Nɔmbɛs 36 - EBƆRƐ BE KAWƆL

Beche kilpo be mpetɛ be asheŋ

¹ Kachako nɛ Makiir pibinyɛn Giliad nɛ e la Manase mo nanabi na nɛ mbe kabuna be benimuana ba Mosis nɛ Israɛl be eyiri be bejuŋkparpoana na kutɔ

² m ba kaŋɛ le: “Enyɛnpe Ebɔrɛ ka kaŋɛ fo fanɛ fo shin nɛ Israɛlebi na e to beri m barga kasawule na to na, e daŋ kaŋɛ nna fanɛ fo ta an kurgepo Zelofehad peya n sa mbe mbichesobi.

³ Ama ba nyiŋi fanɛ b baŋ ya kil eyiri pɔtɛ bre, bumo be mpetɛ na beeŋ ki loŋ be yiri na peya, saŋɛ na so nɛ anyi be kachige nɛ an kɔ na e duga so.

⁴ Nfɛ adunu kikɛ be saŋɛ nɛ basa bee bɛta bumo braana be mpetɛ nɛ a wɔ bumo kutɔ a sa bumo na, baaŋ ta Zelofehad be mbichebi be mpetɛ na n ti eyiri nɛ b ya kil na peya so nɛ bumo be mpetɛ maaŋ naŋ ti anyi be yiri peya so kikɛ.”

⁵ Ndoŋ nna nɛ Mosis kaŋɛ Israɛlebi na kusɔ nɛ Enyɛnpe Ebɔrɛ kaŋɛ mo na kikɛ. Le nɛ e daŋ kaŋɛ bumo: “Kusɔ nɛ Manase be yiri na kaŋɛ na la kashenteŋ nna,

⁶ fanɛ Zelofehad be mbichesobi kɔ ekpa nɛ b kil esa kama nɛ baa sha nɛ esa na shi bumo be yiri to nna na.

⁷ Israɛl be esa kikɛ be kapetɛ bee shir a wɔ mbe yiri nɛ e shi to nna.

⁸ Israɛl be eche kama nɛ e ji mbe yiri to be kasawule be kapetɛ, daga e ka kil esa nɛ e shi mbe yiri na to nna. Loŋ e naaŋ shin nɛ Israɛlebi kikɛ e baa ji bumo nananyɛnana be kasawule be mpetɛ.

⁹ Loŋ e naaŋ shin nɛ yiri ko maaŋ tɛmbaŋ n ya kaa ji yiri ko be kapetɛ. Yiri kama to ebi daga nna fanɛ b baa ji bumo gbagba be yiri to ebi be mpetɛ.”

^10-11 Amoso Zelofehad be mbichesobi Maala nɛ Tirza nɛ Hogla nɛ Milka nɛ Nowa daŋ wora kusɔ nɛ Enyɛnpe Ebɔrɛ daŋ kaŋɛ Mosis gbagba nna nseŋ kil bumo tuto be kaba so be basa.

¹² Manase be kabuna be basa nɛ b daŋ kil, amoso bumo be mpetɛ daŋ shir bumo tuto be kabuna nna.

¹³ Le be mbra ere nɛ Enyɛnpe Ebɔrɛ daŋ ta n sa Mosis fanɛ e sa Israɛlebi saŋɛ so nɛ b daŋ wora bumo be nyi to Mowab be keplasawule nɛ k mata Jɔɔdan be lɔr nɛ Jɛriko wɔ kumo be kaba ndoŋ na.