اوّل قرنتیان 11 - Gilaki New Testament

¹ پس می جَا بأموجید، هوطو کی منم جٚه مسیح آموجٚم.

دٚوٚسته بوستنٚ زنأکأنٚ سٚر عیبأدتٚ وخت

² جأن و دیلٚ برأرأن، شٚمٚره آفرین گم کی هر چی شٚمٚره بأمؤختم، شٚمٚره خأطر نٚهأ و اوشأنَ انجأم دیهیدی.

³ ولی خأیم اَ موضویٚم خأطر بأوٚرٚم کی هرتأ مردأکٚ سٚر مسیح ایسه، و زنأکٚ سٚر مردأی ایسه، و مسیحٚ سٚر، خودا.

⁴ هنٚ وأسی اگه ایتأ جلسه دورون ایتأ مردأی سٚردٚوٚسته، دوعأ یا نوبوّت بوکونه خو سٚرَ بی‌حورمتی بوکوده.

⁵ هطویم اگه ایتأ زنأی ایتأ مجلٚسٚ دورون، سٚر بٚرنده دوعأ یا نوبوّت بوکونه، خو سٚرَ بی‌حورمتی بوکوده، چونکی اَنٚ مأنستَن ایسه کی او زنأی، خو سٚرَ بتأشه.

⁶ اگه زنأی نٚخأیه خو سٚرَ لأ بٚنه، پس خو سٚرٚ مویَم بتأشه! ولی چونکی زنأکٚ رِه عأیبه کی خو سٚرَ بتأشه، پس وأستی خو سٚرَ لأ بٚنه.

⁷ ولی مردأی نوأستی عیبأدتٚ وخت، خو سٚرَ لأ بٚنه یا ایتأ کولأ خو سٚر بٚدأره، چونکی مردأی خودا مأنستَن چأکوده بوبوسته و اونی جلالَ دتأوأنه. ولی زنأی مردأکٚ جلال و شوکوهَ دتأوأنه.

⁸ اوّلی مردأی، جٚه زنأی بوجود نأمؤ، بلکی اوّلی زنأی جٚه مردأی بوجود بأمؤ.

⁹ هنٚم بٚگم کی، اوّلی مردأی کی آدم بو، حوا رِه خلق نوبوسته، بلکی حوا آدمٚ رِه خلق بوبوسته.

¹⁰ هنٚ وأسی، و هطویم چونکی فٚرٚشته‌یأن فأندرستأندرد، زنأی وأستی خو سٚرَ لأ بٚنه کی نیشأن بٚده ایقتدأر جیر ایسأ.

¹¹ ولی خوداوندٚ قومٚ میأن هم زنأی مردأکَ موحتأج ایسه هم مردأی زنأکَ.

¹² چونکی هرچن اوّلی زنأی جٚه مردأی بوجود بأمؤ، ولی جٚه اونی پٚسی، تومأمٚ مردأکأن جٚه زنأی بودونیأ بأمؤد. ولی هرجور بٚبه مردأی و زنأی هر دوتأن جٚه خوشأنٚ خألق، خودا ایسٚد.

¹³ هسأ، شیمی نظر دروأره‌یٚ اَ موضو چیسه؟ ینی دوروست ایسه کی زنأی ایتأ جمٚ میأن، بودونٚ لچک دوعأ بوکونه؟

¹⁴ مگه آشیکأر نییٚه کی اگه ایتأ مردأی درأزٚ مو بٚدأره اونی رِه عأیب ایسه؟

¹⁵ و مگه درأزٚ مو زنأکٚ رِه گولأز و خوشألیٚ بأعیث نییٚه؟ چونکی اَ مو اونی پوشأنئنٚ وأسی اونَ فأدأ بوبوسته.

¹⁶ ولی اگه اینفر خأیه دروأره‌یٚ اَ موضو بوگو موگو بوکونه، فقد ایچی تأنٚم اونَ بٚگم کی اَن ایسه، اَمأن همیشٚک اَ آموجَ بٚدأییم کی زنأی دوعأ یا نوبوّتٚ وخت، وأستی خو سٚرَ دٚوٚده. تومأمٚ کیلیسایأنٚم اَ موضو‌یَ قوبیل دأرٚده.

چوطو وأستی خوداوندٚ شأمٚ دورون شرکٚت بوکونیم

¹⁷ ولی اونچی رِه کی اَسه شٚمٚره نیویسٚم، نتأنٚم شٚمٚره تِشویق بوکونم. چونکی بشتأوستم وختی خوداوندٚ شأمٚ رِه کس‌کسٚ اَمرأ جمَ بیدی، او زیأن کی شومأن دینیدی ویشتر جٚه اونی نفع ایسه.

¹⁸ اوّل اَنکی ایشتأوٚم هر وخت کس‌کسٚ اَمرأ کیلیسا وأسی جمَ بیدی، شیمی میأن سیوأیی‌یأن و جودأیی‌یأن نٚهأ، و ایپچه اَ گبأنَ بأوٚر کونم.

¹⁹ شکی ننأ کی وأستی شیمی میأن ایپچه ایختلأف بمأنه، کی معلوم بٚبه کویتأ جٚه شومأن خودا تأیید بوبوسته ایسید.

²⁰ وختی خوردنٚ رِه کس‌کسٚ اَمرأ جمَ بیدی، اونچی کی خوریدی رأس‌رأسِی خوداوندٚ شأم نییٚه.

²¹ چونکی بشتأوستم کی ای عیده بودونٚ اَنکی البأقیأنٚ رأفأ بئیسٚد، خوشأنٚ شأمَ توندأ توند خورٚده و اونَ البأقی اَمرأ سأم نوکونٚده. بأزین ایتأ عیدّه‌یَ غذأ اَندر فأنرٚسِه و ویشتأ مأنٚده، ولی البأقیأن اَندر بوخوردٚد و وأخوردٚد کی مستَ بوستٚد.

²² ینی اَن دوروست ایسه؟ مگه نتأنیدی شیمی غذأیَ شیمی خأنه دورون بوخورید کی کیلیسا بی‌حورمتی‌یَ بأعیث نیبید و فِقِرأنَ کی نٚتأنٚده خوشأنٚ اَمرأ غذأ بأوٚرٚد، خجألت ندید؟ شٚمٚره چی بٚگم؟ شٚمٚره تِشویق بوکونم؟ هیوخت!

²³ اونچی اَمی خوداوند عیسا مسیح دروأره‌یٚ اَ شأم بٚفرمأسته اَن ایسه و من پیشتر اونَ شٚمٚره بأمؤختم: اَمی خوداوند عیسا، او شبٚ میأن کی یوهودأ اونَ خیأنٚت بوکوده، نأنَ بٚدٚسَ گیفته،

²⁴ و شوکر کودنٚ پٚسی، اونَ وأچرده و خو شأگردأنَ فأدأ و بوگفت: «اَن می جأن ایسه کی شیمی رأ دورون فٚدأ کونم. اَنَ بجأ بأوٚرید.»

²⁵ هطویم شأمٚ پٚسی، پیأله‌یَ اوسأده و بوگفت: «اَ پیأله، خودا و اونی قومٚ میأن ایتأ تأزه عهدٚ نیشأن ایسه، ایتأ عهدٚ کی می خونٚ اَمرأ اونَ مُهر کونم. هر وأر کی جٚه اون وأخوریدی، مٚرَه خأطر بأوٚرید.»

²⁶ اَطویی، هر وأر کی اَ نأنَ خوریدی و جٚه اَ پیأله وأخوریدی، رأس‌رأسِی اَ حِئقتَ وأگویا کونیدی کی مسیح شیمی نیجأتٚ رِه، خو جأنَ فٚدأ بوکوده. پس تأ خوداوندٚ وأگردٚستنٚ زمأت، اَنَ بٚدأرید.

²⁷ هنٚ وأسی، اگه اینفر جٚه اَ نأن بیجأ بوخوره و جٚه اَ پیأله وأخوره، اَمی خوداوند عیسا مسیحٚ جأن و خونَ بی‌حورمتی بوکوده و در رأیٚ اوشأنٚ گونأ بوکوده.

²⁸ هه دلیلٚ وأسی ایسه کی هر کس پیشتر جٚه اَنکی جٚه نأن بوخوره و جٚه پیأله وأخوره، وأستی خؤرَه ایمتحأن بوکونه.

²⁹ چونکی اگه اینفر بیجأ جٚه نأن بوخوره و جٚه پیأله وأخوره، ینی نفأمٚه کی مسیح جأن هو کیلیسا ایسه، اونی میأن شرکٚت کودن اَمرأ، خؤرَه خودا چومٚ دورون محکوم بوکوده، چونکی مسیحٚ مٚردنَ بی‌حورمتی بوکوده.

³⁰ هنٚ وأسی ایسه کی خٚیلی جٚه شومأن سوست و نأخوش اَحوألٚد و حتّا ای عیده بٚمٚردٚد.

³¹ ولی اگه شٚمٚره ایمتحأن بوکونید، دِه خودا شٚمٚره محکوم و تِنبیه نوکونه.

³² ولی حتّا اگه خوداوند اَمٚرَه محکوم و تِنبیه بوکونه، اَنٚ رِه ایسه کی دونبألتر دونیأ البأقی آدمأنٚ اَمرأ موحأکمه و دأوری نیبیم.

³³ پس اَی جأن و دیلٚ برأرأن، وختی کی اَمی خوداوند عیسا مسیح شأمٚ رِه جمَ بیدی، رأفأ بئیسید کی البأقیأنم بأیٚد.

³⁴ اگه اینفر خٚیلی ویشتأ ایسه، خو خأنه دورون بوخوره کی وختی البأقیأنٚ اَمرأ جمَ بِه، خو محکوم بوستن و موجأزأتٚ بأعیث نٚبه. وختی بأمؤم، البأقی موشکلأنم فأرٚس فوروس کونم.