اوّل قرنتیان 12 - Gilaki New Testamentروح‌القدسٚ عطأیأن 1 هسأ، اَی برأرأن و خأخورأن، خأیم دروأره‌یٚ روح‌القدسٚ عطأیأن ایپچه بینیویسٚم کی جٚه اون ایشتیوأ فأم ندأشته بید. 2 دأنیدی کی پیشتر جٚه اَنکی خوداوندَ ایمأن بأوٚرید، او بُتأنٚ میأن کی نتأنستید گب بٚزٚنٚد، سبیلٚ سرگردأن بید و جٚه اَیتأ بُت اویتأ بُتَ پنأه بٚردیدی. 3 ولی هسأ آدمأنی‌یَ دینیدی کی ایدعأ کونٚده جٚه خودا روحٚ ور شِمِره پیغأم دأرٚد. چوطو شأ فأمٚستٚن کی اَشأن رأس‌رأسِی جٚه خودا ور ایلهأم فأگیفتد، یا اَنکی کولأبردأرٚده؟ اونی رأ اَن ایسه: اینفر کی خودا روحٚ قودرتٚ جیر گب زٚنِه، هیوخت نتأنه عیسایَ لعنت بوکونه. هیکسٚم نتأنه تومأمٚ دیلٚ اَمرأ عیسایَ خوداوند دؤخأنه، جغرز اَنکی روح‌القدس اَ حِئقتَ اونی رِه آشیکأرَ کوده بی. 4 هرچن عطأیأن جوروأجور ایسٚد، ولی اوشأن همٚتأن جٚه هو روح‌القدس سٚر گیرده. 5 هرچن خیدمتأن جوروأجور ایسٚد، ولی امّا همٚتأن هو خوداوندَ خیدمت کودأندریم. 6 خودا جوروأجورٚ رأ روشأنٚ اَمرأ کأر کودأندٚره، ولی اَ کأرأنَ امّا همٚتأنٚ میأن هو خودا ایسه کی بعمل اَوٚره. 7 هرتأ جٚه اَمأنٚ ایتأ عطأ فأدأ بوبوسته کی بتأنیم کس‌کسَ کومک بوکونیم. 8 خودا روح اینفرَ ایتأ پیغأمٚ پور جٚه حیکمت گفتنٚ عطأیَ بخشه، و هو روح اویتأیٚ، عطأیٚ پیغأمٚ پور جٚه معرفت و شنأختَ. 9 اون اینفرَ ایتأ خورومٚ ایمأن عطأ کونه، و اویتأیَ نأخوش اَحوألأنٚ شفأ رِه قودرت بخشه. 10 اینفرَ موجیزه‌یأنٚ انجأم دئنٚ قودرتَ فأدِه، اویتأیَ نوبوّت کودنٚ عطأیَ. اینفرَ روحأنٚ میأن تشخیص دئنٚ عطأیَ بخشه. وأزم اینفرَ اَ عطأیَ بخشه کی بتأنه دوعأ وخت او زوأنأن اَمرأ کی نأمؤخته گب بٚزٚنه، و اویتأیَ اَ زوأنأنٚ ترجومه عطأیَ فأدِه. 11 ولی تومأمٚ اَ عطأیأن جٚه ایتأ روح ور، ینی هو روح‌القدس ایسه، و اون ایسه کی تصمیم گیره هرتأنٚ کویتأ عطأیَ بٚبخشه. ایتأ جأن، ولی چنتأ عُصم و اعضأ 12 جأن ایتأ ایسه ولی عُصم و اعضأ خٚیلی دأره. وختی تومأمٚ اَ عُصم و اعضأ کس‌کسٚ ورجأ مأنِه، جأن چأکوده به. مسیحٚ جأنٚم هطویی ایسه. 13 چونکی امّا همٚتأنٚ ایتأ روح، ینی روح‌القدسٚ اَمرأ، تعمید بیگیفتیم کی ایتأ جأنَ چأکونیم – چی یوهودی بیبیم و چی یوهودی نیبیم، چی بٚرٚده بیبیم چی آزأد- و امّا همٚتأنَ جٚه هو روح‌القدس فأدأ بوبوسته کی وأخوریم. 14 هطویه، جأن فقد ایتأ عُصم و اعضأ نأرِه، بلکی جوروأجورٚ عُصم و اعضأ دأره. 15 اگه پأ بٚگه: «چونکی دٚس نییٚم، جأنٚ شین نییٚم»، مگه اَ گب دلیل به کی پأ جأنٚ شین نٚبه؟ 16 یا اگه گوش بٚگه: «چونکی چوم نییٚم، جأنٚ شین بٚحیسأب نأیم»، چی پیش اَیِه؟ ینی اَ گب، گوشَ جٚه البأقی جأنٚ عُصم و اعضأ سیوأ وأکونِه؟ 17 اگه تومأمٚ جأن چوم بو! اَطو بوبوسته‌بی چوطو تأنستیدی بشتأوید؟ یا تومأمٚ جأن گوش بو! چوطو تأنستید ایچی‌یَ بو بوکونید؟ 18 ولی هوطو کی بیدِه بِه، خودا هرتأ عُصم و اعضأیٚ دوروست اوطو کی خأستی، جأنٚ میأن بٚنأ. 19 اگه همٚتأ عُصم و اعضأ ایتأ بوبوسته بید، دِه جأن ننأبو! 20 هطویه، عُصم و اعضأ خٚیلییٚد، ولی جأن ایتأ ایسه. 21 چوم هیوخت نتأنه دٚسَ بٚگه: «تٚرَه ایحتیأج نأرٚم.» سٚرم نتأنه پأیأنَ بٚگه: «شٚمٚره ایحتیأج نأرٚم.» 22 وأگردأنسر، بعضی جٚه عُصم و اعضأ کی سوست‌تر و کم‌ارزش‌تر جٚه البأقی عُصم و اعضأیأن بٚنظر اَیٚده، رأس‌رأسِی ویشتر جٚه البأقی لأزیم ایسٚد، 23 و او عُصم و اعضأیَ کی اَمی فیکرٚ اَمرأ کمتر ایحترأم دأرٚده، ویشترٚ دیقتٚ اَمرأ لأ نیهیم، و او عضوأنَ کی قشنگ نییٚد ایجور بوخصوص اونَ زینت دیهیم. 24 اَطویی ایسه کی اَمی جأنٚ قشنگٚ عُصم و اعضأ، اَجور توجه‌یَ ایحتیأج نأرٚد. هنٚ وأسی، خودا جأنٚ عُصم و اعضأیَ ایجور کس‌کسٚ ورجأ بٚنأ کی او عُصم و اعضأیَ کی کم‌ارزش بٚچوم اَیٚده، ویشتر ایحترأم و توجه بٚبه؛ 25 کی اَطویی جأنٚ عُصم و اعضأ میأن تنأسُب بمأنه و هرتأ عضو هوندٚر کی خؤرَه علأقه و توجه دأره، البأقی عُصم و اعضأیأنم دوس بٚدأره. 26 اَطو ایسه کی، اگه ایتأ عضو جٚه جأن ایتأ دردَ دوچأر بٚبه، تومأمٚ جأنٚ عُصم و اعضأ اونی اَمرأ همدردی کونٚده؛ و اگه ایتأ عُصم و اعضأ رِه گولأز بٚبه، تومأمٚ عُصم و اعضأ اونی اَمرأ خوشألی کونٚده. 27 می منظور جٚه اَ گبأن اَن ایسه کی شومأ همٚتأن کس‌کسٚ اَمرأ مسیح جأن ایسید، ولی هرتأن تنأیی ایتأ مستقل و لأزیمٚ عُصم و اعضأ اَ جأنٚ دورون ایسیدی. 28 بعضی جٚه عضوأن کی خودا کیلیسا میأن، ینی مسیح جأنٚ دورون، قرأر بٚدأ، اَشأن ایسٚد: اوّل: روسولأن، ینی مسیح اوسه کوده‌یأن. دویُم: پیغمبرأن، ینی اوشأنی کی خودا ایلهأمٚ اَمرأ، پیغأم اَوٚرٚده. سیوم: معلمأن، ینی اوشأنی کی خودا کلامَ البأقیأنَ آموجٚده. بأزون اوشأنی کی موجیزه کونٚده. اوشأنی کی شفأ عطأیَ دأرٚد. اوشأنی کی البأقیأنٚ کومک کودنٚ عطأیَ دأرٚده. اوشأنی کی رهبری و مودیریتٚ عطأیَ دأرٚد. آدمأنی کی گب زِئن جوروأجورٚ زوأنأنٚ عطأیَ دأرٚد، او زوأنأن کی پیشتر نأمؤخته بود. 29 مگه کیلیسا میأن همٚتأ روسول ایسٚد؟ مگه همٚتأ پیغمبر ایسٚد؟ مگه همٚتأ معلمٚد؟ مگه همٚتأ تأنٚده موجیزه بوکونٚد؟ 30 مگه همٚتأ شفأ عطأیَ دأرٚد؟ مگه همٚتأ نأمؤخته زوأنأنٚ گب زِئنٚ عطأیَ دأرٚده؟ یا همٚتأ اَ زوأنأنٚ ترجومه عطأیَ دأرٚده؟ 31 هسأ، تومأمٚ شوق اَمرأ، بوجؤرتر و پورمنفعت‌تر عطأیأنَ دونبأل بیبید و هسأ بِیترین رأیَ شٚمٚره خأیم نیشأن بدم. |
© 2024 Transform Iran
Transform Iran