Failimɔn 1 - EBƆRƐ BE KAWƆL

¹ Kawɔl ere shi ma, Pɔɔl nɛ n wɔ kabuti to ŋkpal Kristo Yesu so nɛ an kurgepo Timoti kutɔ nna a yɔ an teri lela nɛ an barkasa eshumpo Failimɔn

² nɛ an sipoche Apfia nɛ Akipes nɛ e la an barkasa soja na nɛ asɔriebi nɛ baa shɛr fo Failimɔn pe na kutɔ.

³ Ebɔrɛ be kuwɔr be kakɛ nɛ kagbenewushi nɛ k shi Ebɔrɛ an Tuto nɛ Enyɛnpe Yesu Kristo kutɔ na e baa wɔ menyi so.

Kabɔrɛkule nɛ kechɔrɔ be asheŋ

⁴ Saŋkama mee nyiŋi menyi kabɔrɛkule to nna nsaa chɔrɔ Ebɔrɛ ŋkpal menyi so.

⁵ Ŋkpal manɛ so, mee nu kasha nɛ yirda nɛ men kɔ a sa Enyɛnpe Yesu nɛ beyirdapoana na kikɛ be asheŋ.

⁶ Ma alɛ naa kule Ebɔrɛ fanɛ kananɛ menyee malga men be yirda be asheŋ a sa basa na beeŋ shin nɛ men nya kanyiasheŋ n ti so nseŋ pin asɔ lela damta nɛ an bɔla Kristo so a kɔ na kikɛ nyam.

⁷ Ekurgepo, kasha nɛ fo kɔ na leŋ ma to ga n shin nɛ ma kagbene fuli ma ga, ŋkpal manɛ so, fo leŋ beyirdapoana na to.

Pɔɔl ka kule n sa Onisimɔs be asheŋ

⁸ Ŋkpal Kristo so n nyi ŋ ka daa beeŋ tiŋ n nya kagbene ŋ kaŋɛ fo kusɔ nɛ k daga fanɛ fo wora,

⁹ ama kasha so nɛ ma Pɔɔl bel le nseŋ naa wɔ kabuti to ŋkpal Kristo Yesu so

¹⁰ a kule fo a sa m pibi Onisimɔs nɛ ŋ ki mo tuto abɔrɛsheŋ na be kaplɛa so ashi kabuti ere to nfe na.

¹¹ Saŋɛ na e daa maa kɔ tɔnɔ kikɛ a sa fo, ama naniere bre e kɔ tɔnɔ a sa ma nɛ fo kikɛ kashenteŋto.

¹² Mee bɛta mo nna a bar fo a sha fo ka pin fanɛ ma ere kutɔ ŋ gbagba be kaba nɛ mee ta a shoŋi fo na.

¹³ N daa beeŋ baa sha fanɛ e yili fo katelamu to nfe a shuŋ ma kabuti nɛ n wɔ to ŋkpal baru lela na so ere.

¹⁴ Ama m maa sha kelar fo kaman n wora kusɔ nɛ k maaŋ par fo nɛ fo gbagba be kelela e ki fanɛ tintiŋ be kusɔ, ama kusɔ nɛ k shi fo gbagba be kagbene to.

¹⁵ Shere kumo so nɛ e daŋ lar fo kutɔ nchɛnnyɔ na nɛ e naŋ ya bɛta m ba kaa wɔ fo kutɔ mbaanaayɔ.

¹⁶ Naniere e maŋ naa la kenya, e chɔ kenya. E ki ma nɛ fo kikɛ be ekurgepo shaso naniere. Mee sha mo ga, ama kasha nɛ feeŋ baa kɔ a sa mo beeŋ baa shi a chɔ meya ere, ŋkpal manɛ so, e la fo kenya nna nseŋ naa yirda Enyɛnpe na.

¹⁷ Amoso, nɛ fo baa nyi fanɛ ma nɛ fo la kukoŋwule nna, kumo ere fo sɔ mo fanɛ kananɛ fo daa beeŋ sɔ ma gbagba.

¹⁸ Nɛ fanɛ e wora fo kulubi ko nna ŋko n ji fo kukɔ, fo ta kumo be kukɔ na n deŋi ma.

¹⁹ Ma Pɔɔl gbagba e naa ta ma enɔ a sibɛ fo kede ere a kaŋɛ fo le na fanɛ meeŋ ka loŋ be kukɔ kikɛ, ma alɛ maaŋ bishi fo kɔnɔ kikɛ fanɛ fo alɛ gba ji ma kukɔ nna ŋkpal fo ŋkpa ere so.

²⁰ Amoso, ekurgepo, jande kpal Enyɛnpe na so n wora ma kelela. Leŋ ma to fanɛ fo kurgepo ashi Kristo to.

²¹ Ŋ ka bee sibɛ kawɔl ere a sa fo ere, m baa nyi geeŋ fanɛ feeŋ wora kusɔ nɛ mee kaŋɛ fo ere, hale n wora asheŋ nɛ a chɔ loŋ gba kuraa.

²² Kumo be kaman, lɔŋɛ ebu ko n yili ma, ŋkpal manɛ so, ŋ kɔ tama fanɛ Ebɔrɛ beeŋ nu men kikɛ be kabɔrɛkule nseŋ lara ma n sa menyi.

Ŋkela be kechɔrɔ be asheŋ

²³ Epafras nɛ e la m barkasa kabutipo ŋkpal Kristo Yesu so na bee chɔrɔ fo.

²⁴ Maak gba nɛ Aristaakes nɛ Diimas nɛ Luuk nɛ bumo kikɛ la m braana beshumpo na bee chɔrɔ fo.

²⁵ Enyɛnpe Yesu Kristo be kuwɔr be kakɛ e baa wɔ men be ayoyu to.