Nɔmbɛs 8 - EBƆRƐ BE KAWƆL

Efitilatɔl na be eyilikpa be asheŋ

¹ Le nɛ Enyɛnpe Ebɔrɛ daŋ kaŋɛ Mosis,

² “Kaŋɛ Ɛɛrɔn fanɛ e kaŋ chɔɔ efitila ashunu na so, e ta amo n yili kefitilatɔl na so nɛ a baa fulto kumo be anishito.”

³ Nɛ Ɛɛrɔn chɔɔ efitila na so n yili kefitilatɔl na so n shoŋi anishito fanɛ kananɛ Enyɛnpe Ebɔrɛ kaŋɛ na.

⁴ Kananɛ Enyɛnpe Ebɔrɛ daŋ kaŋɛ Mosis na gbagba chap nɛ e ta shuwa m bɛl n lɔŋɛ kefitilatɔl na kikɛ.

Livaiebi na b keta m bɔɔ Ebɔrɛ enɔ be asheŋ

⁵ Nɛ Enyɛnpe Ebɔrɛ naŋ kaŋɛ Mosis le:

⁶ “K daga fo ka lara Livaiebi na ashi Israɛlebi na to ŋ kɔr nseŋ shin nɛ b fɔr bumo be amu so daŋkare be ekpa so.

⁷ Ale nɛ feeŋ wora: Feeŋ ta alubi be kefɔrso n lar daŋkare be ekpa so be nchu na ŋ ŋmenyaŋ bumo so, kumo be kaman nɛ fo shin nɛ b she bumo be eyur so be afuibi kikɛ nseŋ fɔr bumo be epiŋi pɔɛŋ nseŋ nyalɛ so daŋkare be ekpa so.

⁸ Kede be kaman nɛ fo shin nɛ b bar egbolu fɔlbi anyɔ nɛ ayu nyifu nɛ b ta ɔlif be ŋku m baga amo.

⁹ Kumo be kaman nɛ fo tre Israɛlebi na kikɛ n shɛr nseŋ shin nɛ Livaiebi na e lar n yili ma Enyɛnpe be wajɛbu na be anishito,

¹⁰ nɛ Israɛlebi na kikɛ e ta bumo be enɔana n deŋi n deŋi Livaiebi na be amu so.”

¹¹ Kumo be kaman nɛ Ɛɛrɔn e ta Livaiebi na fanɛ kakɛ lela m bɔɔ ma enɔ nɛ b baa shuŋ ma kushuŋ.

¹² Nɛ Livaiebi na e ta bumo be enɔana n deŋi deŋi egbolu anyɔ na so, kumo be kaman nɛ b ta kuko n lara alubi be ketampaŋ be sarga nseŋ ta kuko malɛ n lara sarga chɔɔso, saŋɛ na so Livaiebi na beeŋ fɔr so n lar daŋkare be ekpa so.

¹³ “Shin nɛ Livaiebi na e yili Ɛɛrɔn nɛ mbe mbinyɛnsobi na be anishito nɛ b ta bumo m bɔɔ ma enɔ.

¹⁴ Kumo be loŋ e naaŋ ŋini fanɛ Livaiebi la meya nna nsaa kɔr Israɛlebi nɛ b ka na to.

¹⁵ Fo baŋ fɔr Livaiebi na so nseŋ ta bumo m bɔɔ ma enɔ n loge na pɔɛŋ, nɛ baaŋ tiŋ a shuŋ ashi wajɛbu na to.

¹⁶ Bumo e naaŋ baa la ma peya, ŋkpal manɛ so, bumo e naaŋ yili Israɛlebi be ewurkoŋnyɛn na be katelamu to n sa ma.

¹⁷ Ŋ ka daŋ mɔ Ijiptebi be ewurkoŋnyɛn na, nɛ n yili kumo fanɛ Israɛlebi na be ewurkoŋnyɛn nɛ bumo be asɔbɔya be ewurkoŋnyɛn kikɛ la ma peya nna.

¹⁸ Ama naniere bre Livaiebi na nɛ n lara n yili Israɛl be ewurkoŋnyɛn na be katelamu.

¹⁹ Ma alɛ lara Livaiebi nna fanɛ kakɛ ashi Israɛlebi na to n sa Ɛɛrɔn nɛ mbe mbinyɛnsobi na nɛ b yili Israɛlebi na be katelamu to a shuŋ Enyɛnpe be wajɛbu na to saŋɛ na so Israɛlebi na maaŋ ba kumo ase nɛ aleblawu e ba bumo so.”

²⁰ Ndoŋ nna nɛ Mosis nɛ Ɛɛrɔn nɛ Israɛlebi na kikɛ ta Livaiebi na n bɔɔ Enyɛnpe Ebɔrɛ enɔ fanɛ kananɛ Enyɛnpe Ebɔrɛ kaŋɛ Mosis na gbagba.

²¹ Kumo be kaman nɛ Livaiebi na fɔrso n lar daŋkare be ekpa ŋ ki cheembi nseŋ fɔr bumo be asɔbuuso. Ndoŋ nna nɛ Ɛɛrɔn ta bumo m bɔɔ Enyɛnpe Ebɔrɛ na enɔ fanɛ kakɛ lela nɛ b nya alubi be ketampaŋ.

²² Ade kikɛ be kaman nɛ basa na wora kusɔ kama nɛ Enyɛnpe Ebɔrɛ kaŋɛ Mosis fanɛ e kaŋɛ bumo kenishipereso a yɔ Livaiebi na be kaplɛa so na. Nɛ Livaiebi na fara a chɛ Ɛɛrɔn nɛ mbe mbinyɛnsobi to a shuŋ Enyɛnpe be wajɛbu na to.

²³ Nɛ Enyɛnpe Ebɔrɛ naŋ kaŋɛ Mosis le:

²⁴ “Livai be enyɛn kama nɛ e fo nfɛ adunyɔ nɛ anu ŋko m baŋ so e naaŋ tiŋ n shuŋ Enyɛnpe be wajɛbu na to.

²⁵ Ama nɛ e baŋ fo nfɛ adunu bre a daga e yige kushuŋ na nseŋ ya wushi.

²⁶ Kumo be kaman e beeŋ tiŋ a chɛ mo braana Livaiebi na to a shuŋ bumo be ashuŋ Enyɛnpe be wajɛbu na to, ama b sa maŋ naa chige ashuŋ a sa mo ere gbagba nɛ e baa shuŋ mbe kumu so. Kananɛ k daga fo ka bee barga ashuŋ to a sa Livaiebi na nna na.”