اوّل قرنتیان 3 - Gilaki New Testamentتأزه بودونیأ بأمؤ مسیحیأن و پیله مسیحیأن 1 جأن و دیلٚ برأرأن و خأخورأن، تأ هسأ من نتأنستٚم شیمی اَمرأ روحأنی آدمأنٚ مأنستَن گب بٚزٚنم، چونکی شومأن جیسمٚ شین ایسید و هنو در مسیح پیلّه نوبوستید. 2 وأدأر بوبوستم سنگینَ غذأ عوض، شٚمٚره شیر بدم، چونکی نتأنستید اونَ هضم بوکونید. حتّا هسأیٚم وأستی شٚمٚره شیر فأدأن، 3 چونکی هنو جٚه شیمی ذأت کی گونأ اَمرأ ایتأ بوبوسته ایطأعت کونیدی. شومأن کس‌کسٚ اَمرأ حسودی کونیدی و شیمی میأن دودستگی و دوشمنی نٚهأ. هن نیشأن نٚده کی هنو زأی ایسید و آدمأنی کی دونیأ شینٚده مأنستَن کردکأر کونیدی؟ 4 مثأل بأوٚرٚم، هسأ شیمی دعوأ اَنٚ سٚر ایسه کی «پولس» پیله‌تره یا «اَپلس»، و اَطویی کیلیسا میأن دودستگی‌یَ بأعیث بیدی. مگه هن نیشأن نٚده کی روحأنی زٚندیگی میأن، چندر کم روشد بوکودید؟ 5 من کیسٚم، و یا اَپلس کیسه کی اَمی وأسی بوگو موگو و دعوأ کونیدی؟ شیمی اَ کأرٚ جَا حیرأن ایسٚم. چونکی اَمأن فقد خودا خیدمتگوزأرأنیم و هرتأ جٚه اَمأن ایتأ بوخصوص عطأ و خیدمت دأریم، و شومأن اَمی کومکٚ اَمرأ مسیحَ ایمأن بأوٚردید. 6 می خیدمت اَن بو کی خودا کلامٚ دأنه‌یَ شیمی دیلأنٚ دورون بکأرم، و اَپلسٚ خیدمت اَن بو کی اونَ آب بٚده. ولی اَن خودا بو کی شیمی دیلأنٚ دورون اونی روشدَ بأعیث بوبوسته. 7 موهیم نییٚه کیسه کی کأرِه، یا کی آب فوکونه اونٚ جیر. موهیم، خودا کأر ایسه کی روشد کودنٚ بأعیث بِه. 8 اَپلس و می میأن فرق ننأ و هرتأن او زحمتٚ رِه کی بٚکشِییم، پأدأش فأگیریم. 9 اَمأن فقد خودا همکأرأن ایسیم؛ و شومأن خودا کیشأورزی زیمین ایسید، نه اَمی کیشأورزی زیمین؛ شومأن خودا عیمأرت ایسید نه اَمی عیمأرت. عیمأرت، خودا پأکأرٚ سٚر 10 او فیضٚ وأسی کی خودا مٚرَه عطأ بوکوده، ایتأ عأقیل و اوستأکأرٚ میعمأرٚ مأنستَن، عیمأرتٚ پأکأرَ بنأم. و هسأ، اینفر دِه اونٚ سٚر ایتأ عیمأرت چأکونِه. ولی هر کی اَ پأکأرٚ سٚر، ایتأ عیمأرت چأکونِه، وأستی خٚیلی خؤرَه بٚپأیه. 11 چونکی هیکس نتأنه ایتأ دِه قأیمٚ پأکأر چأکونٚه، جغرز اونکی جٚه پیشتر دأشتیم و او پأکأر، عیسا مسیح ایسه. 12 ولی اَ یکتأ پأکأرٚ سٚر، شأ ایتأ عیمأرت جوروأجورٚ مصألحٚ اَمرأ بٚنأ کودن. ایتأ عیده، عیمأرتَ طلأ و نقره و جوأهیرأنٚ اَمرأ چأکونده و ایتأ عیده دِه چو و خوشکٚ علف و کولوش اَمرأ! 13 ولی ایوخت فأرٚسِه، ینی هو روج کی مسیح همٚتأیَ دأوری کونه، کی هرتأ میعمأرٚ کأر آزمأیش بِه کی معلوم بٚبه چوجور مصألح اَمرأ عیمأرتَ چأکوده. هرتأنٚ کأر جٚه آتش رٚدَ بِه کی اونٚ ارزش و ایصألت معلوم بٚبه. 14 او میعمأر پأدأش فأگیره کی او پأکأرٚ سٚر ایتأ عیمأرت، خورومٚ مصألح اَمرأ بسأخته بی و اونی کأرأنٚ آخرپٚسی سأق و سألیم آزمأیشٚ جَا بیرون بأیٚه. 15 ولی اگه او عیمأرت کی چأکوده بی، بوسوجه، ایتأ پیله ضرر کونه. هرچن اون نیجأت یأفه، ولی اینفرٚ مأنه کی جٚه آتشٚ شوأله‌یأنٚ میأن جیویشته. 16 مگه هنو نفأمستید کی شومأن همٚتأن کس‌کسٚ اَمرأ، معبد ایسید و خودا روح شیمی میأن، ینی اَ خأنه دورون ایسأ. 17 اگه اینفر معبدَ نجست و خرأبَ کونه، خودا اونَ جٚه بین بٚره. چونکی معبد، موقدس و پأک ایسه، و او معبد شومأن ایسید. 18 دِه شٚمٚره گول نزنید. اگه اَ دونیأ معیأرأنٚ موطأبٚق، شٚمٚره عأقیل و دأنأ دأنیدی، اوّل وأستی نأدأن بیبید کی بتأنید رأس‌رأسِی حکیم بیبید، 19 چونکی اَ دونیأ حیکمت، خودا چومٚ دورون تومأم نأدأنی مأنستَن ایسه. هوطو کی موقدسٚ کیتأبأنٚ دورون بینیویشته بوبوسته کی «عأقیلأنَ خوشأنی موزی گیری فند و فیج دورون بٚدأم تأوٚدِه.» 20 و ایوأردِه فٚرمأیه: «خوداوند جٚه عأقیلأنٚ فیکرأن وأخبدأره و دأنه کی اوشأن پوچٚد و ارزش نأرٚد.» 21 پس، هیکس جٚه شومأن اَنٚ وأسی گولأز نوکونٚه کی فلأنی و فلأن مکتبٚ رأیَ دونبأل کونِه. بدأنید کی خودا همه چی‌یَ شیمی دٚسٚ دورون بٚنأ. 22 پولس، اَپلس، پطرس، دونیأ، زٚندیگی، مٚردن، هسأ و دونبألتر؛ همه و همه شیمی شین ایسٚد. 23 و شومأن مسیح شین و مسیح خودا شین ایسه. |
© 2024 Transform Iran
Transform Iran