اوّل قرنتیان 15 - Gilaki New Testamentمسیح رستأخیز جٚه مورده‌یأن 1 هسأ، اَی برأرأن و خأخورأن، وئألید ایوأر دِه او اینجیلَ شِمِره خأطر بأوٚرٚم، هو خوروم خٚوٚرَ کی پیشتر شٚمٚره وأگویا بوکودم و شومأنم اونَ قوبیل بوکودید و هنویٚم اونی سٚر قأیم ایسأیید. 2 هه خوروم خٚوٚر ایسه کی اگه اونَ ایمأن بٚدأرید، شیمی نیجأتٚ بأعیث بِه، مگه اَنکی شیمی ایمأن رأس‌رأسِی نٚبه. 3 اونچی کی موهیمٚ موضو بو و مٚرَه فأرٚسِه بو، شٚمٚره بیسپأردٚم، ینی اَ حِئقتأنَ کی مسیح، موقدسٚ کیتأبأنٚ نیویشته‌یأنٚ موطأبٚق، خو جأنَ اَمی گونأیأنٚ آمؤرزئنٚ رأ دورون فٚدأ بوکوده و بٚمٚرد، 4 قبر میأن بٚنأ بوبوسته و هه کیتأبأنٚ موطأبٚق سیومی روجٚ میأن زٚنده بوسته و جٚه قبر بیرون بأمؤ. 5 بأزون، پطرس و اونی پٚسی، البأقی او دوأزده‌تأ روسول اونَ بیدِده. 6 بأزون اون ویشتر جٚه پونصد نفر جٚه اَمی برأرأنٚ رِه خؤرَه ظأهیر بوکوده، کی خٚیلی جٚه اَشأن هنو زٚنده ایسٚد و ای عیده‌یٚم بٚمٚردٚد. 7 اونی پٚسی، یعقوب و همٚتأ روسولأن اونَ بیدِده. 8 جٚه همٚتأنٚ پٚسی، منم اونَ بیدِم. رأس‌رأسِی، ایتأ زأکٚ مأنستَن بوم کی پیشتر جٚه خو وخت بودونیأ بأمؤ، 9 چونکی من جٚه تومأمٚ روسولأن کوجه‌تر ایسٚم، چونکی او بلأیأنٚ پٚسی کی خودا کیلیسا سٚر بأوٚردٚم، حتّا لیأقت نأرٚم می نأمَ روسول بنم. 10 ولی اَسه هرچی کی ایسٚم، خودا فیضٚ وأسی ایسه، و اَ فیض و اونی لوطف مِرِه بی‌نتیجه‌یٚم نوبو، چونکی من جٚه البأقی روسولأنٚم ویشتر زحمت بٚکٚشئم. البت نه من، بلکی خودا فیض کی می اَمرأ بو. 11 هر جور بٚبه، فرق نوکونه کی من ویشتر زحمت بٚکٚشئم یا اَشأن. موهیم اَن ایسه کی اَمأن اینجیلَ شٚمٚره وأگویا بوکودیم و شومأنم اونَ ایمأن بأوٚردید. مورده‌یأنٚ رستأخیز 12 ولی اگه ایتأ پیغأم کی اَمأن وأگویا بوکودیم، اَن بو کی مسیح جٚه مورده‌یأن ویریشته و شومأنم اونَ ایمأن بأوٚردید، پس چوطو ایسه کی ایتأ عیده جٚه شومأن اَسه گیدی کی مورده‌یأن هیوخت زٚنده نٚبٚده؟ 13 چونکی اگه مورده‌یأن قیأمتٚ روجٚ دورون زٚنده نٚبٚده، پس مسیحٚم زٚنده نوبوسته؛ 14 و اگه مسیح زٚنده نوبوسته، پس تومأمٚ اَمی پیغأمأن و موعیظه‌یأن بأطیل ایسه و شیمی ایمأن و ایعتمأدم به خودا، سوست و بیخود ایسه. 15 اَطو بٚبه، اَمأن روسولأنٚم همٚتأن دورُغگو ایسیم؛ چونکی بوگفتیم خودا مسیحَ زٚنده کوده و جٚه قبر بیرون بأوٚرده؛ اگه مورده‌یأنٚ قیأمت، رأس‌رأسِی وجود نأشته بی، اَمی اَ گبٚم دورُغ ایسه. 16 اگه مورده‌یأنٚ قیأمت وجود نأرِه، مسیحم زٚنده نوبوسته. 17 و اگه مسیح زٚنده نوبوسته، شیمی ایمأنٚم فأیده نأرِه، و هنو شیمی گونأیأنٚ سلطه جیر ایسأیید. 18 اَطو بٚبه، تومأمٚ او ایمأندأرأن کی تأ هسأ بٚمٚردٚد، هلأکَ بوستٚد. 19 اگه اَمی اومید مسیحَ فقد اَ دونیأ زٚندیگی رِه بٚبه، جٚه تومأمٚ دونیأ مردوم سیأبخت‌تر ایسیم. 20 ولی حِئقت اَن ایسه کی مسیح، مٚردنٚ پٚسی زٚنده بوسته؛ اون اوّلی نفر جٚه اوشأنی ایسه کی زٚنده بٚده. 21 هوطو کی آدمٚ گونأ وأسی، مٚردن اَ دونیأ میأن بأمؤ، مسیح کأر کی نیجأت بخشه وأسییٚم، مٚردنٚ پٚسی زٚندیگی اَمی شین بوبوسته. 22 چون هوطو کی همه کس اَنٚ وأسی کی «آدمٚ» شین ایسٚد میرٚده، همه اوشأنی کی مسیحٚ شین ایسٚد، ایوأردِه زٚنده بٚده. 23 ولی هر کی خو وختٚ سٚر، اوّلی نفر کی زٚنده بوسته، مسیح بو؛ بأزون اونی وأگردٚستنٚ وخت، تومأمٚ اوشأنی کی اونی شین ایسٚد، زٚنده بٚده. 24 اونی پٚسی، آخرت فأرٚسِه. او وخت، مسیح تومأمٚ خو دوشمنأنَ هلأکَ کونه و سلطنتَ خودایٚ پئرَ وأگوذأرَ کونه. 25 چونکی مسیح سلطنت تأ وختی ایدأمه دأره کی همٚتأ خو دوشمنأنَ هلأکَ کونه. 26 مٚردن اونی آخری دوشمن ایسه، کی اونم وأستی جٚه بین بشه و هلأکَ بٚه. 27 چونکی موقدسٚ کیتأبأن دورون بأمؤ: «خودا همه چی‌یَ اونی پأیأنٚ جیر بٚنأ.» البت وختی گه «همه چی» اونی پأیأنٚ جیر بٚنأ بوبوسته، معلوم ایسه کی اَن خودایَ، کی همه چی‌یَ مسیح پأیأنٚ جیر بٚنأ، مربوط نیبه. 28 آخرسٚر، وختی مسیح تومأمٚ خو دوشمنأنٚ سٚر پیروز بوبوسته، او وخت خودشم کی خودا پٚسر ایسه، خؤرَه خو پئر، خودا فرمأنٚ جیر نِهِه کی خودا کی اونَ همه چی سٚر بأش چأکوده بو، تومأمٚ عألمٚ سٚر حأکیم بٚبه. 29 ولی اگه مورده‌یأن هیوخت زٚنده نٚبٚده، پس چٚره ای عیده مورده‌یأنٚ عوض تعمید فأگیرده؟ اَ تعمید چی فأیده دأره، مگه اَنکی ایمأن بٚدأرٚد کی ایتأ روج مورده‌یأن ایوأردِه زٚنده بٚده؟ 30 یا اَمأن چٚره هر روج اَمی جأنَ خطرٚ میأن تأوٚدیم و هر دٚم مٚردن اَمرأ سٚرٚ کله زئندریم؟ 31 او گولأزَ کی شیمی روحأنی روشدٚ رِه در اَمی خوداوند عیسا مسیح دأرم سٚر قسم خورم کی من هر روج مٚردن اَمرأ روبرو بٚم. 32 و اگه مورده‌یأن رِه قیأمت نٚمأنه، می جنگستن درنده جأنوٚرأنٚ اَمرأ ینی هو افسس شهرٚ مردومأن، چی بهره دأشتی؟ اگه قیأمت ننأ، «بأیید بوخوریم و وأخوریم، چونکی فردأ میریمی.» 33 اوشأنَ کی اَطوچی گبأنَ زنٚده گولَ نوخورید، چونکی «نأجورٚ آدمأن اَمرأ نیشتن ویریشتن، خورومٚ اخلأقَ خرأبَ کونه». 34 عأقیل بیبید و دوروست فیکر بوکونید و جٚه شیمی رأیأن کی گونأ اَمرأ ایتأ بوبوسته دٚس فأکشید، چونکی ایتأ عیده جٚه شومأن اونچی‌یَ کی دروأره‌یٚ خودا بأمؤخته بود، جٚه خأطر بدأیید. اَنَ گم کی شٚمٚره خجألت بدم. قیأمتٚ حِئقتَ جٚه ذأت شنأختن 35 ولی بلکی اینفر وأوٚرسٚه: «چوطو مورده‌یأن زٚنده بٚده؟ زٚنده بوستنٚ وخت، چوجور جأن دأرٚده؟» 36 چی بیخودی سوأل؟ شیمی اَ سوأل جوأبَ تأنیدی شیمی خأنه کوجه باغٚ میأن بیأفید! وختی ایتأ دأنه‌یَ خأکٚ دورون کأریدی، پیشتر جٚه اَنکی سبزٚ به، اوّل پوخه و میرِه؛ 37 و وختی کی سبزٚ بِه، اونی شیکل او دأنه اَمرأ کی بکأشتیدی، خٚیلی فرق دأره. چونکی اوچی کی شومأن کأریدی، ایتأ کوجه دأنه ایسه، خأیه گندم بٚبه یا ایتأ دأنه‌یٚ دِه. 38 ولی خودا او دأنه‌یَ، ایتأ تأزه و قشنگٚ جأن فأدَه، هو جأن کی ایرأده بوکوده. جٚه هر جور دأنه ایتأ بوخصوص گیأ بیرون اَیِه. 39 دوروست هوطو کی دأنه‌یأن و گیأیأن جوروأجورٚده، جأنأنم جوروأجورٚده. آدمأنٚ جأن، حیوأنأن، مأئیأن و پرنده‌یأن، همٚتأ جوروأجورٚده. 40 او جأن کی آسمأنٚ فٚرٚشته‌یأن دأرٚده، اَمی جأنٚ اَمرأ فرق دأره، و اوشأنٚ جأنٚ نشوٚ نما اَمی جأنٚ نشوٚ نما اَمرأ فرق دأره. 41 خورشید ایجور قشنگی و شوکو دأره و مأه و ستأره‌یأن، ایجور دِه. حتّا ستأره‌یأن جٚه قشنگی و سوسو زِئن جوروأجورٚده. 42 مورده‌یأنٚ قیأمتٚ دورونم هطو بِه. ایتأ جأن کی مٚردنٚ وخت، زیمینٚ دورون بکأشته بِه، بوپوخوسته بِه، ولی او جأن کی ویریزه، هیوخت خرأبَ نیبه. 43 ذلّتٚ دورون بکأشته بِه، ولی جلالٚ دورون ویریزه. سوستی دورون بکأشته بِه، ولی قوّتٚ دورون ویریزه. 44 ایتأ طبیعی جأن بکأشته بِه، ولی ایتأ روحأنی جأن ویریزه. چونکی هوطو کی طبیعی جأن نٚهأ، روحأنی جأنٚم نٚهأ. 45 هوطو کی موقدسٚ کیتأبأن دورون بینیویشته بوبوسته: «اوّلی اینسأن ینی آدم، ایتأ زٚنده جأن بوبوسته». ولی آخری آدم، ینی مسیح، او روح کی حیأت بخشه بوبوسته. 46 پس، وأستی اَ جأن کی نفسٚ اَمرأیه اوّل بٚدأریم، بأزون دونبألتر خودا روحأنی و آسمأنی جأنَ اَمٚرَه فأدِه. 47 اوّلی آدم جٚه زیمینٚ خأک چأکوده بوبوسته، ولی دویُمی آدم ینی مسیح، جٚه آسمأن بأمؤ. 48 هرتأ جٚه امّا اینسأنأن، ایتأ جأن جٚه خأک دأریمی، آدمٚ جأنٚ مأنستَن. هطویم اوشأنی کی مسیح شین بٚده، اونی مأنستَن ایتأ آسمأنی جأن یأفده. 49 هوطو کی هسأ، هرتأ جٚه اَمأن ایتأ جأن دأریم آدمٚ جأنٚ مأنستَن، ایتأ روجٚم ایتأ جأن دأریمی، مسیح جأنٚ مأنستَن. 50 اَی جأن و دیلأن، می منظور اَن ایسه کی خأکی جأن کی جٚه گوشت و خون بسأخته بوبوسته ایسه، نتأنه خودا ملکوتٚ میأن بشه، و اَمی اَ جٚه بین شؤئؤنی جأنأن، اَبدی زٚندیگی لیأقتَ نأرِه. 51 هسأ، ایتأ رأز کی قأقَ کونه شٚمٚره گم: امّا همٚتأن نوخوسیم، بلکی همٚتأن عوضَ بیمی. 52 او وخت کی آخری شیپور جٚه آسمأن اونی صدا بأیِه، ایتأ دٚمٚ دورون، ایتأ چوم نٚهنٚ دورون، همٚتأ ایمأندأرأن کی بٚمٚردٚد، ایتأ جٚه بین نوشؤنی جأنٚ اَمرأ زٚنده بٚده. او وخت اَمأنٚم کی هنو زٚنده ایسیم، نأخٚوٚرکی عوضَ بیم و ایتأ تأزه جأن یأفیم. 53 چونکی خرأبَ بوستنی جأنأن وأستی خرأبَ نوبوستٚنی جأنأنَ، و جٚه بین شؤئؤنی جأنأن، نیمیرٚ جأنأنَ عوض بٚبٚد. 54 او وخت کی خرأبَ بوستنی جأن او جأن کی خرأبٚ نیبه‌یَ دوکود، و جٚه بین شؤئؤنی جأن او جٚه بین نوشؤنی جأنَ، او وخت او کلام کی بینیویشته بوبوسته، انجأم بِه کی فٚرمأیه: «مٚردن پیروزَ بوستنٚ دورون فٚوٚرسته بوبوسته. 55 اَی قبر، تی بٚرنده بوستن کویه نٚهأ؟ اَی مٚردن، تی نیش کویه نٚهأ؟» 56 چونکی گونأ او نیش ایسه کی مٚردنٚ بأعیث بِه، و خو قودرتم جٚه شریعتٚ فأگیره. 57 تومأمٚ اَشأنٚ وأسی خودایَ شوکر! اون ایسه کی اَمٚرَه اَمی خوداوند عیسا مسیح اَمرأ پیروزَ کونه. 58 هنٚ وأسی، اَی جأنٚ دیلأن، ایمأنٚ دورون قوی و قأیم بئیسید و همیشٚک شوقٚ فرأوأنٚ اَمرأ، خوداوندٚ خیدمتَ موشغول بیبید، چونکی دأنیدی او زحمت کی خوداوندٚ رِه کشئندرید بی‌آخرپٚسی نییٚه. |
© 2024 Transform Iran
Transform Iran