اوّل قرنتیان 7 - Gilaki New Testament

وأورس وُورس دروأره‌یٚ عروسی

¹ دروأره‌یٚ او موضویأن کی شیمی دسخطٚ میأن بینیویشته بید: هطویه، خُب ایسه کی مردأی زنأکٚ اَمرأ جینسی رأبطه ندأره.

² ولی اَنٚ وأسی کی جینسی فسق و فوجورأن اَمی دؤرٚور نٚهأ، بِیتر ایسه هرتأ مردأی خؤرَه ایتأ زن بیگیره و هرتأ زنأی، خؤرَه ایتأ مردأی اینتخأب بوکونه.

³ زنأک و مردأک وأستی خوشأنَ زنأشویی وظیفه‌یأنَ کس‌کسٚ رِه انجأم بٚدٚد.

⁴ ایتأ دوختر کی عروسی کونه، دِه خو جأنٚ ایختیأرَ تومأم و کمأل نأرِه، بلکی اونی مردأکٚم اونی سٚر حق دأره. هطویم مردأک خو جأنٚ سٚر تومأم و کمأل ایختیأر نأرِه، چونکی اونی زنأکٚم اونی سٚر حق دأره.

⁵ هنٚ وأسی، شومأن کی زن و مردیدی جٚه زنأشویی ایرتبأط کس‌کسٚ اَمرأ حذر نوکونید. مگه ایتأ چن وختٚ رِه و کس‌کسٚ سأزشٚ اَمرأ، کی بتأنید شٚمٚره روزه و عیبأدتٚ رِه وقف بوکونید. ولی اَ مودّتٚ پٚسی، ازسرنو زنأشویی عادی ایرتبأطَ شورو بوکونید، نٚبه کی شیمی نفسٚ رو حأکیم نوبوستنٚ وأسی شیطان شٚمٚره وسوسه میأن تأوٚده.

⁶ البت حوکم نوکودأندرم، بلکی اَ رأیٚ شیمی پأ ورجأ نٚهٚم کی چن وختٚ رِه جٚه جینسی ایرتبأط پرهیز بوکونید.

⁷ کأشکی همه کس بتأنسته بود می مأنستَن عزٚب بئیسٚد. ولی هرتأن جٚه خودا ور ایتأ بوخصوص عطأ دأره. اینفر اَ عطأیَ دأره و اینفر دِه اویتأ عطأیَ.

⁸ هسأ، عزٚبٚ آدمأن و ویوه زنأکأنَ گم: بِیتر ایسه می مأنستَن عزٚب بئیسٚد.

⁹ ولی اگه نٚتأنٚده خوشأنٚ نفسٚ سٚر بأش بٚبٚد، عروسی بوکوند بِیتر ایسه، چونکی عروسی کودن، جٚه شهوتٚ آتش میأن سوختن بِیتر ایسه.

¹⁰ ولی اوشأنی رِه کی عروسی بوکودٚد ایتأ حوکم دأرم، ایتأ حوکم کی جٚه می ور نییٚه بلکی خوداوند اونَ بٚفرمأسته؛ و اونم اَن ایسه کی زنأی نوأستی جٚه خو مردأی سیوأ بٚبه.

¹¹ ولی اگه پیشتر اونی جَا سیوأ بوبوسته، بِیتر ایسه یا عزٚب بئیسه، یا خو مردأکٚ ورجأ وأگرده. مردأکٚم نوأستی خو زنأکَ طلأقَ ده.

¹² هسأ خأیم چنتأ موضو‌یَ وأگویا بوکونم کی هرچن موستقیم جٚه خودا ور نییٚد، ولی فیکر کونم کی خٚیلی بٚکأر بأیٚد. اگه ایتأ مسیحی مردأی، ایتأ زنأی دأره کی مسیحی نییٚه، و او زنأی خأیه اونی اَمرأ زٚندیگی بوکونه، نوأستی خو زنأکَ طلأقَ ده.

¹³ هطویم اگه ایتأ مسیحی زنأکٚ مردأی، مسیحی نییٚه و اونی مرد جٚه اون خأیه کی اونی اَمرأ زٚندیگی بوکونه، او زنأی نوأستی جٚه خو مرد سیوأ وأبٚه.

¹⁴ چونکی بی‌ایمأنٚ مردأی جٚه رأیٚ خو زنأی تقدیس بوبوسته ایسه، و بی‌ایمأنٚ زنأکٚم جٚه رأی خو ایمأندارٚ مردأی تقدیس بوبوسته ایسه. اَطو نٚبه، اَشأنی زأکأن نأپأک بیدی، ولی اَطو کی دئندریم، اَشأن موقدس ایسٚد.

¹⁵ ولی اگه بی‌ایمأنٚ مردأی یا زنأی بٚخأیٚه جٚه خو ایمأندارٚ همسر سیوأ بٚبه، وئألید سیوأ بٚبه. اَطویی، ایمأندأرٚ زنأی یا مردأکٚ دٚسٚ پأ دٚوٚسته نییٚه. خودا اَمٚرَه دؤخأده کی سأزش اَمرأ زٚندیگی بوکونیم.

¹⁶ دویُم اَنکی، شومأن ایمأندأرٚ زنأکأن نتأنید ایطمینأن بٚدأرید کی اگه شیمی مردأکأن شیمی اَمرأ بئیسٚد، نیجأت یأفده. هطویم شومأن ایمأندأر مردأکأنٚم نتأنید جٚه شیمی زنأکأن اَطوچی ایطمینأن بٚدأرید.

¹⁷ هر جور بٚبه، هرتأ جٚه شومأن اوجور زٚندیگی بوکونید کی یقین بٚدأرید اوطو کی خودا خأیه کردکأر کودأندرید. او جأ مکأن کی خودا شٚمٚره اونی دورون بٚنأیَ، قوبیل بوکونید. اَن می حوکم ایسه تومأمٚ کیلیسایأنٚ رِه.

¹⁸ مٚثٚل بأوٚرٚم، ایتأ مردأی پیشتر جٚه اَنکی مسیحی بٚبه، یوهودٚ رسم موطأبٚق ختنه بوبوسته ایسه، جٚه اَ موضو نوأستی غورصه بٚدأره؛ و اگه ختنه نوبوسته ایسه، هسأ نوأستی ختنه بٚبه.

¹⁹ چونکی هیذره فرق نأرِه کی ختنه بوبوسته یا نوبوسته بٚبه. موهیم، خودایَ خوشأل کودن و اونی حوکمأنٚ جَا ایطأعت کودن ایسه.

²⁰ هرتأ جٚه شومأن او وخت کی خودا شٚمٚره دؤخأده چی حأل و هوا دورون ایسأبید؟ پس اَسأیٚم هو حألٚ دورون بئیسید.

²¹ اگه او زمأتٚ دورون غولأم بید، اَ موضو جَا غورصه‌دأر نیبید. البت اگه ایتأ فورصت آزأدی رِه پیش بأمؤ جٚه اون ایستفأده بوکونید.

²² اگه او وخت کی خوداوند دؤخأده، غولأم بید، اَنَ بدأنید کی مسیح شٚمٚره آزأدَ کوده، آزأد جٚه گونأ قودرت! و اگه او وخت کی خوداوند دؤخأده، غولأم نیبید، بدأنید کی هسأ مسیح غولأم ایسید.

²³ مسیح شٚمٚره خو جأنٚ قیمتٚ اَمرأ بیهه و شومأن اونی شین ایسید. پس، اینسأنی اوصولٚ اسیر نیبید!

²⁴ هنٚ وأسی، اَی جأن و دیلٚ برأرأن و خأخورأن، هرتأن جٚه شومأن او وخت کی دؤخأده بوبوستید هرجور کی بید، هو حأل و هوا دورون خودا حوضورٚ دورون بئیسید.

²⁵ وأوٚرسِه بید او کؤرأن کی هنو عروسی نوکودٚد، چی بوکوند؟ ایجأزه دأرٚد کی عروسی بوکوند؟ من اوشأنٚ رِه بوخصوص حوکم جٚه خوداوند ور نأرٚم. ولی چونکی خوداوند جٚه لوطفٚ سٚر، مٚرَه ایتأ قأبیلٚ ایعتمأدٚ حیکمت عطأ بوکوده، می فیکرَ اَ موضو رِه وأگویا کونم:

²⁶ اَنٚ وأسی کی موشکلأن و سختیأن اَمأن ایمأندأرأنٚ رِه اَ زمأتٚ دورون نٚهأ، فیکر کونم بِیتر ایسه کی آدم عروسی نوکونه.

²⁷ البت اگه همسر دأریدی، اَ موضو وأسی، اونی جَا سیوأ نیبید، ولی اگه همسر نأریدی، بِیتر ایسه کی عروسی نوکونید.

²⁸ ولی اگه شومأن برأرأن، تصمیم بیگیفتید هه حألٚ میأنم عروسی بوکونید، ایشکأل نأرِه، و اگه ایتأ کؤرٚم بٚخأسته عروسی بوکونه، گونأ نوکوده. ولی بدأنید کی عروسی کودن، شیمی موشکلأنَ ویشترَ کونه، و می دیل نٚخأیه کی شٚمٚره موشکلأنٚ میأن بیدینٚم.

²⁹ وأستی خأطر بٚدأریم کی خودا کأرَ انجأم دئنٚ رِه فورصت خٚیلی کم نٚهأ. هنٚ وأسی، اوشأنی کی زن دأرٚده، وأستی تأ اویَه کی ایمکأن دأره، خوداوندٚ کأرٚ رِه آزأد بٚبٚد.

³⁰ غورصه یا خوشألی یا مأل و مینأل، نوأستی اینفرَ خوداوندٚ خیدمتٚ رِه مأنع بٚبه.

³¹ اوشأنی کی دونیأ مأل و مینألٚ دأرٚده، اوطو زٚندیگی بوکوند کی اَ دونیأیَ دیل دٚنٚودد، چونکی اَ دونیأ اَ جور نٚمأنه و اَندر زمأت نیبه کی جٚه بین شِه.

³² من خأیم کی شومأن همه چی دورون جٚه ایضطرأب و دیلوأپسی سیوأ بیبید. ایتأ مردأی کی عروسی نوکوده، تأنه تومأمٚ خو وختَ خوداوندٚ خیدمتٚ رِه بٚنه و اونی تومأمٚ فیکر اَن بٚبه کی اونَ خوشألَ کونه.

³³ ولی ایتأ مردأی کی عروسی بوکوده، نتأنه خٚیلی رأحت خوداوندَ خیدمت بوکونه، چونکی وأدأر بِه دخل و خٚرجٚ فیکرم بٚبه و حقٚ سعی بٚزٚنه خو زنأکٚ رأضی بٚدأره.

³⁴ رأس‌رأسِی اونی عشق و علأقه، خودا و اونی زنأکٚ میأن سأم به. هطویم ایتأ زنأی کی دِه مرد نأرِه و یا هنو عروسی نوکوده، تأنه خوداوندٚ کأرأنٚ فیکر بٚبه و اَنکی چوطو جیسم و روح میأن موقدس بمأنه. ولی ایتأ زنأی کی مرد دأره وأستی خأنه کأرأنَ فیکر بٚبه و بیدینه اونَ مردأی چی خأیه.

³⁵ من اَ موضو‌یَ گم کی شٚمٚره کومک بوکونم و می منظور اَن نییٚه کی شیمی دٚس و پأیَ دٚوٚدٚم. می آروزو اَن ایسه کی شأیستگی اَمرأ زٚندیگی بوکونید و هیچی شیمی مأنع نٚبه کی جٚه خوداوند ایطأعت بوکونید.

³⁶ اگه اینفر دینه کی او کؤر کی اونی نیشأن بوکوده ایسه جَا، نتأنه دؤر بئیسه و نتأنه خو نفسٚ سٚر بأش بٚبه و اونی نیشأن بوکوده‌یٚم پیلّه بوسته و خأیه اَ کؤرٚ اَمرأ عروسی بوکونه، هیذره گونأ نوکوده. ایشکأل نأرِه؛ وئألید عروسی بوکونه.

³⁷ ولی اگه اینفر ایتأ قأیمٚ ایرأده اَمرأ تصمیم بیگیفته کی عروسی نوکونه، و دینه کی نٚخأیه اَ کأرَ بوکونه و اونَ نیأز نأرِه، ایتأ عأقیلأنه تصمیم بیگیفته.

³⁸ پس اینفر کی عروسی کونه، خورومٚ کأر کونه، و اینفر کی عروسی نوکونه، بِیترٚ کأرَ کونه.

³⁹ زنأی تأ او وخت کی اونی مردأی زٚنده ایسه، اونٚ اَمرأ دٚوٚسته ایسه. ولی اگه اونی مردأی جٚه دونیأ بشه، تأنه ایوأردِه عروسی بوکونه، ولی فقد ایتأ ایمأندارٚ اَمرأ.

⁴⁰ ولی می نظر اَنه کی عروسی نوکونه بِیتر ایسه. و فیکر کونم کی اونچی کی گم، جٚه خودا روح ور ایسه.