اوّل تیموتائوس 3 - Gilaki New Testament

کیشیشأن و شمأسأن

¹ اَ گب کأمیلن قأبیلٚ قوبیل و دوروست ایسه کی اگه اینفر نظأرتٚ کیلیسا موقأمٚ رِه شوق و ذوق بٚدأره، ایتأ شرأفتمندأنه و آبرومندأنه کأرَ آروزو دأره.

² ولی کیلیسا نأظیر وأستی بی‌عأیب و ایرأدٚ آدم، ایتأ وفأدأرٚ مرد خو زنٚ رِه، نرم و خوش سولوک، خو کردکأرأنَ بٚپأیه، موحترم، میهمأن دوس بٚبه و اَ ذوقَ بٚدأره کی خودا کلامَ بأموجه.

³ هطویم نوأستی مشروب بوخوره و توندٚ اخلاق بٚدأرٚه، بلکی خوروم اخلاق بٚدأره و دعوأ جَا دوری بوکونه، عأشقٚ مأل و مینأل نٚبه.

⁴ وأستی بتأنه خو اهل و عیالٚ کأرأنٚ رفع و روجو بوکونه و خو زأکأنٚ بٚپّأیٚه کی اونٚ جَا حیسأب ببرد و ایطأعت بوکوند، خودشَ و دیگرأنَ ایحترأم بٚنٚد،

⁵ چونکی اگه اینفر نتأنه خو اهل و عیألَ ایدأره بوکونه چوطو تأنه خودا کیلیسایَ خیدمت و ایدأره بوکونه؟

⁶ نأظیر نوأستی نو ایمأن بٚبه، چونکی ایمکأن دأره مغرورَ به و حوکمی میأن دکفه کی شیطان دکفته.

⁷ کیلیسا بیرونم، وأستی غیرٚ مسیحی آدمأنٚ میأنی خورومٚ نأم بٚدأره کی شیطان نتأنه اونَ اَلکی گبأنٚ جوروأجورٚ اَمرأ بٚدأم تأوٚدٚه و اونی دٚس و پأیَ کیلیسا اعضأ خیدمت کودنٚ رِه دٚوٚده.

⁸ هطویم، شمأسأن کی کیلیسا نأظیرأنٚ همکأرٚده وأستی آدمأنی نجیب و بأ ایحترأم بٚبٚد. وأستی جٚه دورویی دوری بوکوند، زیأدی شرأب نوخورٚد، حرأمٚ مأل و مینألٚ دونبأل نٚبٚد؛

⁹ بلکی وأستی ایمأنٚ جولفٚ حِئقتَ تعهد بٚدأرٚد ایتأ رأحتٚ ویجدأنٚ اَمرأ زٚندیگی بوکوند.

¹⁰ هر وخت بٚخأستی اینفرَ شمأسی موقأمَ فأدی، اوّل جٚه همه چنتأ کیلیسا کأرأنَ اونَ فأدٚن کی اونٚ خُلق و خو و قأبلیتأنَ بیأفی. اگه بتأنسته خو وظیفه‌یأنَ دوروست انجأم بٚده، اَسه اونَ شمأسی رِه اینتخأب بوکون.

¹¹ اَشأنٚ زنأکأنٚم وأستی نجیب و بأ ایحترأم بٚبٚد و دیگرأنٚ جَا بد گب نٚزٚند، بلکی خوروم کردکأر بٚدأرٚد و هرچی وأسی قأبیل ایعتمأد بٚبٚد.

¹² شمأس وأستی ایتأ زن بٚدأره و اونٚ جَا بأوفأ بٚبه، خو اهل و عیالٚ رِه خوروم مردأی بٚبه.

¹³ شمأسأنی کی خُب خیدمت بوکونٚد، خوروم چیزأن بٚدٚس اَوٚرٚده، چونکی هم مردوم اوشأنَ ایحترأم نٚهٚده و هم اَشأنی ایمأن و ایعتمأد مسیحٚ عیسا جَا پورزورترَ بِه.

اَمی ایعتقأدأنٚ رأستی

¹⁴ بأ اَنکی اومید دأرم خٚیلی زود بأیٚم تی ورجأ، امّا اَشأنَ تٚرَه نیویسٚم،

¹⁵ اگه می اَمؤن دِئرَ بوسته، وأستی بدأنی کی خودا خأنه دورون چوطو وأستی رفتأر بوکونی، هو خأنه‌یی کی خودایٚ زٚنده کیلیسا ایسه و رأس‌رأسِی پأیه و اَساس ایسه.

¹⁶ شک نشأ کودن کی دیندأری رأز کی نمأیأنَ بوسته، پیله‌دأنه ایسه، اَ رأز کی اون جیسمٚ دورون ظأهیرَ بوسته و روح‌القدس جَا تأیید بوبوسته، فٚرٚشته‌یأن اونَ بیدِییدی، مردومٚ دورون اونٚ وأسی موعیظه بوبوسته، دونیأ دورون اونَ ایمأن بأوٚردٚد و هوطو جلال دورون بوجؤر ببرده بوبوسته.