اوّل قرنتیان 10 - Gilaki New Testamentجٚه قدیمیأن عیبرت گیفتن 1 اَی جأنٚ دیلٚ برأرأن، اونچی کی قدیم زمأتأنٚ میأن اَمی مردومٚ رِه ایتفأق دکفته نوأستی جٚه خأطرَ دیم، او وخت کی اَشأن بیأبأنٚ دورون سٚفر کودیدی، خودا ایتأ اَبر اوسه کوده کی اوشأنَ پیش دکفه و اوشأنَ هیدأیت بوکونه؛ بأزون اوشأنَ سأق و سألیم سورخٚ دریأ جَا رٚدَ کوده. 2 رأس‌رأسِی تأنیم اَطو وأگویا بوکونیم کی اَشأن دریأ و اَبرٚ دورون، تعمید بیگیفتٚد و اَ کأرٚ اَمرأ، نیشأن بٚدأد کی موسا شأگرد ایسٚد. 3 اَشأن همٚتأن هو روحأنی غذأیَ بوخوردٚد. 4 و هو روحأنی آبَ وأخوردٚد. چونکی جٚه او روحأنی صخره وأخوردیدی کی اوشأنٚ اَمرأ بو، و او صخره هو مسیح بو. 5 اَطو بو کی، خودا جٚه ویشترٚ اوشأن رأضی نوبو، و هنٚ وأسی، اوشأنٚ جنأزه‌یأنٚ، تومأمٚ بیأبأنٚ دورون تأوٚدأ و پٚخشَ و پلأ بوبوست. 6 اَن ایتأ عیبرت ایسه اَمِرِه، کی اوشأنٚ مأنستَن پٚلید و شرورٚ کأرأنٚ نأجه دورون نئیسیم، 7 و اوشأنٚ مأنستَن نیشیم بُتأنٚ پرستٚشٚ ور. موقدسٚ کیتأبأنٚ دورون بینیویشته بوبوسته: «مردوم خوردن و وأخوردنٚ رِه بینیشتٚد، و عیأشی رِه ویریشتٚد.» 8 هطویم ایتأ عیده جٚه اوشأنٚ مأنستَن نیبیم کی زٚنأ بوکودٚد، و اَنٚ وأسی فقد ایتأ روجٚ میأن، بیست و سه هیزأر نفر جٚه اَشأن هلأکَ بوستٚد. 9 مسیح صبر و تحمولم ایمتحأن نوکونیم چونکی ایتأ عیده جٚه اوشأن اَطو بوکودٚد و زهردأرٚ لأنتیأنٚ نیشٚ اَمرأ بٚمٚردٚد. 10 هطویم، ایتأ عیده جٚه اَشأنٚ مأنستَن، جٚه خودا و اونی کأرأن گله شیکأیت نوکونیم، چونکی هه کأرٚ وأسی بو کی خودا خو فٚرٚشته‌یَ اوسه کوده کی اوشأنَ جٚه بین ببره. 11 تومأمٚ مأجیرأیأن و بلأیأن کی اَمی قومٚ سٚر بأمؤ، اَنٚ وأسی بینیویشته بوبوسته کی اَمأن بخأنیم و هو ایشتیوأیأن ایوأردِه نوکونیم، کی اَ آخرٚ روجأنٚ دورون کی دونیأ خو تومأمٚ بوستنَ نیزدیکَ بِه، ایتأ عیبرتٚ درس فأگیریم. 12 پس وأخب بیبید و فیکر نوکونید کی جٚه اَشأن بِیتر ایسید! شومأنم ایمکأن دأره گونأ دأمٚ دورون دکفید. 13 او وسوسه‌یأن و ایمتحأنأن کی شیمی ور اَیٚده، جٚه او وسوسه‌یأن و ایمتحأنأن کی البأقی آدمأن اونی دوچأر بٚده فرقی نأرِه. و خودا اَمین ایسه؛ اون ولأنه ویشتر جٚه اونچی کی تأنیدی ایمتحأن بیبید. ایمتحأنٚ وخت اون شٚمٚره جیویشتنٚ رأیٚم نیشأن دِهه کی اونَ طأقتم بٚدأرید. 14 پس اَی جأن و دیلأن، خٚیلی وأخب بیبید جٚه هر جور بُتٚ پرستئن بوگروزید. 15 شومأن دأنأ آدمأن ایسید؛ شومأن قیضأوت بوکونید اونچی کی گم دوروست ایسه یا نییٚه. 16 او پیأله کی خوداوندٚ شأمٚ وخت جٚه اون وأخوریم و اونی رِه برکتٚ دوعأ کونیمی، مگه اَ مأنی‌یَ نٚده اینفر کی جٚه اون وأخوره، مسیحٚ خونٚ برکتأن دورون شیریک بِه؟ و او نأن کی سأم بوکودیم کس‌کسٚ اَمرأ خوریم، مگه نیشأن نٚده کی اَمأن کس‌کسٚ اَمرأ مسیحٚ جأنٚ برکتأنٚ میأن شیریکیم؟ 17 اَمی آدم نفرأن هرچیٚم کم بٚبه، همٚتأن جٚه هو نأن خوریمی و نیشأن دیهیمی کی همه ایتأ جأنٚ عُصم و اعضأ ایسیم، ینی مسیحٚ جأن. 18 ایسرأییلٚ قومَ فأندرید، مگه اوشأنی کی جٚه قوربأنی گوشت خورٚده، اَ کأرٚ وأسی کس‌کسٚ اَمرأ متحید نٚبٚد؟ 19 پس می منظور چیسه؟ ینی می منظور اَن ایسه کی اَ بُتأن رأس‌رأسِی خودا ایسٚد؟ یا اَنکی قوربأنیأنی کی اوشأنَ پیشکش بٚده، ارزش دأرٚد و موهیم ایسٚد؟ 20 هیذره! می منظور اَن ایسه کی اوشأنی کی اَ بُتأنٚ رِه قوربأنی اَوٚرده، رأس‌رأسِی خوشأنَ، قوربأنیأنٚ اَمرأ شیطانَ پیشکش کونٚده نه خودایَ، و من نخأیٚم کی هیتأ جٚه شومأن، اَ قوربأنیأنٚ گوشتٚ خوردنٚ اَمرأ، شیطان اَمرأ شیریک بیبید. 21 شومأن نتأنیدی هم خوداوندٚ سٚفره پیأله جَا وأخورید و هم شیطان سٚفره پیأله جَا؛ هم جٚه خوداوندٚ سٚفره نأن بوخورید و هم جٚه شیطان سٚفره نأن. 22 چی خأیید بوکونید؟ مگه خأییدی خوداوندٚ غیظ و غضبَ شیمی ضد شوأله بدید؟ یا خأییدی نیشأن بدید کی جٚه اون توأنأتریدی؟ 23 شومأن گیدی: «تأنٚم هرتأ کأر بوکونم»، ولی بدأنید کی هرتأ کأر شِمِره فأیده نأرِه. گیدی: «تأنٚم هرتأ کأر بوکونم»، ولی هرتأ کأر بٚنأ بوستنٚ بأعیث نیبه. 24 نوأستی فقد شیمی فیکر بیبید؛ البأقیأن فیکرم بیبید و البأقیأنٚ نفع فیکرم بیبید. 25 پس تأنیدی اَ کأرَ بوکونید: هرتأ گوشتَ کی بأزأرٚ دورون فوروشده، بیهینید و بوخورید، وأنوٚرسید کی اَ گوشت بُتأنٚ رِه قوربأنی بوبوسته یا نه، کی شیمی ویجدأن نأرأحتَ نٚبه. 26 چونکی هوطو کی موقدسٚ کیتأبأن دورون بأمؤ: «زیمین و هرچی اونی دورون نٚهأ، خوداوند شین ایسه.» 27 اگه اینفر کی ایمأن نأرِه، شٚمٚره غذأ خوردنٚ رِه دعوت بوکونه، و خأییدی بیشید، جٚه هرچی کی سٚفره دورون نٚهأ بوخورید و هیچیٚم وأنوٚرسید. اَطویی شیمی ویجدأن رأحت بِه چونکی نأنیدی کی قوربأنی گوشت ایسه یا نییٚه. 28 ولی اگه اینفر شٚمٚره بٚگه کی اَ گوشت بُتأنٚ رِه قوربأنی بوبوسته، اوطویی، جٚه او گوشت نوخورید، چی او آدمٚ وأسی کی اَطو بوگفته، و چی ویجدأنٚ موضو وأسی. 29 اَ جریأن میأن اونی ویجدأن موهیم ایسه، نه شیمی ویجدأن. ولی ایمکأن دأره شومأن وأوٚرسید: «چٚره من وأستی البأقیأنٚ ویجدأنٚ وأسی، می دٚس و پأ دٚوٚسته بٚبه؟ 30 من خودایَ شوکر کونم و می غذأیَ خوشی اَمرأ خورٚم. پس چٚره وأستی مٚرَه محکوم بوکونٚد، اونم اَنٚ وأسی کی گومأن کونٚده ایشتیوأ کودأندرم؟» 31 شیمی سوألٚ جوأب اَن ایسه: تومأمٚ شیمی کأرأن، حتّا شیمی خوردن و وأخوردن، همه وأستی خودا جلال و بوزورگی رِه بٚبه. 32 پس بٚپأیید کی هیکسٚ رِه لغزستنٚ سنگ نیبید، نه یوهودیأنٚ رِه، نه اوشأنی کی یوهودی نییٚد رِه، نه مسیحیأنٚ رِه. 33 منم هه رأ روشَ اَمرأ پیش شٚم و حقٚ سعی زنٚم کی هرتأ کأرٚ میأن همٚتأنَ خوشألَ کونم. پس اونچی‌یَ کی دوس دأرم و یا می نفع ایسه‌یَ، انجأم نٚدم، بلکی او کأرَ کونم کی البأقیأنٚ نفع اونٚ میأن نٚهأ کی اَشأن نیجأت بیأفٚد. |
© 2024 Transform Iran
Transform Iran