اوّل تسالونیکیان 2 - Gilaki New Testament

پولسٚ خیدمت تسالونیکی میأن

¹ جأنٚ دیلٚ برأرأن و خأخورأن، شومأن خودتأن دأنیدی کی اَمی اَمؤن شیمی ورجأ چنقذر پور جٚه ایستفأده و موفید بو.

² وأخب ایسید کی پیشتر جٚه اَنکی بأییم شیمی ورجأ، فیلیپی شهرٚ میأن اینجیلٚ پیغأمٚ وأگویا کودنٚ وأسی چنقذر اَمی اَمرأ نأجورٚ کأرأن بوکودٚده و چندر اَذِت آزأر و زحمت بیدِییم. اَطویی بو کی، تومأمٚ اَ توندٚ موخألفتأنٚ اَمرأ، خودا اَمٚرَه دیل و جورأت فأدأ کی شوجأعتٚ اَمرأ، اینجیلٚ پیغأمَ شٚمٚره فأرٚسأنیم.

³ پس فأندرستأندرید کی اینجیلٚ پیغأمَ سأدگی و نیّتٚ پأکٚ اَمرأ شٚمٚره فأرٚسأنِییم نه ایتأ نأجورٚ فیکر و پٚلیدٚ هدفأنٚ اَمرأ.

⁴ رأس‌رأسِی، خودا اَمٚرَه ایعتمأد بوکوده کی هچین ایتأ جٚه اونٚ روسولأنٚ مأنستَن، اینجیلٚ حِئقتأنَ وأگویا بوکونیم. جٚه اَ خأطر هیذره‌یٚم خودا پیغأمَ عوضَ نوکونیم، حتّا اگه مردومٚ مذأقٚ رِه خوش نأیٚه؛ چونکی اَمأن هو خودا خیدمتکأریم کی تومأمٚ اَمی دیلٚ نیّتأنٚ جَا وأخٚوٚره.

⁵ خودتأن وأخب ایسید کی اَمأن هیوخت حقٚ سعی نٚزِئیم کی چرب زوأنی اَمرأ، شیمی فیکرَ اَمی ور فأکٚشأنیم؛ جٚه اَمی ایرتیبأط شیمی اَمرأیٚم مألی نفع بردنٚ وأسی ایستفأده نوکودیم، خودا خودش شأهید ایسه.

⁶ هطویم، نه شیمی جَا و نه هیکسٚ جَا ایحترأم نٚهنٚ رأفأ نئیسأییم، اگه چی کی هوطو مسیحٚ روسولأنٚ مأنستَن، اَ حقَّ شیمی گردن دأشتیم.

⁷ امّا نه اَنکی حتّا اَ حقٚ جَا ایستفأده نوکودیم، بلکی ایتأ مهرٚوأنٚ مأرٚ مأنستَن شیمی جَا مورأقبت بوکودیم.

⁸ اَمی علأقه و محبت شیمی وأسی اَنقد زیأد بو کی نه تنأ خودا پیغأمَ، بلکی خودمأنٚ جأنٚم شِمِره بنأئیم.

⁹ جأنٚ دیلٚ برأرأن، حتم خأطر دأریدی کی چی زحمتٚ اَمرأ شبندروج کأر کودیم و رزق و روزی وأسی عرق فوکودیم تأ او وختی کی خودا اینجیلٚ پیغأمَ شٚمٚره فأرٚسأنیم، هیکسٚ رِه سٚربأر نیبیم.

¹⁰ شومأن خودتأن شأهید ایسیدی و خودایٚم گووأ دِهه کی اَمی رفتأر شومأ هر ایتأ اَمرأ، پأک و بودونٚ عأیب و بی‌ریأ بو.

¹¹ لأبد شٚمٚره خأطر ایسه کی چوطو ایتأ پئرٚ مأنستَن کی خو زأکَ نصیحت کونه شیمی اَمرأ رفتأر کودیم.

¹² شیمی جَا خأهیش و تِشویق کودیم کی شیمی زٚندیگی و کردکأرأن خودا رِه شأیسته بٚبه، هو خودایی کی شیمی جَا بٚخأسته کی اونٚ جلال و ملکوتٚ دورون سأم بٚدأرید.

¹³ هنٚ وأسی خودایَ شوکر کونیم، او زمأتٚ وأسی کی خودا پیغأمَ قوبیل بوکودید همیشٚک، هو پیغأمَ کی اَمی جَا بشتأوستید، ایتأ اینسأنی گبٚ تصور نوکودید، بلکی اَمی گبأنَ خودا کلام مأنستَن قوبیل بوکودید کی هطویم ایسه. و اَ پیغأم هطویم شیمی میأن کی ایمأن دأریدی عمل کونِه

¹⁴ و بأزون، هو رنج و مرأرتی کی یوهودیه کیلیسایأن رِه کی در مسیحٚ عیسا ایسأد بأمؤ، شٚمٚره‌یٚم فوتورکست، چونکی شومأن جٚه خودتأنٚ همشهریأنٚ جَا هو اَذِت آزأر و ستمی‌یَ بیدِیید کی اَشأن جٚه خوشأنٚ یوهودی همشهریأن بیدِده.

¹⁵ جٚه اوشأنی کی پیشتر پیغمبرأن و حتّا خوداوند عیسایَ بوکوشتٚد؛ هسأ سنگ دیلی اَمرأ، اَمٚرَه اَذِت آزأر کونٚد. اوشأن هم خودا ضد ایسٚد و هم اینسأنٚ ضد

¹⁶ و حقٚ سعی زنٚده کی اَمی مأنع بٚبٚد خودا پیغأمَ اوشأنی کی یوهودی نییٚده فأرٚسأنیم کی نوکونه اوشأنٚم نیجأتَ بیأفٚد. جٚه اَ خأطر اَ قومٚ گونأیأن سٚر به سٚر جمَ بِه و آخرپٚسی خودا غیظ اَشأنٚ رو فوتورکه.

تیموتائوسٚ خٚوٚرأن کی اومید دِهه

¹⁷ جأنٚ دیلٚ برأرأن، بأزون ای چن وختی کی شیمی جَا دورَ بوستیم اگه چی اَمی دیلأن هیوخت شیمی جَا دورَ نوبوسته خٚیلی حقٚ سعی بٚزِئیم کی ایوأردِه شٚمٚره بیدینیم.

¹⁸ جٚه اَ خأطر خٚیلی دوس دأشتیم بأییم شیمی ورجأ و من، پولس، چن وأر حقٚ سعی بٚزِم بأیٚم، امّا شیطان ولأشته.

¹⁹ چونکی اَمی خوشألی و اومید و ایفتخأرٚ تأج، اَمی خوداوند، عیسا ورجأ اونی وأگردٚستنٚ زمأت، چیسه؟ آیا شومأن نیئید؟

²⁰ شومأن رأس‌رأسِی اَمی ایفتخأر و خوشألی ایسید.