمٚ شأهیدأنٚ ورجأ خورومٚ ایعترأف بوکودی.

¹³ او خودایی ورجأ کی همه کسَ زٚندیگی بٚبخشه و مسیح عیسا ورجأ کی شوجأعتٚ اَمرأ پُنتیوس پیلاتُسٚ روبرو شهأدت بٚدأ، تٚرَه نصیحت کونم

¹⁴ کی تومأمٚ خودا دستورأنَ انجأم بدی کی کسی نتأنٚه جٚه اَسه تأ اَمی خوداوند عیسا مسیح اَمؤنٚ زمأت تی دورون عأیبی بیأفه؛

¹⁵ چون موتٚبأرٚکٚ خودا کی تنأ قأدیرٚ بوجؤر مرتبه و شأهٚ شأهأن و سرورٚ سرورأن ایسه، هو زمأتٚ دورون کی تعیین بوکوده مسیحَ روأنَه کونِه.

¹⁶ فقد اون ایسه کی سرمدیٚه و ایتأ نورٚ دورون ایسأ کی هیکس تأب نأرِه اونَ نیزدیکَ بٚه و هیکس اونَ نیده و نیدینه. عیزت و قودرت همیشٚک اون رو بٚبه. آمین.

¹⁷ اوشأنی کی اَ دونیأ دورون مأل و مینأل دأرٚده بوگو کی گولأز نوکونٚد و اونَ اومید دٚنٚودد چون دِئر یا زود جٚه بین شِه، بلکی اوشأنٚ اومید خودایَ بٚبه کی هرچی خأییم خو سخأوتٚ اَمرأ، اَمٚرَه فرأهم کونِه تأ اوشأنٚ جَا لیذّت ببریم.

¹⁸ اَشأنٚ بوگو خوشأنٚ مأل و مینألٚ خیرٚ رأ دورون خرج بوکونٚد و خورومٚ کردکأرأنٚ دورون مأل و مینأل بٚدأرٚد، شأدی اَمرأ موحتأجأنٚ یاور بٚدٚد و همیشٚک حأضیر بٚبٚد کی مأل و مینألٚ جَا کی خودا اَشأنَ فأدأ، دیگرأنٚم سود فأرٚسأنٚد.

¹⁹ اَ خورومٚ کردکأرأنٚ اَمرأ، اَشأن رأس‌رأسِی گنجَ خوشأنٚ رِه جمَ کونٚده کی آینده رِه ایتأ قأیمٚ پأکأر ایسه کی او زٚندیگی‌ کی رأس‌رأسِی زٚندیگی ایسه‌یَ بٚدٚس بأوٚرٚد.

²⁰ اَی تیموتائوس، اونچی کی خودا تٚرَه امأنٚت بیسپأرده، بٚدأر. تٚرَه بیخودٚ گبأنٚ اَمرأ درگیر نوأکودن، بوخصوص اوشأن کی عیلم و دأنشٚ جَا دٚم زنٚده.

²¹ بعضی جٚه اَ دسته آدمأن، هه بحثأنٚ وأسی خوشأنٚ ایمأنٚ جٚه دٚس بٚدأده. خودا فیض تی اَمرأ بٚبه.