Nɔmbɛs 5 - EBƆRƐ BE KAWƆL

Basa nɛ b kɔ eyurpi be asheŋ

¹ Nɛ Enyɛnpe Ebɔrɛ kaŋɛ Mosis le:

² “Kaŋɛ Israɛlebi na kenishipereso fanɛ b ju bekama nɛ b wora eyurpi daŋkare be ekpa so ŋkpal b ka bee lɔ keboti ŋko babaso ŋko m beta kusɔ wuso ashi bumo be keeyi to so.

³ Men ju benyɛn nɛ beche kama nɛ b wora eyurpi daŋkare be ekpa so, saŋɛ na so b maaŋ jija keeyi mo nɛ ma nɛ menyi kikɛ wɔ kumo to na.”

⁴ Ndoŋ nna nɛ Israɛlebi bɛ kusɔ nɛ Enyɛnpe Ebɔrɛ kaŋɛ Mosis na so nseŋ ju loŋ be basa kikɛ ashi keeyi na to.

Alubi be kasogberge be asheŋ

⁵ Nɛ Enyɛnpe Ebɔrɛ naŋ kaŋɛ Mosis fanɛ

⁶ e kaŋɛ Israɛlebi na fanɛ, esa kama nɛ e wora n da mo barkasa so wora n da mo Enyɛnpe Ebɔrɛ na gba so nna na.

⁷ Amoso amodoŋwura daga fanɛ e bugi to ŋ kaŋɛ mbe kulubi nseŋ ka esa nɛ e wora n da so na be kusɔ kama nɛ e jija nɛ kumo kalfa to be adunyɔ so n ti so na n tal to.

⁸ Ama nɛ esa nɛ b wora n da so na wu nna nsaa maa kɔ ekurgepo kama nɛ baaŋ ka kukɔ na n sa, kumo ere asɔ na ki Enyɛnpe Ebɔrɛ peya na nna na nseŋ daga fanɛ b ta kpakpa nɛ baaŋ ta n lara alubi be ketampaŋ be sarga n ti amo so ŋ ka n sa bɔrɛmatapo na pɔɛŋ nɛ esa na e nya alubi be ketampaŋ.

⁹ Sarga cheembi kama nɛ Israɛlebi na bar Enyɛnpe Ebɔrɛ na la bɔrɛmatapoana na peya nna.

¹⁰ Kakɛ kama malɛ nɛ b ta n sa bɔrɛmatapo kikɛ na la mo gbagba peya nna.

Beche nɛ bumo kulana maŋ yirda bumo be asheŋ

¹¹ Nɛ Enyɛnpe Ebɔrɛ naŋ kaŋɛ Mosis kenishipereso fanɛ

^12-14 e kaŋɛ Israɛlebi na fanɛ nɛ k ba fanɛ enyɛn maŋ wora mbe eche yirda ŋkpal e ka bee fɛ fanɛ eche na bee ji kubojua nna so,

¹⁵ kumo ere, k daga enyɛn na ka keta eche na nseŋ ta aboyunyifu kurwa koŋwule n ti so n yɔ bɔrɛmatapo kutɔ n ya sulge eche na so. Ama a maŋ daga e ka ta ɔlif be ŋku ŋko duwu n ti amo so, ŋkpal manɛ so, kukɔrkɔ be kesulge be sarga nna.

¹⁶ Bɔrɛmatapo na beeŋ shin nɛ eche na e ba yili bɔrɛsure na be anishito

¹⁷ nseŋ chulgi nchu cheembi n wɔtɔ kaba to nseŋ jɔ wajɛbu na to be shishɛr n wɔtɔ nchu na to nɛ a ki kekra.

¹⁸ Kumo be kaman nɛ eche na e deŋi mbe shata nseŋ ta sarga nɛ b kɔ aboyunyifu a lara na ŋ keta, nɛ bɔrɛmatapo na malɛ e keta kaba na nɛ nchu kekra nɛ a bee bar kɔnɔsho na.

¹⁹ Kede be kaman nɛ bɔrɛmatapo na e kaŋɛ le: “Nɛ fo maŋ ji kubojua bre, nchu kekra ere maaŋ bar fo tɔrɔ.

²⁰ Ama nɛ fo ji kubojua nna bre,

²¹ Enyɛnpe Ebɔrɛ beeŋ shin nɛ fo ki fanɛ esa nɛ b sho kɔnɔ fo basa to. E beeŋ shin nɛ fo ki egbentepo nɛ fo epun malɛ gba e tiŋ.

²² Nchu ere e naŋ shin nɛ fo epun e tiŋ nɛ fo ki egbentepo malɛ gba n ti so.” Ndoŋ nna nɛ eche na e shuli so ŋ kaŋɛ le: “Mm, ma alɛ gba shuli loŋ.”

²³ Kumo be kaman nɛ bɔrɛmatapo na e sibɛ kawɔl so nseŋ fɔr nsibɛ na n wɔtɔ nchu kekra na to,

²⁴ nseŋ shin nɛ eche na e nuu nchu na nɛ kɔnɔsho na e pɛ mo nɛ e ji ebesa ga.

²⁵ Nɛ bɔrɛmatapo e sɔ aboyunyifu be sarga na ashi kache na be enɔ to m maŋ amo so ŋ ŋini Ebɔrɛ nseŋ ta amo m bɛ bɔrɛsure na so.

²⁶ Kede be kaman nɛ e jɔ aboyunyifu na enɔ be bɔlɔ n deŋi bɔrɛsure na so n chɔɔ nseŋ shin nɛ eche na e nuu nchu na.

²⁷ Nɛ k la kashenteŋ nna fanɛ eche na lar mo kul be kaman n jija ebu, nchu nɛ e nuu na beeŋ shin nɛ mbe eyurto e baa besa mo ga, nɛ mbe epun e tiŋ nɛ e ki egbentepo ŋko nɛ mbe adampu e baa gboŋi nɛ e ki fanɛ esa nɛ b sho kɔnɔ ashi mbe basa to.

²⁸ Ama nɛ fanɛ eche na maŋ jija ebu bre, kumo ere shɛŋ shɛŋ maaŋ wora mo. Mo alɛ beeŋ kurge mbia.

^29-30 Mbra nɛ k dese n sa enyɛn kama nɛ e maŋ yirda mbe eche nsaa fɛ fanɛ eche na bee ji kubojua nna na. Bɔrɛmatapo na beeŋ shin nɛ eche na e ba yili bɔrɛsure na be anishito nɛ e wora le be daŋkaresheŋ ere.

³¹ Nɛ enyɛn na wora loŋ, kumo be kulubi maŋ bɛ mo so, ama nɛ fanɛ eche na wora n da so nna e beeŋ nya kumo be kasogberge.