اوّل تیموتائوس 5 - Gilaki New Testament

ویوه زنأکأن، کیشیشأن و غولأمأنٚ اَمرأ رفتأر کودن

¹ پیرٚمردأکٚ اَمرأ هیوخت برزخ گب نوأزِئن، بلکی اونَ تی پئرٚ مأنستَن ایحترأمٚ اَمرأ نصیحت بوکون. جوأنأنٚ اَمرأ تی برأرأنٚ مأنستَن، محبتٚ اَمرأ گب بٚزٚن.

² پیرٚزنأکأنٚ اَمرأ تی مأرٚ مأنستَن و جوأنٚ کؤرأنٚ اَمرأ تی خأخورأنٚ مأنستَن رفتأر بوکون و تی فیکرأن همیشٚک اوشأنٚ رِه پأک بٚبه.

³ ویوه زنأکأنَ بٚدأر و مورأقبت بوکون، البت اگه هیکسَ نأرٚده کی اوشأنٚ جَا مورأقبت بوکونٚه.

⁴ ولی اگه زأکأن یا نٚوٚه‌یأنی دأرٚده، اوشأن وأستی او ویوه زنأکأنَ بٚدأرٚد و بأموجد کی خوروم کردکأرأنَ خأنه جَا شورو بوکوند و جٚه اوّل، خوشأنٚ دِینَ وأستی خوشأنٚ پِئر و مأر و آباء اجدادَ بٚجأ بأوٚرٚد. اَن چیزی ایسه کی خودایَ خوش اَیِه و رأضی کونه.

⁵ زنأکی، رأس‌رأسِی ویوه ایسه کی وأقعن اَ دونیأ دورون هیکسَ نأرِه و اونٚ چوم و اومید خودا رو نٚهأ و روج و شب دوعأ دورون خودا جَا یاور خأیه.

⁶ ولی ویوه زنأکی کی بیکأر گردِه و بدگویی کونِه الوأتی کونِه، هه زٚندیگی دورون، بٚمٚرده ایسه.

⁷ اَن وأستی شیمی کیلیسا موقررأتٚ جَا بٚبه، کی اعضأ بدأنٚد کؤ کأر دوروسته و اونَ انجأم بٚدٚد.

⁸ ولی اگه اینفر خو قوم و خویش، و بوخصوص خو خأنوأرٚ اعضأیَ توجه نوکونٚه، رأس‌رأسِی ایمأنَ اینکأر بوکوده؛ هطوچی آدم، ایتأ کأفرٚ جَایٚم کمتره.

⁹ فقد ویوه زنأکی‌یَ، کیلیسا حیمأیت فأگیفتنٚ رِه ثبت نأم بوکون کی شصت سأل بوجؤرتر سندٚ سأل بٚدأره و خو مردأکَ کی بٚمٚرده، وفادأر بوبوسته بی.

¹⁰ هطوچی ویوه زنأکأن وأستی خورومٚ کردکأرأن بوکوده بید، زأکأنٚ آمؤختٚن، غریبه‌یأنٚ جَا پذیرأیی کودن، موقدسٚ آدمأنٚ پأیَ شؤستن، رنج بیدِکأنٚ یاور دٚئنٚ مأنستَن و هطو اَنکی خودٚشأنَ هرتأ خورومٚ کأرٚ رِه وقف بوکوده بٚبٚد.

¹¹ ویوه‌یأنی کی اَشأنٚ جَا جوأنترد، اَ گورو دورون قوبیل نوأکودٚن، چونکی وختی اَشأنٚ خأسته‌یأن کی جیسم شینه او عهد کی مسیحَ بیسپأردٚده غلبه بوکونٚه، بأزم خأیده مردٚ رِه بٚبٚد.

¹² اَطویی اوّلی عهدی کی مسیح اَمرأ دٚوٚسته بودَ ایشکنِنٚ وأسی محکومَ بٚده.

¹³ جٚه اَن بوگذریم، جوأنٚ ویوه ایمکأن دأره بیکاری و تنبلی‌یَ عأدت بوکونه و اَ خأنه او خأنه بٚگرده و اَیتأ اویتأ رِه بدگویی بوکونه و البأقیأنٚ کأرٚ دورون فوضولی بوکونه، هچینٚ گب بٚزٚنه.

¹⁴ پس می نظر اَنه کی بِیتره کی جوأنٚ ویوه‌یأن مردٚ رِه بٚبٚد و زأی بأوٚرٚد و خأنه دأشتٚنَ موشغولَ بد کی هیکس نتأنه کیلیسا جَا عأیب و ایرأد بیگیره.

¹⁵ چون هطو کی معلومٚه بعضی‌ جٚه ویوه‌یأن، کیلیسا جَا رو وأگردأنِده، شیطانٚ دونبألسر رأ دکفتٚده.

¹⁶ ایوأردِه تیکرأر کونم کی هرتأ ویوه زنأکٚ قوم و خویش وأستی اونٚ خٚرجٚ فأدٚه و اَ بأرَ کیلیسا کؤل نٚنٚد کی کیلیسا بتأنٚه ویوه زنأکأنی‌یَ بٚدأرٚه کی رأس‌رأسِی هیکسَ نأرٚده.

¹⁷ پیله کسأنی کی کیلیسا کأرأنٚ خُب سأمأن دٚهٚده، دوبرأبر ایحترأم و دٚسموزد اَشأنٚ حقٚه، بوخصوص اوشأنی کی موعیظه و خودا کلامٚ آموج دٚئنٚ میأن حقٚ سعی زنٚده.

¹⁸ چون موقدسٚ کیتأبأنٚ دورون بأمؤ: «گأبٚ دٚهٚنَ خرمن کؤبی رِه دٚنوٚد و وئأل کأرٚ موقع تی خرمنٚ جَا بوخوره» و ایتأ جأ دِه‌یٚم بٚفرمأسته: «چون کأرگر خو موزدٚ حق دأره»

¹⁹ اگه ایتأ جٚه پیله کسأنَ ایفترأ بٚزٚنٚد، اونَ قوبیل نوأکودن مگه اَنکی دو سه نفر شأهید، اونَ تأیید بوکوند.

²⁰ اگه معلوم بٚبه کی گونأ بوکوده وأستی همه کسٚ ورجأ اونَ تِنبیه بوکونی کی البأقیأنٚ رِه درسٚ عیبرت بٚبه.

²¹ تٚرَه، خودا و عیسا مسیح و موقدسٚ فٚرٚشته‌یأنٚ جَا قسم دٚهٚم کی اَ دستورأنٚ بی اَنکی هیکسٚ طرفَ بیگیری ایجرأ بوکونی و افرأدٚ میأن فرق نٚنی.

²² کیلیسا خیدمتٚ تعیین کودنٚ رِه افرأدٚ دٚس نٚهٚنٚ دورون توندأ تأکیدی نوأکودن. دیگرأنٚ گونأیأنٚ دورون شیریک نوأبوستن. تٚرَه پأک و موقدس بٚدأر.

²³ خُبه کی جغرز آب، بعضی وختأنٚم تی مأده نأرأحتی رِه، ایپچه شرأب وأخوری، چون خٚیلی وختأن نأخوش اَحوألَ بی.

²⁴ بعضیتأنٚ گونأیأن موشخصه و اوشأنَ قیضأوتٚ رِه بٚره. ولی بعضیتأنٚ دِه گونأیأن بأزون بیرون اَیِه.

²⁵ اَطویی، بعضیتأنٚ خُب و شریفٚ کأرأن همه کسٚ رِه روشنٚه و اگه‌یٚم هسأ روشنَ نٚبه، ایتأ روج آشیکأرَ بِه.