اوّل قرنتیان 8 - Gilaki New Testament

مولأحظه‌یٚ البأقیأنٚ حألٚ

¹ اونی پٚسی شومأن دروأره‌یٚ او گوشتٚ خوردن کی بُتأنٚ رِه قوربأنی به وأورسِئید. اَجور فیکر کی «اَمأن همٚتأن عأقیلٚ آدمأن ایسیم»، بأعیث بِه کی اینسأن خؤرَه پیله‌تر بیدینه و مغرور بٚبه. ولی اونچی کی کیلیسایَ روحأنی قوّت دِهه، محبت ایسه و دأنٚستٚن نییٚه.

² اینفر کی گومأن کونه همه چی‌یَ دأنه، رأس‌رأسِی هنو خٚیلی چیأنَ نأنِه.

³ ولی اینفر کی خودایَ دوس دأره، اونی ایسه کی خودا اونَ شنأسه.

⁴ هسأ اصلٚ موضو‌یَ وأگردیم. مگه دوروست ایسه او گوشتَ کی بُتأنٚ رِه قوربأنی بوبوسته، بوخوریم؟ همٚتأن دأنیم کی بُت، خودا نییٚه، چونکی فقد ایتأ خودا ایسأ و وٚست.

⁵ ای عیده جٚه مردوم عقیده دأرٚده کی خٚیلی خودایأن آسمأنٚ دورون و زیمینٚ سٚر ایسأد.

⁶ ولی اَمأن دأنیم کی فقد ایتأ خودا وجود دأره، ینی اَمی آسمأنی پئر کی همه چیأنَ چأکوده و اَمٚرَه‌یٚم بوجود بأوٚرده کی اونی شین بیبیم. هطویم دأنیمی کی فقد ایتأ آقأ و خوداوند وجود دأره، ینی عیسا مسیح، کی همه‌چی اونی دٚسٚ اَمرأ چأکوده بوبوسته و اَمی حیأت جٚه اون ایسه.

⁷ ولی همٚتأ ایمأندأرأن اَطوچی شنأختٚ جَا بهره نبرٚد. ایتأ عیده هطو اَ گومأنٚ اَمرأ عأدت بوکودٚد کی بُتأنٚ واقعی ایسٚد کی وختی ایتأ غذأیَ خورٚده کی بُتأنَ پیشکش بوبوسته، اونَ رأس‌رأسِی خودایأنٚ پرستٚش دأنٚده و اوشأنٚ سوستٚ ویجدأن نجستَ بِه.

⁸ ولی اَنَ بدأنید کی غذأ، اَمٚرَه خودایَ نیزدیکترَ نوکونه، چونکی اونی خوردنٚ اَمرأ بدترَ نیبیم، و اونی نوخوردن اَمرأ، بِیتر!

⁹ ولی بٚپأیید کی مبادأ شیمی آزأدی اَطوچی گوشتٚ خوردنٚ میأن، بأعیث بٚبه او مسیحیأن کی جٚه شومأن سوست‌تر ایسٚد لغزش بوخورد و جٚه رأ بٚدر بٚشٚد.

¹⁰ چونکی اگه اینفر خو سوستٚ ویجدأنٚ وأسی، قوربأنی گوشتٚ خوردنَ دوروست نأنِه، بیدینه کی شومأن شیمی او کأمیلٚ شنأختٚ اَمرأ کی دأریدی، بُتخأنه نهارخوری دورون نیشتِئید و اَطوچی گوشتی‌یَ خوردأندرید؛ مگه اونی دیلٚم نٚخأیه کی او غذأیَ کی بُتأنَ پیشکش بوبوسته بوخوره؟

¹¹ اَطویی بٚبه، شیمی دأنأیی او سوستٚ ایمأندأرٚ هلاکتٚ بأعیث بِه کی مسیح خو جأنَ اونی وأسی فٚدأ بوکوده.

¹² وختی ایمأندأرأنَ ایتأ کأرٚ رِه تِشویق کونیدی کی اونَ دوروست نأنٚده، شومأن تنأ دروأره‌یٚ اوشأنٚ نییٚه بلکی دروأره‌یٚ مسیحَم گونأ کونیدی.

¹³ پس اگه او گوشتٚ خوردن کی بُتٚ رِه قوربأنی بوبوسته، می برأرٚ گونأ کودنٚ بأعیث بِه، تأ عُمر دأرم جٚه اون نوخورم، نٚبه کی اونی لغزشٚ بأعیث ببم.