اوّل قرنتیان 9 - Gilaki New Testament

خودا خیدمتگوزأرٚ حق و حقوق

¹ مگه البأقی آدمأنٚ مأنستَن، آزأد نییٚم؟ مگه روسول نییٚم؟ مگه اَمی خوداوند، عیسایَ نیدِم؟ مگه شومأن می کأرٚ مأصول در خوداوند نیئید؟

² حتّا اگه البأقیأن رِه روسول نٚبم، دٚسٚ‌کم شِمِره ایسٚم! چونکی شومأن در خوداوند می رسألتٚ تأییدٚ رِه مُهر ایسید.

³ می جوأب اوشأنٚ رِه کی مٚرَه قیضأوت کونٚده، اَن ایسه:

⁴ مگه اَمأن البأقی روسولأنٚ مأنستَن، اَ حقَّ نأریم کی اَمی خورد و خورأکَ جٚه کیلیسایأن فأگیریم؟

⁵ مگه حق نأریم اَمی اَمرأ ایتأ ایمأندارٚ همسر بٚدأریم، هو کأر کی اَمی خوداوند عیسا البأقی‌یٚ روسولأن و برأرأن، و پطرس انجأم دٚهٚده؟

⁶ مگه فقد من و برنابا وأستی اَمی ایحتیأجأنٚ رِه کأر بوکونیم؟

⁷ کویتأ سروأز ایسه کی وختٚ سروأزی خیدمت، خو خرجَ بیرون بأوٚره؟ یا کویتأ بأغبأن ایسه کی ایتأ دأرَ بکأره ولی اونَ ولأنٚد کی جٚه اونٚ مأصول بوخوره؟ یا کویتأ چوپأن ایسه کی ایتأ گلّه‌یَ بٚپأیه ولی حق ندأشته‌ بی کی جٚه اونٚ شیر وأخوره؟

⁸ بلکی فیکر بوکونید کی اَ ریزٚ گیریأنٚ جٚه اینسأنی فیکر گم. ولی اَطو نییٚه، چونکی خودا قأنونم هنَ گه.

⁹ موسا تورأتٚ میأن بینیویشته بوبوسته کی «او گأبٚ دٚهٚنَ کی خرمن کؤبستأندره، دنوٚد و بٚدأ کأرٚ وخت، جٚه تی خرمن بوخوره.» مگه فیکر کونیدی خودا فقد گأبأنٚ فیکر دوبو کی اَطو دستور بٚدأ؟

¹⁰ آیا فیکر نوکونیدی کی اَ فرمأنَ اَمِرِیٚم بٚدأ؟ هطویه، هطو ایسه. خودا اَ حوکمَ بٚدأ تأ نیشأن بٚدأ کی مسیحیأن وأستی خوشأنٚ روحأنی خیدمتگوزأرأنٚ خرجَ فأدٚد. اونی کی زیمینَ اورأنه و خرمن کؤبه، البت وأستی ایتأ سأم جٚه مأصول ببره.

¹¹ اَمأن شیمی دیلٚ دورون روحأنی خورومٚ دأنه‌یَ بکأشتیم. هسأ، اگه شیمی جَا بخأییم اَمٚرَه مألی کومک بوکونید مگه پیله‌ چی بٚخأستیم؟

¹² اگه البأقیأن حق دأرٚده کی جٚه شیمی ور مألی کومک فأگیرٚد، مگه اَمأن نوأستی ویشتر حق بٚدأریم؟ ولی اَمأن جٚه اَ حق ایستفأده نوکودیم. بلکی وأگردأنسر، همه چی‌یَ تحمول بوکودیم اَطو نٚبه کی ایتأ مأنع مسیح اینجیلٚ رأ سٚر بٚنیم.

¹³ مگه نأنیدی کی خودا خو خأنه خیدمتگوزأرأنَ وئأشته کی خوشأنٚ غذأیَ جٚه او پیشکشأن کی مردوم اونی خأنه میأن اَوٚرده تهیه بوکونٚد، و مذبح خیدمتگوزأرأنم مردومٚ قوربأنیأنٚ جَا ایتأ سأم ببرد.

¹⁴ هطویی بو کی، خوداوند بٚفرمأسته هر کی اینجیلٚ پیغأمَ وأگویا کونه، مسیحیأن وأستی اونی زٚندیگی خرجَ فأدٚد.

¹⁵ ولی تومأمٚ اَشأنٚ اَمرأ، من هیوخت می اَ حقٚ جَا ایستفأده نوکودم. اگه‌یٚم هسأ اَ موضو‌یَ نیویشتأندرم، می منظور اَن نییٚه کی جٚه اَنٚ پٚسی شیمی کومکأنٚ جَا بهره ببرم. من بِیتر دأنٚم کی جٚه ویشتأیی بیمیرٚم، ولی می اَ گولأزَ جٚه دٚس نٚدم؛ من گولأز کونم کی اینجیلٚ پیغأمَ بودونٚ موأجب وأگویا کونم.

¹⁶ چونکی اَ خیدمتٚ انجأم دٚئن، خؤرَه خؤرَه مِرِه ایتأ خُبی بٚحیسأب نأیِه، چونکی من وظیفه دأرم کی اَ خیدمتَ انجأم بدم، و اگه اونی انجأم دئنٚ میأن سوستی بوکونم، اَی وای بر من!

¹⁷ اگه من می میلٚ اَمرأ بٚخأسته بیم کی خودایَ خیدمت بوکونم، اوطویی موزد و موأجبٚم خأستیم. ولی اَطو نییٚه، چونکی خودا خودش، مٚرَه اینتخأب بوکوده و اَ موقدسٚ خیدمتَ مٚرَه بیسپأرده و من جٚه خودم هیذره ایختیأر نأرٚم.

¹⁸ اَجور وضع میأن، می موأجب چیسه؟ می موأجب، هو خوشألی ایسه کی جٚه اینجیلٚ خورومٚ خٚوٚرٚ وأگویا کودنٚ اَمرأ بٚدٚس اَوٚرم، اونم بودونٚ اَنکی جٚه هیکس مألی کومک فأگیرٚم و یا می حقَ بخأیٚم.

¹⁹ چونکی هرچن آزأد ایسٚم و هیکسٚ غولأم نییٚم، ولی مٚرَه همه کسٚ غولأم چأکودم کی بٚتأنم ویشتر آدم نفر مسیح رِه بٚدٚس بأوٚرٚم.

²⁰ وختی یوهودیأنٚ اَمرأ ایسأبوم، اوشأنٚ مأنستَن کردکأر کودیم کی یوهودیأنَ مسیح ور بأوٚرٚم. او وخت کی اوشأنٚ اَمرأ بوم کی یوهودٚ شریعتٚ شأگرد بود، منم شریعتٚ جیر زٚندیگی بوکودم. هرچن جٚه شریعتٚ پیروی نوکونم، ولی اَطو بوکودم تأ اوشأنی‌یَ کی شریعتٚ جیر ایسأده، مسیح ور بأوٚرٚم.

²¹ وختی اوشأنی اَمرأ ایسأم کی یوهودی نییٚد و جٚه یوهودٚ شریعتٚ پیروی نوکونٚده، منم بودونٚ او شریعتٚ زٚندیگی کونم، کی بٚتأنم اَشأنَ مسیح ور بأوٚرٚم. البت خودا شریعتَ نیدِبو نٚنم، چونکی جٚه مسیح شریعت ایطأعت کونم.

²² وختی اوشأنی کی سوست ایسٚده اَمرأیٚم زٚندیگی کونم، اوشأنی سوستی دورون شیریک بٚم کی ضعیفأنَ مسیح رِه بٚدٚس بأوٚرٚم. خولاصه، حقٚ سعی زنٚم کی هرتأنٚ اَمرأ ایجور ببم و هرتأ کأر بوکونم کی اَشأنٚ نیجأتَ بأعیث ببم.

²³ تومأمٚ اَ کأرأنَ انجأم دٚهٚم کی بٚتأنم اینجیلٚ پیغأمَ همه کسَ فأرسأنم و منم اونی برکتأنٚ میأن سأم بٚبرم.

²⁴ مگه نأنیدی کی ایتأ دووٚستٚن موسأبقه دورون، همه کس دووٚده ولی فقد اینفر جأیزه‌یَ بٚره؟ پس شومأنم اوطو بودووٚید کی بٚرنده بیبید!

²⁵ ورزشکأر اَنٚ وأسی کی موسأبقه رِه آمأده بٚبه، خٚیلی سختٚ تمرینأن انجأم دِهه کی ایتأ، جٚه بین شؤئؤنی تأج بٚدٚس بأوٚره، ولی اَمأن اَمٚرَه ایتأ سختٚ اینضبأط دورون نیهیم کی ایتأ اَبدی تأج بٚدٚس بأوریم.

²⁶ پس من دووٚم، ولی اینفرٚ مأنستَن کی هدف نأرِه نییٚم؛ و موشت زنٚم، ولی اینفرٚ مأنستَن کی هوایَ موشت پرأنه نییٚم.

²⁷ من ایتأ ورزشکأرٚ مأنستَن سختٚ تمرینأنٚ اَمرأ، می جأنَ حأضیرَ کونم، و اَندر اونی رِه سخت گیرم تأ او کأرَ کی وأستی بوکونه‌یَ انجأم بٚده، نه اونچی‌یَ کی خأیه. ترسٚم اگه اَطو نوکونم اَنٚ پٚسی کی البأقیأنَ موسأبقه رِه آمأده کودم، خودم آمأده نٚبم و جٚه شرکٚت موسأبقه میأن محروم بمأنٚم.