اوّل قرنتیان 1 - Gilaki New Testament

¹ اَ دسخط جٚه پولسٚ ور ایسه کی خودا ایرأده اَمرأ اینتخأب بوبوسته کی عیسا مسیح روسول بٚبه و هطویم جٚه اَمی برأر سوستانیسٚ ور.

² اَ دسخطَ شٚمٚره قرنتس میأن خودا کیلیسا رِه نیویسٚم کی خودا شٚمٚره دعوت بوکوده کی اونی موقدس قوم بیبید. اون شومأن و هطویم تومأمٚ مسیحیأنَ کی هر تأ دِه جیگأ میأن اَمی خوداوند عیسا مسیحٚ نأمَ دؤخأنده، کی اَمی خوداوند و اَشأنٚ خوداوند ایسه، مسیح عیسا توسط تقدیس بوکوده.

³ جٚه اَمی پئر خودا، و اَمی خوداوند عیسا مسیح، شِمِره فیض و آرأمٚش خأیم.

قرنتیأنٚ ایمأنٚ رِه شوکر کودن

⁴ همیشٚک خودایَ شوکر کونم شیمی وجود رِه او فیضٚ وأسی کی عیسا مسیح شٚمٚره عطأ بٚفرمأسته.

⁵ چونکی اون شیمی کیلیسایَ جٚه هر ور پوربأر چأکوده – تومأمٚ شیمی قشنگٚ گبأن و تومأمٚ شیمی شنأخت و معرفتٚ اَمرأ.

⁶ اوچی کی اَمأن دروأره‌یٚ مسیح شٚمٚره بوگفتیم اوطو شیمی دورون ریشه بودووأنه

⁷ کی شومأن بتأنستید جٚه همٚتأ روحأنی عطأیأن بهره بٚبٚرید و هسأیٚم چوم‌بٚرأ و آمأده ایسأیید کی اَمی خوداوند عیسا مسیح وأگرده.

⁸ خودایٚم شیمی ایمأنَ تأ او روج کی عیسا مسیح وأگرده قأیم دأره، کی او روجٚ میأن هرتأ گونأ و خطأ جَا پأک و آزأد بٚحیسأب بأیید.

⁹ خودا اَ کأرَ اَمِرِه انجأم دِهه، چونکی اون خو وعده‌یأنٚ انجأم دئن دورون اَمین و وفادأر ایسه. اون هو خودایی ایسه کی شٚمٚره دعوت بوکوده کی اونی پٚسر عیسا مسیح، اَمی خوداوندٚ اَمرأ، ریفأقت و روحأنی ایتحأد بٚدأرید.

کیلیسا میأن سیوأیی

¹⁰ ولی اَی جأن و دیلٚ برأرأن، شٚمٚره ایلتمأس کونم اَمی خوداوند عیسا مسیحٚ نأمٚ اَمرأ جٚه بوگو موگو و دعوأ دٚس اوسأنید، حقٚ سعی بٚزنید کس‌کسٚ اَمرأ سأزش بٚدأرید کی شیمی میأن سیوأیی و شکأف بوجود نأیٚه. خأهیش کونم کی ایتأ فیکر و مقصد بٚدأرید.

¹¹ چونکی اَی جأن و دیلٚ برأرأن، چنتأ جٚه «خلویی» خأنوأر آدم نفرأن، مٚرَه خٚوٚر بٚدأده کی شیمی میأن بوگو موگو و سیوأیی نٚهأ

¹² اَطویی کی ایتأ عیده جٚه شومأن گده پولسٚ شأگرد ایسٚد و ایتأ دِه عیده‌یٚم گده کی «اَپلس» و یا «پطرسٚ» بألأخأ ایسٚد و ایتأ عیده‌یٚم ایدعأ کونٚده کی فقد مسیح شأگرد ایسٚد.

¹³ مگه مسیح تکس‌تکس بوبوسته؟ مگه اَن پولس بو کی شیمی گونأیأنٚ آمؤرزئن وأسی بوشؤ صلیبٚ جؤر؟ مگه اینفر جٚه شومأن ایسه کی پولسٚ نأم اَمرأ تعمید فأگیفته‌ بی؟

¹⁴ خودایَ شوکر کونم کی جغرز کریسپوس و گایوس، هیکس دِه جٚه شٚمٚره تعمید ندأم!

¹⁵ هنٚ وأسی، هیکس نتأنه بٚگه کی قصد دأشتیم ایتأ تأزه دأر و دسته «پولس کیلیسا» نأم اَمرأ چأکونم.

¹⁶ البت «ایستیفان» خأنوأرٚم تعمید بٚدأم. ولی دِه خأطر نأرٚم هیکسَ جغرز اَشأن تعمید بٚدأ بیم.

¹⁷ چونکی مسیح مٚرَه اوسه نوکوده کی مردومَ تعمید بدم، بلکی اینجیلٚ پیغأمَ وأگویا بوکونم. حتّا می موعیظه‌یأن اَندر گیرأیی نأرِه، چونکی قشنگ و فلسفی کلمه‌یأن ایستفأده نوکونم، نٚبه کی جٚه او قوّت و اَثر کی مسیحٚ صلیبٚ سأده پیغأمٚ دورون نٚهأ کمَ کونم.

مسیح، خودا حیکمت و قودرت

¹⁸ من خٚیلی خُب دأنٚم کی اوشأنی رِه کی شٚده هلاکتٚ ور، وختی ایشتأوده کی عیسا مسیح خو جأنَ صلیبٚ سٚر فٚدأ بوکوده کی اینسأنَ نیجأت بٚبخشه چندر نأدأنأنٚ کأرأنٚ مأنستَن ایسه. ولی اَمِرِه کی نیجأتٚ رأ دورون پیش دٚکفیم، اَ پیغأم خودا قودرتَ نیشأن دِهه.

¹⁹ چونکی موقدسٚ کیتأبأنٚ دورون بینیویشته بوبوسته: «عأقیلأنٚ عقلَ جٚه میأن بٚرٚم و فأمیده آدمأنٚ فأمَ بأطیلَ کونم.

²⁰ پس اَ عأقیلأن و دینی عألیمأن و فلسفه‌دأنأن کویه ایسأده کی دروأره‌یٚ دونیأ جولفٚ موضویأن بوگو موگو کونٚده؟ خودا اَشأنَ جأهیل چأکوده و نیشأن بٚدأ کی اوشأنٚ عقل و فأم عأطیل و بأطیل ایسه.

²¹ چونکی خودایی کی دأنأ ایسه صلاح ندأنسته کی آدمأن خوشأنٚ عقل و فأمٚ اَمرأ اونَ بٚشنأسٚد. بلکی اون اَمی میأن بأمؤ و تومأمٚ اوشأنی کی اونی پیغأمَ ایمأن بأوٚردٚد نیجأت بٚدأ، ینی هو پیغأم کی دونیأ مردوم، چی یوهودی بٚبٚد چی یوهودی نٚبٚد، اونَ پوچ و بی مأنی دأنٚده.

²² چونکی یوهودیأن اَنَ خأیده کی اَمی پیغأمَ ایتأ موجیزه اَمرأ ثأبیت بوکونیم و یونأنیأنٚم فقد او موضویأنَ کی اوشأنٚ فلسفه و فأمٚ اَمرأ ایتأ بٚبه قوبیل کونٚده.

²³ ولی اَمی پیغأم اَن ایسه کی مسیح اینسأنٚ نیجأتٚ رِه صلیبٚ جؤر فأکشه بوبوسته و بٚمٚرده؛ و اَ پیغأم یوهودیأنٚ رِه ایهأنت ایسه و یونأنیأنٚ رِه پوچ و بی‌مأنی.

²⁴ ولی اوشأنی کی جٚه خودا ور نیجأتٚ فأگیفتنٚ رِه دعوت بوبوستده، چی یوهودی چی یونأنی، خودا قودرت و عأقلأنه نقشه اوشأنٚ نیجأتٚ رِه، مسیح ایسه.

²⁵ خودا نیجأتٚ نقشه کی ایتأ عیده اونَ پوچ و بی‌مأنی دأنٚده، ویشتر عأقیلأنه ایسه جٚه عأقیل مردومٚ عأقیلٚ نقشه‌یأن؛ و مسیحٚ مٚردن صلیبٚ جؤر کی ایتأ عیده نظرٚ دورون خودا ضعفَ نیشأن دِهه، خٚیلی پورزورتر جٚه تومأمٚ اینسأنی قودرتأن ایسه.

²⁶ جأن و دیلٚ برأرأن و خأخورأن، خأطر بأوٚرید او زمأت کی مسیح شأگردی رِه دعوت بوبوستید، چی جأجیگأ میأن ایسأبید. خٚیلی جٚه شومأن اَ دونیأ معیأرأنٚ اَمرأ، عأقیل یا صأب نوفوذ یا جٚه ایتأ اصیلٚ خأنوأر نیبید.

²⁷ بلکی خودا اوشأنی‌یَ اینتخأب بوکوده کی شیمی مأنستَن دونیأ مردومٚ چومٚ میأن، نأدأن و ضعیف ایسٚد، کی جٚه اَ رأ اوشأنی کی عأقیل و پورقودرت بٚحیسأب اَیٚده، خجألت بٚده.

²⁸ خودا اوشأنی‌یَ اینتخأب بوکوده کی دونیأ معیأرأنٚ اَمرأ مردومٚ میأن جٚه ضعیف و پس‌بٚزِه آدمأن ایسٚد. هطویه، خودا هوشأنی‌یَ اینتخأب بوکوده کی دونیأ اَشأنَ هیچی نأنِه، کی نیشأن بٚده اوشأنی کی موهیم و پیله کس بیدِه بٚده، هیچ ایسٚد؛

²⁹ و اَطویی هیکس نتأنٚه خودا ورجأ گولأز بوکونه.

³⁰ اَن خودا بو کی شٚمٚره مسیحْ عیسایَ دوچوکأنه، و هطویم اون بو کی بأعیث بوبوسته مسیح اَمِرِه هو حیکمت بٚبه. مسیح اَمٚرَه عأدیل چأکوده، اَمٚرَه پأک و موقدس چأکوده و جٚه گونأ اَمٚرَه آزأدَ کود.

³¹ موقدسٚ کیتأبأنٚ میأن بأمؤ «اگه اینفر بٚخأیٚه ایچی رِه گولأز بوکونه، او کأر رِه گولأز بوکونه کی خوداوند بوکوده.»