اوّل تیموتائوس 2 - Gilaki New Testament

دستورأنی جٚه دوعأ و عیبأدت کودن

¹ جٚه اَ خأطر، پیشتر جٚه هرچی سفأرش کونم کی کلّ مردومأنٚ وأسی خأسته‌یأن، دوعأیأن، شفأعتأن، قدردأنیأن انجأم بٚبه،

² هطویم، پأدیشأیأن و صأب‌منصبأنٚ رِه، کی بتأنیم صولح و صفأ اَمرأ ایدأمه بٚدیم و هر چی میأن، خودا ترسی و لیأقتٚ اَمرأ زٚندیگی بوکونیم.

³ چونکی اَن اَمی نیجأت بٚدأ کس، خودا رِه خورم چی و قوبیل ایسه.

⁴ کی خأیه همٚتأن نیجأت بیأفٚد و حِئقتَ بٚشنأسٚد،

⁵ اَن حِئقته کی فقد ایتأ خودا ایسه و ایتأیم وأسطه خودا و اینسأن میأن، ینی عیسای مسیح کی اونم اینسأن بو

⁶ و خو جأنَ فأدأ کی همٚتأن آزأدَ بد. اَن هو پیغأم ایسه کی خودا ایتأ معلوم بوبوسته زمأتٚ دورون دونیأ آدمأنَ فأدأ

⁷ و من هنٚ وأسی اینتخأب بوبوستم کی غیرٚیهودیأنٚ رِه وأعیظ و روسول ببم و رأس‌رأسِی ایمأنَ اَشأنَ بأموجم. اَنَ کی گم حِئقت دأره و دورُغ نییٚه.

⁸ بأزون، خأیم کی مردکأن هر جأجیگأیی کی عیبأدت رِه جمَ بٚده جٚه غیظ و دعوأ آزأد بٚبٚد، خوشأن بألأنَ موقدس بوستن و تیمیزی دورون دوعأ رِه خودا ور رأستَ کونٚد.

⁹ هطویم خأیم کی زنأکأن خوشأن لیوأس دوکودن و بزک دوزک کودنٚ وأسی نجیب بٚبٚد. اوشأن وأستی مونأسبٚ لیوأس دوکونٚد و دیگرأنَ نیشأن دٚئنٚ وأسی نوأ اَجور کردکأرأنَ موتوٚسل بٚبٚد، مثلن سٚرٚ مویَ چأکون وأکون کودن، طلأ و مولوأری اَمرأ بزک کودن و بأ ارزشٚ لیوأسأنَ دوکودن.

¹⁰ بلکی خوروم کأرأنٚ وأسی دیگرأنٚ نومونه بٚبٚد، هچین او زنأکأنٚ مأنستَن کی ایدعأ کونٚده خوداپرست ایسٚد.

¹¹ زنأکأن وأستی بی سٚر و صدا و ایطأعتٚ کأمیل اَمرأ آموج بیگیرٚد.

¹² ایجأزه نٚدٚم زنأکأن چیزی‌یٚ مردکأنٚ بأموجد یا اوشأنَ موسلط بٚبٚد. زنأکأن وأستی سأکیت بئیسٚد.

¹³ اَنٚ دلیل اَنه کی خودا جٚه اوّل آدمَ بوجود بأوٚرده و بأزین حوأیَ.

¹⁴ و اَن آدم نوبو کی شیطانٚ جَا گول بوخورده بلکی زن گول بوخورده و گونأ بوجود بأمؤ.

¹⁵ ولی زنأکأن زأی بودونیأ اَوٚردٚن، ایمأن، محبت، موقدس و نجیب بوستنٚ اَمرأ، زٚندیگی بوکونٚد رستگأر بٚده.