Nɔmbɛs 4 - EBƆRƐ BE KAWƆL

Kohaf be kabuna ebi nɛ b ti Livaiebi so be kushuŋ be asheŋ

¹ Enyɛnpe Ebɔrɛ daŋ kaŋɛ Mosis nɛ Ɛɛrɔn nna fanɛ

² b karga Livaiebi nɛ b shi Kohaf be kabuna na, kanaŋ kanaŋ so,

³ nseŋ sibɛ benyɛn nɛ b fo yili nfɛ adesa n ya fo nfɛ adunu nsaa beeŋ tiŋ n shuŋ Enyɛnpe Ebɔrɛ be wajɛbu na to na be atre n wɔtɔ kawɔl to.

⁴ Kohafebi na be kushuŋ e la kebaakeni asɔ cheembi nɛ a wɔ Enyɛnpe be wajɛbu na to so.

⁵ Enyɛnpe Ebɔrɛ daŋ kaŋɛ Mosis nna fanɛ nɛ b kaa shin nɛ b kaa bumo be keeyi to, b shin nɛ Ɛɛrɔn nɛ mbe mbinyɛnsobi e luri n saŋɛ patisa nɛ k kuŋ ŋkre be deka nɛ k wɔ kakpa cheembi na nɛ wajɛbu to na nseŋ ta kumo m buu deka na so.

⁶ Kumo be kaman nɛ b ta kusɔbɔya be kawɔl lela m parga m buu kumo so, nseŋ parga wajɛ nɛ k la buru gbagba n deŋi so n ti so pɔɛŋ nseŋ ta ndibi nɛ baa pɛ to a sulɔ kumo na n yisi n wɔtɔ amo be kakpa.

⁷ Kede be kaman nɛ Ɛɛrɔn nɛ mbe mbinyɛnsobi na e naŋ ta wajɛ nɛ k la buru m parga m buu Enyɛnpe Ebɔrɛ be teebɔl nɛ baa ta bodobodo cheembi nɛ duwu be ntishaŋ, nɛ ntishaŋ nɛ baa ta sarga be asɔ a wɔtɔ na, nɛ ekɔlba nɛ baa ta sarga be yabra belbelso a wɔtɔ a bɛ so na so. A daga fanɛ bodobodo e baa wɔ loŋ be teebɔl na so saŋkikɛ.

⁸ A daga b ka parga wajɛ peper m buu teebɔl na nɛ asɔ nɛ a wɔ kumo so na so nseŋ naŋ ta kusɔbɔya be kawɔl lela m parga m buu amo so n ti so pɔɛŋ nseŋ yisi ndibi nɛ baa pɛ to a maŋ kumo so na n wɔtɔ amo be kakpa.

⁹ A daga fanɛ b ta wajɛ buru m buu kefitilatɔl na nɛ kumo be ayabi nɛ asɔ nɛ baa ta a lɔŋɛ kefitilatɔl na so nɛ epelɛlɛ, nɛ ɔlif be ŋku be ekɔlba na so.

¹⁰ Kede be kaman nɛ b ta kusɔbɔya be kawɔl lela m buu amo kikɛ nyam so nseŋ ta kumo n deŋi kusɔ sulɔ asɔ so.

¹¹ Kumo alɛ be kaman nɛ b parga wajɛ buru n deŋi shuwa be bɔrɛsure na so nseŋ ta kusɔbɔya be kawɔl lela m parga m buu kumo so n ti so pɔɛŋ nseŋ ta ndibi nɛ baa ta a sulɔ kumo na n wɔtɔ amo be kakpa.

¹² Kumo be kaman nɛ b ta wajɛ buru m buu asɔjito nɛ b kɔ a shuŋ kakpa cheembi na to na so nseŋ ta kusɔbɔya be kawɔl lela m buu so n ti so pɔɛŋ n ta amo n deŋi kusɔ sulɔ asɔ na so.

¹³ A daga fanɛ b muu nsunɔ na ashi danyaŋ be bɔrɛsure na so pɔɛŋ nseŋ ta wajɛ peper kunɔkunɔ m parga m buu kumo so.

¹⁴ Ade kikɛ be kaman nɛ b ta asɔ nɛ b kɔ a chɔɔ edɛ na, nɛ anyembi chule eblaŋ na, nɛ shabɔl nɛ ntishaŋgboŋ nɛ b kɔ a shuŋ bɔrɛsure na ase na kikɛ n deŋi wajɛ peper na so, nseŋ ta kusɔbɔya be kawɔl lela m parga m buu amo so pɔɛŋ nseŋ ta ndibi nɛ baa ta a wɔtɔ kumo to a sulɔ na n wɔtɔ amo be kakpa.

¹⁵ Saŋɛ baŋ fo fanɛ b kaa keeyi to, Kohafebi na e daga fanɛ b sulɔ asɔ cheembi na nɛ wajɛbu na be asɔ kikɛ. Ama Ɛɛrɔn nɛ mbe mbinyɛnsobi e daga fanɛ b ta asɔ m buu asɔ cheembi na so nɛnɛ pɔɛŋ nɛ b ta amo n sulɔ, saŋɛ na so b maaŋ beta amo nseŋ wu. Amoso saŋkama nɛ b kaa keeyi to, wajɛbu na nɛ kumo to be asɔ kikɛ be kesulɔ be kushuŋ la Kohaf be kabuna ebi peya nna.

¹⁶ Bɔrɛmatapo nimuso Ɛɛrɔn pibinyɛn, Eliaza e daga fanɛ e baa keni ŋku nɛ baa ta a wɔtɔ efitila na to nɛ eduwu nɛ esargajibi nɛ ŋku nɛfaso nɛ kusɔ kama nɛ k wɔ wajɛbu na to nsaa la Enyɛnpe Ebɔrɛ na peya na so.

¹⁷ Nɛ Enyɛnpe Ebɔrɛ naŋ kaŋɛ Mosis nɛ Ɛɛrɔn le:

¹⁸ “Men sa maŋ shin nɛ Kohafebi na

¹⁹ e taga asɔ cheembi na to saŋɛ nɛ b maŋ naŋ buu amo so, mannɛ aloŋ, baaŋ wu. Amoso men shin nɛ Ɛɛrɔn nɛ mbe mbinyɛnsobi e tu Kohafebi na n luri wajɛbu na to ŋ ŋini bumo be ekama kusɔ nɛ e beeŋ sulɔ.

²⁰ Hale nɛ Kohafebi na luri wajɛbu na to n ya tu bɔrɛmatapoana na nɛ b kraa buu asɔ cheembi na gba, baaŋ wu.”

Gɛshɔn be kabuna ebi nɛ b ti Livaiebi na so be kushuŋ be asheŋ

²¹ Nɛ Enyɛnpe Ebɔrɛ naŋ kaŋɛ Mosis fanɛ

²² e karga Gɛshɔn be kabuna ebi nɛ b ti Livaiebi so na kanaŋ kanaŋ so,

²³ nseŋ sibɛ benyɛn nɛ b fo nfɛ adesa n ya fo nfɛ adunu nsaa beeŋ tiŋ n shuŋ Enyɛnpe Ebɔrɛ be wajɛbu na to na be atre n wɔtɔ kawɔl to.

²⁴ Gɛshɔn be kabuna ebi na be kushuŋ a naaŋ baa la kebaasulɔ

²⁵ wajɛbu na nɛ kumo be kabuna to be patisa na nɛ acheembiana to be kakpa cheembi na be kabuna to be patisa na nɛ kusɔbɔya be kawɔl lela nɛ baa yuu a kulti kumo na

²⁶ nɛ kelɔnɛ na be epatisa nɛ a chambɔ wajɛbu na, nɛ bɔrɛsure na nɛ kumo be efɔlana nɛ kelɔnɛ na be kabuna to be patisa na, nɛ asɔ kama nɛ baa ta a wora kumo be asheŋ na kikɛ. Gɛshɔn be kabuna ebi na e naaŋ baa shuŋ le be ashuŋ ere kikɛ.

²⁷ Ɛɛrɔn nɛ mbe mbia e naa baa keni bumo so nɛ b baa shuŋ kikɛ nsaa ŋini bumo kakpa nɛ baaŋ ba sulɔ asɔ na a yɔ.

²⁸ Bɔrɛmatapo nimuso Ɛɛrɔn pibinyɛn Itama e naaŋ baa keni Gɛshɔnebi na so nɛ b baa shuŋ le be ashuŋ ere ashi wajɛbu na to.

Mɛrari be kabuna ebi nɛ b ti Livaiebi na so be kushuŋ be asheŋ

²⁹ Enyɛnpe Ebɔrɛ daŋ kaŋɛ Mosis nna fanɛ e karga Mɛrariebi na kanaŋ kanaŋ so

³⁰ nseŋ sibɛ benyɛn kama nɛ b fo nfɛ adesa n ya fo nfɛ adunu nsaa beeŋ tiŋ n shuŋ Enyɛnpe Ebɔrɛ be wajɛbu na to be kushuŋ na be atre.

³¹ Bumo e naaŋ baa sulɔ wajɛbu na be ndibi yuuso nɛ amo be atɔl nɛ adeŋiso nɛ alargato

³² nɛ wajɛbu na be kelɔnɛ nɛ k kulti kumo na be ndibi yuuso nɛ amo be atɔl nɛ ayirbi nɛ efɔlana. Mɛrariebi na be ekama daga fanɛ e baa nyi kusɔ nɛ e bee sulɔ.

³³ Bɔrɛmatapo nimuso Ɛɛrɔn pibinyɛn, Itama e baa keni bumo so nɛ b baa shuŋ bumo be ashuŋ nɛnɛ.

B ka karga Livaiebi na be asheŋ

³⁴ Ndoŋ nna nɛ Mosis nɛ Ɛɛrɔn nɛ Israɛl be benimuana na karga Kohafebi na mbuna mbuna nɛ kanaŋ kanaŋ so fanɛ kananɛ Enyɛnpe Ebɔrɛ kaŋɛ Mosis na.

^35-37 Bumo be benyɛn nɛ b fo nfɛ adesa n ya fo nfɛ adunu nsaa beeŋ tiŋ n shuŋ wajɛbu cheembi na to na daa wɔ basa ŋgboŋ anyɔ nɛ alfa ashunu nɛ adunu.

^38-41 Kumo be kaman nɛ b karga Gɛshɔnebi na mbuna mbuna nɛ kanaŋ kanaŋ so nɛ bumo be benyɛn nɛ b fo nfɛ adesa n ya fo nfɛ adunu nsaa beeŋ tiŋ n shuŋ wajɛbu na to na koso ŋgboŋ anyɔ nɛ alfa ashe nɛ adesa.

^42-45 Kumo alɛ be kaman nɛ b karga Mɛrariebi na mbuna mbuna nɛ kanaŋ kanaŋ so nɛ bumo be benyɛn nɛ b fo nfɛ adesa n ya fo nfɛ adunu nsaa beeŋ tiŋ n shuŋ wajɛbu na to na koso basa ŋgboŋ asa nɛ alfa anyɔ.

^46-48 Mosis nɛ Ɛɛrɔn nɛ Israɛl be benimuana na ka karga Israɛlebi na be benyɛn nɛ b fo nfɛ adesa n ya fo nfɛ adunu nsaa beeŋ tiŋ n shuŋ wajɛbu na to na kikɛ, b daa wɔ ŋgboŋ aburwa nɛ alfa anu nɛ aduburwa

⁴⁹ Kananɛ Enyɛnpe Ebɔrɛ baŋ kaŋɛ Mosis na gbagba chap nɛ e daŋ shin nɛ b karga basa na nseŋ shin nɛ b sa ekama malɛ mbe kushuŋ.