اوّل تیموتائوس 1 - Gilaki New Testament

¹ اَ نأمه جٚه پولس ور ایسه، روسول و اونی کی عیسا مسیح، اوسه کوده کی اَمی نیجأت بٚدأ کس، اَمی خودا و خوداوند و اَمی اومید ینی عیسایٚ مسیحٚ، حوکمٚ اَمرأ اَ خیدمتٚ وأسی اینتخأب بوبوسته.

² اَ نأمه‌یَ می رأس‌رأسِی زأی ایمأن دورون، تیموتائوسٚ رِه نیویسٚم. جٚه اَمی پئر خودا و اَمی خوداوند عیسا مسیح تِرِه فیض و بخشش و آرأمٚش خأیم.

هوشدأر ایشتیوأ آموجه‌یأنٚ رِه

³ هوطو کی هو وخت کی مقدونیه شؤئؤندوبوم تی جَا بخأستٚم، بأزم تی جَا خأیم افسس میأن بئیسی و بعضیأنَ دستور بدی کی ایشتیوأ رأ روشٚ یأد ندٚد

⁴ یا اَنکی خوشأنَ اَلکی دأستأنأن و شجره نأمه‌یأنٚ اَمرأ موشغولَ نوکونٚد، چونکی اَ بحثأن جنگٚ دعوأ رأ تأوٚدِه، خودا کأرأنٚ پیش شؤئؤنٚ رِه‌یٚم ایستفأده نأرِه، کأری کی ایمأنٚ جَا انجأم بِه.

⁵ می منظور اَ حوکمٚ جَا اَنه کی ایمأندأرأن همٚتأن محبتٚ جَا پورَ بد، هو محبت کی جٚه ایتأ خوروم دیل و دوروستٚ فیکر و رأس‌رأسِی ایمأن ویریزه.

⁶ امّا اَ آدمأن، اصلن روحأنی چیزأن دیقت نوکونٚده و فقد اَلکی دعوأ دونبأل گردٚده؛

⁷ دوس دأرٚده شریعتٚ معلم بٚبٚد، اَسه نأنٚده کی چی وأسی گب زِئندٚرٚده و چی‌یَ ایطمینأنٚ اَمرأ وأگو کونٚده.

⁸ دوروسته کی شریعت و دینی حوکمأن خُبیدی، بٚشرطی کی هو رأ روشٚ دوروستی کی خودا خأیه انجأم بٚبه.

⁹ هوطو کی دأنیم قأنون و شریعت دورستکأر آدمأنٚ رِه چأکوده نوبوسته، بلکی اوشأنی رِه کی قأنونَ لقد دٚمٚج کونٚده، شورشی و شر‌ و شورٚ آدمأن، اوشأنی کی خودایَ نشنأسٚده، گونأکأرأن، آدمأنی کی موقدس نییٚده، اوشأنی کی دین نأرٚده و هطویم اوشأنی وأسی کی خوشأنٚ پئر و مأرَ کوشٚده و قتل کونٚده.

¹⁰ هطویه، شریعت او زٚنأکأرأن، همجینس‌بأزأن، اوشأنی کی غولأمأنَ فوروشده، دورُغگویأن، اوشأنی کی دأدگأیأنٚ میأنی دورُغ شهأدت دٚهٚده و تومأمٚ کسأنی شینم ایسه کی کردکأرأنی کونٚده کی دوروستٚ آموجٚه‌یأنٚ اَمرأ فرق کونٚه،

¹¹ آموجه‌یی کی موتٚبأرٚکٚ خودا پور جلالٚ اینجیلٚ مأنستَن ایسه و منم اونٚ وأگو کودنٚ رِه اینتخأب بوبوستم.

خودا فیض پولس رِه

¹² هنٚ وأسی، اَمی خوداوند عیسا مسیحَ شوکر کونم کی اَ خیدمتٚ رِه مٚرَه قودرت فأدأ و مٚرَه ایعتمأد بوکوده و اَ خیدمتٚ رِه اینتخأب بوکود.

¹³ بأ اَنکی جٚه قبل مسیحَ کوفر گفتیم، فوش و فلاکت دٚئیم و مسیحیأنَ اَذِت و آزأر دٚئنٚ وأسی دونبألَ کودیم ولی خودا مٚرَه رحم بوکوده، چونکی نأنستیم چی کودأندرم و هنو مسیحَ نشنأخته بوم.

¹⁴ چندر اَمی خوداوند دیلسوج و پور جٚه محبته! اون نیشأن بٚدأ چوطو اونَ ایمأن بأوٚرٚم و جٚه عیسا مسیحٚ محبت پورَ بٚم.

¹⁵ اَ گبَ وأستی ایعتمأد کودن و همٚتأن وأستی اونَ قوبیل بوکوند کی عیسای مسیح اَ دونیأ رِه بأمؤ کی گونأکأرأنَ نیجأت بٚده. من خودم پیله‌ترینٚ اَ گونأکأرأن ایسٚم.

¹⁶ ولی خودا مٚرَه رحم بوکوده کی اَطویی عیسا مسیح بتأنٚه مٚرَه ایتأ نیشأنه مأنستَن دیگرأن وأسی ایستفأده بوکونه و نیشأن بٚده کی حتّا ایتأ بدترینٚ گونأکأرأنٚ وأسییٚم صبر دأره کی البأقیم بفأمٚد کی تأنٚده همیشٚکی زٚندیگی بٚدأرٚد.

¹⁷ ایحترأم و جلال خودایی رِه سزأوأره کی تومأمٚ زمأتأنٚ پأدیشأ ایسه. اونَ نشأ دِئن و جٚه بین شؤئؤنی نییٚه. فقد، اون خودایه و اون کلّ دأنأییأن ایسٚه. آمین!

تیموتائوسٚ وظیفه‌یأن

¹⁸ هسأ می پٚسر، تیموتائوس، هو نوبوّت پیغأمأنٚ وأسی کی ویشتر اونٚ جَا تٚرَه وأخٚوٚرٚ کودم، تٚرَه سفأرش کونم کی اوشأنَ بٚخأطر اَوٚردٚنٚ اَمرأ، خوداوندٚ خورومٚ جنگ میأن خُب بٚجنگی.

¹⁹ ایمأنی‌یَ کی مسیحَ دأری قأیم دوچوک و تی ویجدأنَ تیمیز بٚدأر و اونی صدایَ بشتأو و انجأم بٚدٚن. چونکی بعضیأن خوشأن ویجدأنٚ صدایَ گوش نٚدٚده، کأرأنی بوکودٚده کی دأنستید دوروست نییٚه. هنٚ وأسی، بأزون ایپچه خودا اَمرأ موخألفت کودن، خوشأنٚ ایمأنَ کی مسیحَ دأرٚده جٚه دٚس بٚدأده.

²⁰ هیمینائوس و ایسکندر، دونه جٚه اَ آدمأن ایسٚد. اَشأنَ شیطان چنگٚ دورون سرأ دأم کی اَدب بٚبٚد و بأموجد کی دِه خودایَ کوفر نٚگد.