Nɔmbɛs 9 - EBƆRƐ BE KAWƆL

Kebansonchoŋ be kejigboŋ nyɔsopo na be asheŋ

¹ Israɛlebi na ka lar Ijipt be efuli so na be kafɛ nyɔsopo be kufɔl juŋkparso to nɛ Enyɛnpe Ebɔrɛ malga Mosis kutɔ ashi Sainai be keshishɛrsawule so ŋ kaŋɛ mo le:

^2-3 “Kufɔl juŋkparso ere be kachɛ kuduanasopo na be kaaseso a daga Israɛlebi na ka nyiŋi kebansonchoŋ be kejigboŋ na be mbraana kikɛ nseŋ m bɛ amo so n ji kumo.”

⁴ Ndoŋ nna nɛ Mosis kaŋɛ basa na fanɛ b nyiŋi kebansonchoŋ be kejigboŋ na nseŋ ji kumo.

⁵ Amoso kananɛ Enyɛnpe Ebɔrɛ daŋ kaŋɛ Mosis na gbagba chap nɛ b daŋ ji kumo kufɔl juŋkparso na be kachɛ kuduanasopo na ashi Sainai be keshishɛrsawule na so.

⁶ Basa na be beko daŋ wora eyurpi nna daŋkare be ekpa so ŋkpal b ka beta ebuni so. Amoso b daa maŋ tiŋ n ji kebansonchoŋ be kejigboŋ na loŋ be kachɛ na. Ndoŋ nna nɛ b yɔ Mosis nɛ Ɛɛrɔn kutɔ

⁷ n ya kaŋɛ bumo le: “An wora eyurpi ŋkpal an ka beta ebuni so nna, ama manɛ nna nɛ anyi maaŋ tiŋ n ji kebansonchoŋ be kejigboŋ na nseŋ lara anyi be esarga m ba sa Enyɛnpe Ebɔrɛ loŋ be kachɛ na fanɛ kananɛ an braana Israɛlebi na wora na?”

⁸ Ndoŋ nna nɛ Mosis kaŋɛ bumo le: “Men jo n ya fo saŋɛ nɛ meeŋ nu kusɔ nɛ Enyɛnpe Ebɔrɛ na kɔ nɛ e kaŋɛ a laŋɛ menyi be kaplɛa so.”

⁹ Kumo be kaman nɛ Enyɛnpe Ebɔrɛ kaŋɛ Mosis

¹⁰ fanɛ e kaŋɛ Israɛlebi na le: “Nɛ fanɛ menyi to be eko ŋko menyi be kaman to ebi ko wora eyurpi ŋkpal b ka beta ebuni so ŋko b wɔ ekpa wɔfɔ be enite to, bumo alɛ nsaa sha keji kebansonchoŋ be kejigboŋ na,

¹¹ kumo ere b ji kumo kufɔl nyɔsopo na to be kachɛ kuduanasopo na be kaaseso. Kumo alɛ daga b ka ta bodobodo nɛ a maŋ kɔ yiisi nɛ afantaŋ nɛ a du kekra n ti kebansonchoŋ be kpakpafɔlbi na so nna ji n kumo.

¹² Ajibi na maŋ daga keyili ŋklade. Bumo alɛ e sa maŋ kaŋ bure kpakpafɔlbi na be kuwibi kama to. K daga fanɛ b bɛ kebansonchoŋ be mbra na so.

¹³ Ama nɛ fanɛ esa walɛ so daŋkare be ekpa so mo alɛ nsaa maa wɔ enite to nseŋ kini kebansonchoŋ be kejigboŋ na be keji, kumo ere m maŋ naa ber mo a ti ma basa so, ŋkpal e ka kini kelara sarga n sa ma saŋɛ nɛ k daga so. Mo alɛ beeŋ nya mbe kulubi be kasogberge

¹⁴ Kadetobia ŋko efɔ kama nɛ e wɔ menyi to nsaa sha keji kebansonchoŋ be kejigboŋ na daga fanɛ e bɛ kumo be mbraana kikɛ so nɛnɛ nna n ji kumo.”

^15-16 Kachɛ nɛ b yuu Enyɛnpe be wajɛbu na, awɔlpa daŋ ba buu kumo kikɛ so nna a wɔ ndoŋ. Kanyɛ baŋ biri kuwɔlpa na bee kilgi nna n duli fanɛ edɛ na.

¹⁷ Saŋkama nɛ kuwɔlpa na baŋ tia, Israɛlebi na malɛ bee kaa nna a bɛ kumo so n ya wora bumo be keeyi to kaplɛkama nɛ kuwɔlpa na beeŋ yili.

¹⁸ Amoso Enyɛnpe Ebɔrɛ na e naa kaŋɛ Israɛlebi na saŋɛ nɛ baa kaa nɛ saŋɛ nɛ baa wora bumo be keeyi to. Bumo alɛ bee kaa wɔ keeyi na to nna hale n ya fo kachɛ nɛ kuwɔlpa na beeŋ tia.

¹⁹ Nchɛ kama nɛ kuwɔlpa na beeŋ yili Enyɛnpe be wajɛbu na be esoso n ya fo, Israɛlebi na malɛ bee wora Enyɛnpe Ebɔrɛ kasonu nna n chena ndoŋ.

²⁰ Saŋko kuwɔlpa na beeŋ tiŋ a wɔ wajɛbu na so n nchɛ gbrɛbi ko. Saŋkama nɛ k baa wɔ ndoŋ, basa na gba wɔ keeyi na to nna. K ba naŋ tia malɛ, bumo alɛ gba bee kaa keeyi na to nna. Kanaŋ kama nɛ Enyɛnpe Ebɔrɛ na baŋ kaŋɛ, aloŋ nɛ baa wora.

²¹ Saŋko malɛ kuwɔlpa na bee yili kanyɛso nna n ya fo kachipurso nawule. Saŋkama malɛ nɛ k baŋ tia, bumo alɛ gba bee kaa keeyi na to nna m bɛ kumo so a yɔ.

²² Hale nchɛ anyɔ ŋko kufɔl ŋko kafɛ gba nɛ kuwɔlpa na buu wajɛbu na so, bumo alɛ gba baa wɔ keeyi na to nna. Ama k baŋ tia, bumo alɛ gba bee kaa nna m bɛ kumo so.

²³ Kaplɛkama malɛ nɛ Enyɛnpe Ebɔrɛ baŋ ŋini Mosis fanɛ b yɔ, ndoŋ nɛ baa yɔ.