اوّل قرنتیان 5 - Gilaki New Testament

خطأکأرٚ عضوٚ کیلیسا جَا بیرون تأوٚدأن

¹ رأس‌رأسِی، مٚرَه خٚوٚر بٚدأده کی شیمی میأن جینسی فسق و فوجور نٚهأ، اونم اوجور کی حتّا خودا نشنأسأنم اونَ تحمول نوکونٚده! بشتأوستم کی اینفر کی شیمی کیلیسا شینه، خو پئرٚ زنٚ اَمرأ جینسی مورأوٚده دأره.

² ولی شومأن اَنٚ عوض کی غورصه بوخورید، گولأز کونیدی! مگه نوأستی اونی کی اَجور کأر کودی جٚه شیمی میأن سرأدید؟

³ هرچن کی جیسم اَمرأ شیمی ورجأ نئیسأم، ولی در روح شیمی اَمرأ ایسأم. و اینفرٚ مأنستَن کی اَطو شیمی میأن ایسأ، اونی کی اَ کأرٚ بوکوده رِه، جٚه پیشتر اَمی خوداوند عیسا نأمٚ اَمرأ، حوکم بوکودم.

⁴ اَطویی، وختی کس‌کسٚ اَمرأ جمَ بیدی، من در روح شیمی اَمرأ ایسٚم، و اَمی خوداوند عیسا قودرتم، حوضور دأره.

⁵ بأزون، اَ مردأکَ کیلیسا جَا بیرون تأوٚدید و اونی جیسمٚ جٚه بین شؤئؤنٚ وأسی اونَ شیطان دٚس بیسپأرید، بلکی‌یٚم وختی اَمی خوداوند عیسا وأگرده، اونی روح نیجأت بیأفه.

⁶ شیمی گولأز کودن دوروست نییٚه. مگه نأنیدی کی اَ گونأ ایپچه خمیرمأیه مأنه کی تومأمٚ خمیرَ وأجؤر اَوٚره؟

⁷ پس اَ شرورٚ مردأکٚ بیرونَ کودنٚ اَمرأ جٚه شیمی میأن، شٚمٚره جٚه کُئنه خمیرمأیه خلأصَ کونید. او وخت ایتأ تأزه و فطیرٚ خمیرٚ مأنستَن بیدی، کی رأس‌رأسِی هطویم ایسید. چونکی مسیح کی اَمی پِسَحٚ عَید بٚرّه ایسه، قوربأنی بوبوسته.

⁸ پس، بأیید اَ عَیدَ بٚپأ بوکونیم، نه ایتأ کُئنه نأن اَمرأ کی بدٚ فیکرأن و شرورٚ کأرأنٚ خمیرمأیه اَمرأ چأکوده بوبوسته، بلکی نأنٚ فطیرٚ و بودونٚ خمیرمأیه، کی رأس‌رأسِی هو صدأقت و دوروستی ایسه!

⁹ پیشترٚ دسخطٚ دورون بینیویشتم کی بی‌آبرو آدمأنٚ اَمرأ شؤئؤن اَمؤن نوکونید.

¹⁰ البت می منظور جٚه بدنأمٚ آدمأن، بی‌ایمأنأن نییٚد کی زٚنأکأری، طمع، مردومٚ گول زِئن و بُتٚ پرستٚش کودنٚ میأن زٚندیگی کونٚده. چونکی نتأنید اَ دونیأ دورون زٚندیگی بوکونید و اَطوچی آدمأنٚ اَمرأ شؤئؤن اَمؤن ندأرید.

¹¹ بلکی می منظور اَن بو کی اگه اینفر ایدعأ کونه کی شیمی مسیحی برأر ایسه ولی هطویم زٚنأکأر، طمعکأر، بدزٚوأن، بُت‌پرست، شرأب‌خور و یا شیّأد ایسه، اونی اَمرأ شؤئؤن اَمؤن نوکونید. اَطو چی آدمٚ اَمرأ حتّا ایتأ سٚفره سٚرم نینیشینید.

¹² کیلیسا بیرونٚ آدمأنٚ قیضأوت و دأوری کودن اَمی وظیفه نییٚه. ولی اوشأنی رِه کی کیلیسا دورون ایسأده و اوشأنٚ زٚندیگی گونأ اَمرأ ایتأ بوبوسته اَمی وظیفه ایسه کی توندی اَمرأ اوشأنی جولو بئیسیم و اوشأنی سٚر دأوری بوکونیم.

¹³ خودا اوشأنی کی بیرون جٚه کیلیسا ایسأده‌یَ دأوری کونه و جزأ دِهه. هنٚ وأسی، هوطو کی بینیویشته بوبوسته، وأستی «اَ نأجورٚ آدمَ جٚه شیمی میأن بیرون تأوٚدید.»