اوّل قرنتیان 14 - Gilaki New Testamentزوأنأن و نوبوّت عطأ 1 پس، محبتَ شیمی زٚندیگی موهیمٚ هدف چأکونید. ولی هطویم شوقٚ اَمرأ دوعأ بوکونید کی روح‌القدس روحأنی عطأیأنٚم شٚمٚره خو لوطفٚ اَمرأ فأدٚه، بوخصوص نوبوّتٚ عطأیَ. 2 چونکی اینفر کی نأمؤخته زوأنأنٚ اَمرأ گب زٚنِه، آدمأنٚ اَمرأ گب نٚزنه بلکی خودا اَمرأ ایسه، چونکی البأقیأن نٚتأنٚده اونی گبأنَ بفأمٚد. اون روح‌القدسٚ اَمرأ، رأزأنَ وأگویا کونه. 3 ولی اینفر کی نوبوّت کونه، ینی خودا پیغأمأنَ ایمأندأرأنَ وأگویا کونه، اَ کأرٚ اَمرأ اوشأنَ کومک کونه کی روشد بوکونٚد، تِشویق بٚبٚد و آرأم بیگیرٚد. 4 پس اینفر کی بٚزوأنأن گب زٚنِه، فقد خو روشدَ کومک کونه، ولی اونکی نوبوّت کونه، تومأمٚ کیلیسا روشدَ کومک کونه. 5 می آروزو اَن ایسه کی شومأن همٚتأن بٚزوأنأن گب بٚزنید، ولی ویشتر خأیم کی نوبوّت بوکونید، چونکی نوبوّت کودن جٚه زوأنأنٚ اَمرأ گب زِئن بِیتر ایسه، مگه اَنکی اینفر بتأنه اونچی کی شومأن غریبٚ زوأنأنٚ اَمرأ گیدی، البأقیأنٚ رِه ترجومه بوکونه کی اَشأنٚم جٚه اون بهره ببرد. 6 و هسأ، جأن و دیلٚ برأرأن و خأخورأن، اگه شیمی ورجأ بأیٚم و نأمؤخته زوأنأنٚ اَمرأ گب بٚزٚنم، چی منفعت شٚمٚره رسأنم؟ ولی اگه شِمِره ایتأ پیغأم بأوٚرٚم کی خودا مِرِه آشیکأرَ کوده، یا شنأخت و ایتأ بوخصوص معرفت، و یا نوبوّت یا درس بأوٚرٚم، اَطو بٚبه شٚمٚره نفع فأرٚسأنِم. 7 حتّا مزقأنٚ سأزأن، نی و چنگٚ مأنستَن، اگه آشیکأرأ بٚزِه نٚبٚد، چوطو بِه اوشأنٚ نوأیَ فأمٚستٚن؟ هطویی، اگه اَمأنٚم ایتأ زوأن کی اونَ شأ فأمٚستٚن اَمرأ گب نٚزنیم، البأقیأن چوطو اَمی گبأنَ فأمٚده؟ 8 یا اگه جنگٚ میدأنٚ میأن، آمأده‌بأشٚ شیپورَ نٚزٚند، کی خؤرَه جنگٚ رِه آمأدَه کونه؟ 9 هطو، اگه شیمی زوأنٚ اَمرأ، گبأنی بیگید کی نشأ فأمٚستٚن، چوطو اینفر تأنه بفأمه کی چی گفتأندرید؟ اینگأر شیمی گبأن هوا دورون اَویرَ بٚده! 10 شک ننأ کی دونیأ دورون خٚیلی جوروأجورٚ زوأنأن نٚهأ. ولی هیتأ بی‌مأنی نییٚه. 11 ولی اگه من او زوأنَ نفأمم، اون مِرِه ایتأ غریبه مأنستَن ایسه و منم اونی رِه. 12 اَن دروأره‌یٚ شومأنم دوروست ایسه. جٚه اویَه کی خٚیلی روح‌القدسٚ عطأیأنٚ رِه ذوق و شوق دأریدی، او عطأیأنَ بٚخأیید کی تومأمٚ کیلیسا روشد رِه خُبٚد. 13 هر کی بٚزوأنأن گب زِئنٚ عطأیَ دأره، وأستی دوعأ بوکونه کی خودا اونَ عطأیٚ ترجومه‌یٚ اَ زوأنأنٚم فأدَه. 14 چونکی اگه ایتأ زوأنٚ اَمرأ دوعأ بوکونم کی اونَ نفأمم، رأس‌رأسِی اَطویه کی می روح دوعأ کودأندٚره، ولی می عقل بهره نٚبٚره. 15 پس چی وأبوکونم؟ هم در روح دوعأ کونم و هم می عقلٚ اَمرأ؛ هم روحٚ اَمرأ سورود خأنٚم و هم عقل و فأمٚ اَمرأ، اوطو کی همه بفأمٚد. 16 چونکی اگه شومأن خودایَ ایتأ زوأنٚ اَمرأ شوکر بوکونید کی فقد شیمی روح فأمه، چوطو البأقیأن بتأنٚد شیمی شوکرگوزأری دوعأیَ آمین بٚگد، هسأ کی نفأمده چی گفتأندریدی؟ 17 شک ننأ کی شومأن خٚیلی خُب خودایَ شوکر کونیدی، ولی اوشأنی کی اویَه ایسأده بهره نٚبرده. 18 خودایَ شوکر کی ویشتر جٚه همٚتأن بٚزوأنأن گب زنٚم. 19 ولی کیلیسا جلسه میأن می دیل خأیه کی پنج‌تأ کلمه او زوأنٚ اَمرأ گب بٚزٚنم کی همٚتأن بفأمٚد و ایستفأده بوکوند، تأ اَنکی هیزأرتأ کلمه غریبٚ زوأنأنٚ اَمرأ بٚگم کی هیکس نفأمِه. 20 جأن و دیلٚ برأرأن، اَ موضو فأمٚ رِه زأکأنٚ مأنستَن نیبید. روحأنی موضویأنٚ درک و فأمٚ میأن، عأقیل و دأنأ مردأکأنٚ مأنستَن بیبید، ولی بدی کودنٚ میأن زأکأنٚ مأنستَن! 21 موقدسٚ کیتأبأنٚ میأن اَطو بینیویشته بوبوسته: «غریبٚ زوأنأن و غریبه‌یأنٚ لبأنٚ اَمرأ اَ مردومٚ اَمرأ گب زنٚم. تومأمٚ اَشأنٚ اَمرأ مٚرَه گوش فأندیدی. 22 پس دینیدی کی بٚزوأنأن گب زِئن، خودا قودرتٚ نیشأنه، ایمأندارأنٚ رِه نییٚه، بلکی ایتأ نیشأنه ایسه اوشأنی رِه کی ایمأن نأرٚده. ولی نوبوّت اوشأنی کی ایمأن نأرٚده رِه نییٚه، بلکی ایمأندأرأنٚ رِه ایسه. 23 پس اگه اینفر کی ایمأن نأرِه یا اینفر کی اَ عطأیأنَ نأرِه، بأیٚه شیمی جمٚ دورون و بشتأوه کی شومأن همٚتأن غریبٚ زوأنأنٚ اَمرأ گب زنیدی، شک ننأ کی گومأن کونه کی تورَ بوستید. 24 ولی اگه همٚتأن نوبوّت بوکونید، و هو وخت اینفر کی مسیحی نییٚه یا اینفر کی اَ عطأیأنَ نأرِه بأیٚه بودورون، خو گونأیأنَ ایحسأس کونه، جٚه همه کسٚ ور محکوم بِه. 25 او وخت جٚه اونی جیگأ بٚدأ فیکرأن چپر اوسأده بِه، خو زانو سٚر کفه و خودایَ پرستٚش کونه، گه: «رأس‌رأسِی کی خودا شیمی میأن ایسأ.» دیچین وأچین عیبأدت مجلسأنٚ میأن 26 پس، جأن و دیلٚ ایمأندأرأن، می نیّتَ خولاصه وأگویا کونم. وختی عیبأدتٚ رِه کیلیسا دورون جمَ بیدی، اینفر جٚه شومأن سورود بٚخأنه، اویتأ، خودا کلامَ البأقیأنَ بأموجه، اینفر دِه او موکأشفه‌یَ کی جٚه خودا فأگیفته وأگویا بوکونه، اینفرم غریبٚ زوأنأنٚ اَمرأ گب بٚزٚنه و اویتأ اونَ ترجومه بوکونه. ولی هرچی انجأم بِه، وأستی همٚتأ ایمأندأرأنٚ رِه فأیده بٚدأره و اَشأنٚ قوّت و روحأنی روشدٚ بأعیث بٚبه. 27 اگه ای عیده خأیده غریبٚ زوأنأنٚ اَمرأ گب بٚزٚنٚد، اوشأنی آدم نفرأن نوأستی ویشتر جٚه دو یا سه نفر بٚبه، اونم دأل بدأل. اینفرم وأستی اَ زوأنأنَ ترجومه بوکونه. 28 ولی اگه هیکس نٚبه کی ترجومه بوکونه، اَشأن وأستی تأم بٚزٚنٚد و خوشأنٚ اَمرأ و خودا اَمرأ غریبٚ زوأنأنَ گب بٚزٚنٚد، همٚتأنٚ ورجأ و بولندٚ صدا اَمرأ نٚبه. 29 اگه ایتأ عیده ایسأده کی جٚه خودا ور ایتأ نوبوّت دأرٚده، بِیتر ایسه پوشت بٚپوشت دو یا سه نفر جٚه اَشأن خودا پیغأمَ وأگویا بوکوند و البأقیأن اونَ بد و خُبَ بفأمٚد. 30 هنٚم بٚگم کی اگه ایتأ پیغأم و موضو جٚه خودا ور اویتأ رِه آشیکأر بٚبه، اونی کی گب زِئندره، وأستی تأم بٚزٚنه. 31 اَطویی، تومأمٚ اوشأنی کی ایتأ پیغأم جٚه خودا ور فأگیفتده، تأنٚده اَیتأ جٚه اویتأ پٚسی خودا پیغأمَ وأگویا بوکوند کی همه کسَ بأموجه و تِشویق بٚبٚد و قوّت فأگیرٚد. 32 پیغمبرأنٚ روح جٚه پیغمبرأن ایطأعت کونه. 33 خودا هرکی هرکی‌یَ دوس نأرِه، بلکی دیچین وأچین و سأزشَ. هوطو کی تومأمٚ کیلیسایأنٚ دورون بیدِه به، 34 زنأکأن وأستی جلسه‌یأن دورون تأم بٚزٚنٚد. اوشأن نوأستی گب بٚزٚنٚد بلکی گوش بٚدٚد و ایطأعت بوکونٚد، هوطو کی تورأتٚ کیتأب فٚرمأیه 35 اگه ایتأ سوأل دأرٚده، خأنه دورون جٚه خوشأنٚ مردأکأنٚ وأوٚرسٚد، چونکی دوروست نییٚه کی زنأکأن کیلیسا جلسه‌یأن دورون گب بٚزٚنٚد و خوشأنٚ فیکرَ بٚگد. 36 مگه خودا کلام جٚه شومأن سٚر بیگیفته، یا بلکی فیکر کونیدی کی فقد شومأن خودا ایرأده‌یَ شنأسید و وٚست؟ اَطو بٚبه خٚیلی ایشتیوأ کودأندرید. 37 اگه ایدعأ کونیدی کی نوبوّت عطأ و یا البأقی روح‌القدسٚ عطأیأنَ دأریدی، پس وأستی شومأن پیشتر جٚه همه کس بفأمید کی هرچی گفتأندرم، خوداوندٚ حوکمأن ایسه. 38 ولی اگه اینفر وأزم موخألفت دأره، وئأل خو نأدأن‌گیری دورون بئیسه. 39 پس اَی جأن و دیلٚ برأرأن و خأخورأن، نوبوّتٚ عطأیَ خٚیلی شوق و ذوقٚ اَمرأ بٚخأیید و هنٚم بٚگم کی هیکسٚ جولویَ نیگیرید کی بٚزوأنأن گب بٚزٚنه. 40 هرتأ کأر خو جأ سٚر خُبه. و وأستی دیچین وأچینٚ اَمرأ انجأم بٚبه. |
© 2024 Transform Iran
Transform Iran