اوّل تسالونیکیان 5 - Gilaki New Testament

¹ شأید وأوٚرسید کی مسیح کویتأ زمأت وأگردِه. جأنٚ دیلٚ برأرأن لأزیم نییٚه هنٚ وأسی ایچی بینیویسٚم،

² چونکی شومأن خٚیلی خُب دأنیدی کی هیکس اونی وأگردٚستنٚ زمأتَ نأنِه. خوداوندٚ روج هچین ایتأ شب دوزدٚ مأنستَن، ایوأرکی اَیِه.

³ هو وخت کی مردوم گده: «همٚتأ جأجیگأیأن اَمن‌ و اَمأن ایسه»، ایدٚفأیی ایتأ پیله‌دأنه بلأ اوشأنَ فوتورکه، هوطو کی شکم‌دأرٚ زنأکَ درد گیره؛ بأزون اوشأنی جیویشتنٚ رِه رأیی نٚمأنه.

⁴ امّا جأنٚ دیلٚ برأرأن، شومأن او گونأ تأریکی و بی‌خٚوٚری میأن نئیسأیید کی خوداوندٚ روج وختی فأرٚسِه، غأفیلگیرَ بید، اونی مأنستَن کی دوزد اونَ فوتورک بٚزِه بی.

⁵ شومأن همٚتأن، نور و روجٚ زأکأن ایسید و تأریکی و شبٚ اَمرأ کأری نأریدی.

⁶ جٚه اَ خأطر، حأضیر بیبید و البأقی مأنستَن وأخأبَ نیشید. مسیح اَمؤنٚ رأفأ بئیسید و وأخب بیبید.

⁷ شب، خوفتن و مستی و خٚوٚر نأشتنٚ زمأت ایسه،

⁸ ولی اَمأن کی روجٚ روشنأیی میأن زٚندیگی کونیم، وأستی وأخبدأر بیبیم و ایمأن و محبتٚ زرهی لیوأسَ دوکونیم و نیجأتٚ اومیدَ ایتأ آهینی کولأ مأنستَن اَمی سٚر بٚنیم.

⁹ جٚه‌ خأطر نبریم کی خودا اَمٚرَه اینتخأب نوکوده کی خو غیظَ اَمی سٚر فوکونه، بلکی اینتخأب بوکوده کی اَمی خوداوند عیسا مسیحٚ اَمرأ، اَمٚرَه نیجأت بٚده.

¹⁰ اون خو جأنَ اَمی وأسی فأدأ کی اَمأن بتأنیم همیشٚک اونی اَمرأ زٚندیگی بوکونیم، چی اونی وأگردٚستنٚ زمأت زٚنده بیبیم، چی نیبیم.

¹¹ پس هطویم، کس‌کسَ تِشویق و بٚنأ کودنٚ وأسی ایدأمه بدید.

چنتأ دأنه خوروم اَندرز

¹² جأنٚ دیلٚ ایمأندأرأن، اوشأنی‌یَ کی خوداوندٚ کأرٚ میأن شیمی رهبرأن ایسٚد، موحترم بٚدأرید. اوشأن شیمی میأن خٚیلی حقٚ سعی زنٚده و شٚمٚره اَندرز کونٚده.

¹³ اوشأنَ، او زحمتأنٚ وأسی کی شِمِره کشٚده، شیمی تومأمٚ وجودٚ اَمرأ ایحترأم بنید و محبت بوکونید. هطویم کس‌کسٚ اَمرأ صولح و صفأ میأن سٚر بوکونید.

¹⁴ جأنٚ دیلٚ برأرأن، تنبل و شرورٚ آدمأنَ اَدب بوکونید؛ او آدمأن کی سٚربیجیر و ترسو ایسٚد، دیلدأری بدید؛ اوشأنی کی ضعیفده، یاور بیبید؛ همٚتأنٚ وأسی حوصله و تحمول بٚدأرید.

¹⁵ مورأقٚب بیبید کی بدی‌یَ، بدی اَمرأ تلأفی نوکونید، بلکی حقٚ سعی بٚزنید همیشٚک تومأمٚ مردومَ و کس‌کسَ خُبی بوکونید.

¹⁶ همیشٚک شأد بیبید!

¹⁷ دائیم دوعأ بوکونید!

¹⁸ هرتأ ایتفأقٚ وأسی خودایَ شوکر بوکونید، چونکی اَن خودا خأستِیه شِمِره کی عیسایٚ مسیح شین ایسید.

¹⁹ روحٚ آتشَ خأموشَ نوکونید.

²⁰ نوبوّتأن، ینی پیغأمأنی کی خودا ایمأندأرأنَ فأدِه، کوجه‌دأنه و بی‌ارزش ندأنید،

²¹ بلکی دیقتٚ اَمرأ اوشأنَ بشتأوید و اگه بفأمستید کی خودا ور ایسه، اوشأنَ قوبیل بوکونید.

²² خودتأنَ جٚه هرتأ بدی دؤر بٚدأرید.

پولسٚ آخری سلأمأن

²³ دوعأ کونم کی خودای آرأمٚش خودش، شٚمٚره پأکْ موقدس چأکونه. بٚبه کی شیمی روح و جأن و بٚدٚن تأ اَمی خوداوند عیسایٚ مسیح وأگردٚستنٚ روجٚ بی‌عأیب و قأیم بمأنه.

²⁴ هو خودایی کی شٚمٚره دؤخأده کی اونی زأکأن بیبید، خو وعده سٚر اَنٚم شِمِره انجأم دِهه.

²⁵ جأنٚ دیلٚ برأرأن، اَمِرِه دوعأ بوکونید.

²⁶ موقدسٚ مأچی اَمرأ تومأمٚ برأرأنَ سلأم بیگید.

²⁷ خوداوندٚ نأمٚ اَمرأ شیمی جَا خأیم کی اَ نأمه‌یَ همٚتأ ایمأندأرأن رِه بخأنید.

²⁸ اَمی خوداوند، عیسایٚ مسیحٚ فیض، شومأن همٚتأنٚ اَمرأ بٚبه.