Nɔmbɛs 6 - EBƆRƐ BE KAWƆL

Mbra nɛ a dese n sa esa nɛ e la Ebɔrɛ peya be asheŋ

¹ Enyɛnpe Ebɔrɛ daŋ kaŋɛ Mosis nna fanɛ

² e kaŋɛ Israɛl be basa le: “Benyɛn ŋko beche kama nɛ baa sha keta bumo be amu m bɔɔ Enyɛnpe Ebɔrɛ enɔ a wɔtɔ n sa Ebɔrɛ nawule ŋ ki ‘Nazarin’ na,

³ maŋ daga fanɛ b nuu nsa kpakpaso be yiri kikɛ fanɛ amo nɛ b ta asɔrso nɛ baa tre greep n wora na. Bumo alɛ e sa maŋ kaŋ ji asɔrso nɛ baa tre greep na be awushiso ŋko amo be awɔlso gba.

⁴ Bumo alɛ e sa maŋ kaŋ ji asɔrso na be kudebi ŋko kumo be kebi jemanɛ nɛ b wɔtɔ n sa Ebɔrɛ nawule na.

⁵ Baŋ yili jemanɛ nɛ b nase nnɔ fanɛ baaŋ baa wɔtɔ n sa Enyɛnpe Ebɔrɛ nawule na n ya fo kumo be ekar, a maŋ daga fanɛ b she bumo be emin. B yige emin na nɛ a daŋ nteŋ.

^6-7 Bumo be emin tenteŋ na e naa ŋini b ka ta bumo be amu m bɔɔ Enyɛnpe Ebɔrɛ enɔ. A maŋ daga b baa luri bubuni so. Hale bumo tutoana ŋko bumo nioana ŋko bumo siponyɛnana ŋko besipocheana gba be kebuni. Saŋɛ na so b maaŋ ta bumo be amu n wɔtɔ eyurpi to.

⁸ Ŋkpal manɛ so, jemanɛ nɛ b lara bumo be amu n yili fanɛ b wɔtɔ nna n sa Ebɔrɛ nawule na, b la Enyɛnpe Ebɔrɛ na peya nna.

⁹ Nɛ fanɛ esa ko wu luwu purgiase bumo be eko be anishito gba nna, mbe emin tenteŋ nɛ a bee ŋini fanɛ b wɔtɔ nna n sa Enyɛnpe Ebɔrɛ nawule na e wora eyurpi daŋkare be ekpa so nseŋ daga fanɛ e she amo kumo be nchɛnshunu be kaman, saŋɛ na so e fɔr so n lar daŋkare be ekpa so.

¹⁰ Kumo be kachɛ burwasopo na nɛ e ta elepɔ anyɔ ŋko ali anyɔ m ba sa bɔrɛmatapo na ashi Enyɛnpe Ebɔrɛ na be wajɛbu na be kabuna to.

¹¹ Ndoŋ nna nɛ bɔrɛmatapo na e ta mbuibi na be eko n lara kulubi be sarga nseŋ ta eko malɛ n lara sarga chɔɔso ŋ kule kulubi be ketampaŋ n sa bumo, ŋkpal esa ka wu mbe anishito so. Kumo be kamɔnchɛ kikɛ nɛ e naŋ ta mbe amu n yili cheembi n sa Ebɔrɛ,

¹² nseŋ naŋ ta mbe kumu n yili fanɛ esa nɛ e wɔtɔ n sa Ebɔrɛ nawule. Kumo be kaman nɛ e ta kpakpa nɛ k fo kafɛ m ba lara kejintɔr be sarga ŋkpal e ka daŋ barga mbe amu Enyɛnpe Ebɔrɛ na kutɔ jemanɛ ko so.

¹³ Jemanɛ nɛ e nase nnɔ fanɛ e baa wɔtɔ n sa Enyɛnpe Ebɔrɛ nawule na baŋ fo ekar e beeŋ yɔ Enyɛnpe be wajɛbu na be kabuna to

¹⁴ n ya ta asɔbɔya asa nɛ a maŋ kɔ ndulgi amo so n lara sarga n sa Enyɛnpe Ebɔrɛ. Baaŋ ta kpakpafɔlbi nɛ k fo kafɛ n lara sarga chɔɔso, n ta kubolpɔche nɛ k fo kafɛ n lara alubi be ketampaŋ be sarga nseŋ ta kpakpa nɛ k daŋ n yili n lara kɔnɔkoŋwule be sarga.

¹⁵ A daga fanɛ b ta bodobodo nɛ a maŋ kɔ yiisi nɛ b ta nyifu nɛ ɔlif be ŋku n wora na kelantaŋɛ be bɔlɔ nɛ ekrakashi nɛ amo alɛ gba maŋ kɔ yisi na nɛ ayu nɛ asɔnuuso n ti asɔbɔya na so n lara sarga na.

¹⁶ Bɔrɛmatapo na beeŋ ta kpakpafɔlbi na nɛ kebolpɔche na n lara alubi be ketampaŋ be sarga nɛ sarga chɔɔso n sa Enyɛnpe Ebɔrɛ.

¹⁷ Kumo be kaman nɛ e ta kpakpa nɛ k daŋ n yili na nɛ bodobodo kelantaŋɛ na nɛ ayu na nɛ asɔnuuso na n lara kɔnɔkoŋwule be sarga n sa Enyɛnpe Ebɔrɛ.

¹⁸ Ade kikɛ be kaman nɛ esa nɛ e ta mbe kumu n yili n sa Enyɛnpe Ebɔrɛ nawule na e she mbe kumu ashi Enyɛnpe be wajɛbu na be kabuna to nseŋ ta emin na n wɔtɔ kɔnɔkoŋwule be sarga be edɛ na to n chɔɔ.

¹⁹ B baaŋ daŋɛ kpakpa na be keba nɛ k bel, nɛ bɔrɛmatapo na e ta kumo nseŋ lara bodobodo nɛ krakashi koŋwule ashi kelantaŋɛ na to m bɔɔ esa nɛ e ta mbe kumu n yili n sa Enyɛnpe Ebɔrɛ na enɔ.

²⁰ Kumo be kaman nɛ bɔrɛmatapo na e sɔ amo n ya sa Enyɛnpe Ebɔrɛ fanɛ kakɛ lela nɛ k ki sarga cheembi na, nseŋ ta amo n ti kpakpa na be kagbene nɛ kebɛaŋ nɛ a la bɔrɛmatapo peya mbra be ekpa so na so. Kede be kaman, e maaŋ naa la esa nɛ e ta mbe kumu n yili n sa Enyɛnpe Ebɔrɛ na nawule nsaa beeŋ tiŋ a nuu nsa.

²¹ Mbra nɛ a dese n sa basa nɛ b ta bumo be amu n yili n sa Enyɛnpe Ebɔrɛ na nawule nɛ baa tre bumo ‘Nazarin’ na nna na. Ama esa nɛ e ta mbe kumu n yili n sa Enyɛnpe Ebɔrɛ na nawule na beeŋ tiŋ n lara sarga nɛ k chɔɔ ade, nɛ e beeŋ tiŋ nna na. Kɔnɔ pɔtɛ kama malɛ nɛ b nase n ti so, daga fanɛ b ka kumo m bɔlɔ so.”

²² Nɛ Enyɛnpe Ebɔrɛ naŋ kaŋɛ Mosis

²³ fanɛ e kaŋɛ Ɛɛrɔn nɛ mbe mbinyɛnsobi fanɛ

²⁴ b baa kule le be kabɔrɛkule a sa Israɛlebi na: “Enyɛnpe Ebɔrɛ na e nɛfa menyi nsaa kuŋ menyi.

²⁵ Enyɛnpe Ebɔrɛ na be kelela nɛ mbe kuwɔr be kakɛ e baa wɔ menyi so.

²⁶ Enyɛnpe Ebɔrɛ na be kuwɔr nɛ mbe kagbenewushi e baa wɔ menyi so.”

²⁷ “Ŋkpal manɛ so, b baŋ ta ma ketre ŋ kule nɛfa n sa Israɛlebi na, ma alɛ beeŋ nɛfa bumo.”