اوّل قرنتیان 16 - Gilaki New Testament

مسیحیأنٚ اورشلیمٚ رِه، پیشکش جمَ کودن

¹ ولی دروأره‌یٚ او پیشکشأن کی شیمی دیل خأیه اورشلیمٚ مسیحیأنٚ رِه اوسه کونید، تأنیدی اَطو بوکونید (هه رأیَ غلاطیه شهرأنٚ کیلیسایأنٚ پأ ورجأیٚم بنأم):

² هر هفته اوّلی روجٚ میأن ینی یکشنبه، هرتأن جٚه شومأن هرچی دخل بدأشتید، ایپچه پول اَ کأرٚ رِه کنأر بنید. اَ پولأنٚ جمَ کودنٚ وأسی می اَمؤنٚ رأفأ نئیسید.

³ وختی بأمؤم، شیمی پورمحبت پیشکشأنَ ایتأ دسخطٚ اَمرأ، اوشأنی‌یَ کی شومأن ایعتمأد دأریدی و موشخص بوکودیدی دٚس اَمرأ، اوسه کونم اورشلیم.

⁴ اگه صلاح بٚبه کی منم بشم اَشأنٚ اَمرأ، شٚم.

پولسٚ نقشه‌یأن

⁵ من اوّل شٚم مقدونیه، ولی اویَه خٚیلی نئیسٚم. بأزون اَیٚم شیمی دِئنٚ رِه.

⁶ ایحتمأل دأره بٚتأنم ایپچه ویشتر شیمی ورجأ بئیسم، بلکی تومأمٚ زمستأنَ. او وخت شیمی کومکٚ اَمرأ می مسأفرتَ ایدأمه دٚهٚم.

⁷ چونکی اَیدفه نخأیٚم فقد رأ سٚر شٚمٚره بیدینٚم، بلکی خوداوندٚ ایرأده اَمرأ خأیم ای مودّت شیمی ورجأ بئیسم.

⁸ ولی تأ پنتیکأستٚ عَیدٚ وخت اَیَه ینی «اَفسس» میأن ایسٚم،

⁹ چونکی پیغأمٚ اینجیلٚ آموج دٚئن و وأگویا کودنٚ رِه ایتأ خورومٚ فورصت نٚهأ، اگه چی موخألفأنٚ آدم نفرأنم کم نییٚد.

¹⁰ هر وخت «تیموتائوس» بأیٚه شیمی ورجأ، مهرٚوأنی اَمرأ جٚه اون پذیرأیی بوکونید، چونکی اونم می مأنستَن خوداوندٚ خیدمتَ کونه.

¹¹ ولأنید هیکس اونَ خأر و خفیف فأندٚره، بلکی اونَ بٚسلأمت اوسه کونید کی دیلگرمی اَمرأ وأگرده می ورجأ، چونکی اون و البأقی برأرأنَ رأفأ ایسأم.

¹² جٚه اَپلس خأهیش بوکودم کی اَشأنٚ اَمرأ شیمی دِئنٚ رِه بأیٚه، ولی اونی نظر اَنه کی خودا نٚخأیه کی اَسه بأیٚه. ولی هر وخت فورصت بٚدأره، اَیِه.

¹³ وأخب بیبید؛ ایمأنٚ میأن قأیم بئیسید؛ شوجأع و قوی بیبید.

¹⁴ شیمی کأرأن، همه محبتٚ اَمرأ بٚبه.

¹⁵ استیفانُس و اونی خأنوأرَ حتم خأطر دأریدی. اَشأن اوّلی نفرأن بود کی یونأنٚ میأن مسیحی بوبوستٚد، و خوشأنٚ زٚندیگی‌یَ مسیحیأنٚ کومک و خیدمتٚ رِه بٚنأد. خأهیش کونم

¹⁶ اَشأنٚ رأنمأییأنَ بجأ بأوٚرید، و اوشأنَ و تومأمٚ اوشأنی کی اَجور صمیمیتٚ اَمرأ شیمی ورجأ زحمت کشٚده، تأ اویَه کی تأنیدی کومک بوکونید.

¹⁷ خٚیلی خوشألم کی استیفانُس، فرتوناتوس و اخائیکوس می دِئنٚ رِه بأمؤده اَیَه. اَشأن شیمی خألی جیگأیَ پورَ کونٚده و شیمی عوض مٚرَه کومک کونٚده.

¹⁸ اوشأن می شأدی و دیلگرمی بأعیث بوبوستٚده و من یقین دأرم کی شِمِره‌یٚم هطو بود. اومید دأرم کی اَجور آدمأنٚ زحمتأنٚ قدرٚ بدأنید.

سلأمأن

¹⁹ آسیا کیلیسایأن گرمٚ سلأمأن اوسه کونٚده. آکیلا و اونی زنأی پریسکیلا و هطویم البأقی اوشأن کی اَشأنٚ خأنه دورون عیبأدتٚ رِه جمَ بٚده، شٚمٚره سلأم رٚسأنده.

²⁰ اَیَه، تومأمٚ ریفِقأن می جَا بٚخأستده کی اَشأنٚ دورودأنَ شٚمٚره فأرسأنم. ایتأ موقدس مأچی اَمرأ کس‌کسَ سلأم بیگید.

²¹ من، پولس، اَ دورودأنَ می دسخطٚ اَمرأ نیویسٚم.

²² اگه اینفر خوداوندَ دوس نأرِه، اونٚ سٚر لعنت بأیِه! اَی خوداوند مسیح، بیأ!

²³ اَمی خوداوند عیسا فیض شیمی اَمرأ بٚبه.

²⁴ شومأن همٚتأن کی عیسا مسیح شین ایسید، می قلبی محبتأنٚ قوبیل بوکونید. آمین.