Nɔmbɛs 35 - EBƆRƐ BE KAWƆL

Livaiebi be nde be asheŋ

¹ Saŋɛ so nɛ Israɛlebi na wora bumo be nyi to ashi Mowab be kepla nɛ k mata Jɔɔdan be lɔr nɛ Jɛriko wɔ kumo be kaba ndoŋ na, nɛ Enyɛnpe Ebɔrɛ kaŋɛ Mosis le:

² “Kaŋɛ Israɛlebi na fanɛ b lara bumo be mpetɛ nɛ baaŋ nya na to be nde ko n sa Livaiebi na nseŋ sa bumo mboŋ nɛ bumo be asɔbɔya e baa ji m mata nde na.

³ Aloŋ na Livaiebi na beeŋ nya nde nɛ baaŋ baa wɔtɔ nseŋ naŋ nya bumo be ana nɛ asɔbɔya malɛ gba be mboŋ jiso.

⁴ A daga bumo be asɔbɔya be ejikpa na ka feŋ kade na be egbal nɛ b pɔr ŋ kulti na be kaba kama so fanɛ ayadra alfa kagboŋ nɛ alfa anu,

⁵ nseŋ shin nɛ ejikpa na be mparto nɛ kumo be nteŋ to kikɛ e ba la fanɛ ayadra ŋgboŋ asa, nɛ kade na e baa wɔ asɔbɔya be ejikpaana na be nferinto.

⁶ Nde nɛ menyeeŋ sa Livaiebi na be ashe beeŋ baa la kesɔnyige be nde. Esa kama nɛ e maŋ kute m mɔ esa beeŋ tiŋ n shile n ya ŋana amo to. Amo be kaman nɛ men naŋ ta nde adena nɛ anyɔ

⁷ nɛ amo be asɔbɔya be ejikpa n ti bumo so, saŋɛ na so Livaiebi na be nde nɛ amo be asɔbɔya be ejikpa kikɛ beeŋ ki adena nɛ aburwa.

⁸ Israɛlebi be eyiriana na be kekama bee yili kananɛ bumo be kasawule sa so nna a sa Livaiebi na nde. Eyiri nɛ bumo be nsawule shishi na e naaŋ sa nde damta a chɔ bumo nɛ bumo be nsawule maŋ shishi na.”

Kesɔnyige be nde be asheŋ

⁹ Nɛ Enyɛnpe Ebɔrɛ kaŋɛ Mosis

¹⁰ fanɛ e kaŋɛ Israɛlebi na le: “Men baŋ dii Jɔɔdan be lɔr na n yɔ Keenan be kasawule so,

¹¹ men lara kesɔnyige be nde ko n yili, saŋɛ na so, esa kama nɛ e maŋ kute m mɔ esa, beeŋ tiŋ n shile n ya ŋana ndoŋ.

¹² Loŋ na e naaŋ shin nɛ e nya mbe kumu ashi esa nɛ e mɔ na mo niopibi nɛ e bee fin mo nɛ e mɔ n tal to na kutɔ. Ŋkpal manɛ so, a maŋ daga b ka mɔ esa kama nɛ e mɔ esa nɛ b maŋ naŋ ji mo demu.

¹³ Nde ashe nɛ a beeŋ baa la kesɔnyige be nde ere be

¹⁴ asa e baa wɔ Jɔɔdan be lɔr na be epeŋilarkpa be kaba so nɛ asa malɛ e baa wɔ Keenan be kasawule so.

¹⁵ Le be nde ere e naaŋ baa la kesɔnyige be nde n sa Israɛlebi na nɛ befɔ nɛ bekama nɛ b chena menyi to na. Ekama nɛ e maŋ kute n mɔ esa beeŋ tiŋ n shile n ya ŋana ndoŋ.

^16-18 Nɛ fanɛ esa ta kebɛlso ŋko kejembu ŋko kedibi m mɔ esa, kumo ere e ki emɔpo nna na nɛ a daga fanɛ b mɔ mo alɛ gba.

¹⁹ Esa nɛ b mɔ na mo kurgepo nɛ e mata mo, e kɔ ekpa nɛ e mɔ esa nɛ e mɔ mo kurgepo na. Kaplɛkama nɛ e tu mo, a daga e ka mɔ mo.

²⁰ Nɛ fanɛ esa ko kishi mo barkasa nna, nseŋ da mo n lɛ nɛ e wu ŋko n ta kusɔ ko ŋ kpa mo nɛ k ŋmɛa mo m mɔ

²¹ ŋko ŋ ŋmɛa mo kuluŋguntuŋ m mɔ, kumo ere mo alɛ gba ki emɔpo nna na nɛ a daga fanɛ b mɔ mo alɛ gba. Esa nɛ b mɔ na malɛ mo kurgepo nɛ e mata mo, e kɔ ekpa nɛ e mɔ esa nɛ e mɔ mo kurgepo na. Kaplɛkama nɛ e tu mo a daga e ka mɔ mo.

²² Ama nɛ fanɛ esa maŋ kishi esa nsaa maŋ kute n da mo n lɛ ŋko ŋ kpa mo kusɔ ko,

²³ ŋko n da kejembu n lɛ mo so nɛ e wu,

²⁴ kumo ere k daga kade na to ebi ka ji emɔpo na nɛ esa nɛ e bee fin mo nɛ e mɔ n tal to to na be asheŋ le be ekpa so.

²⁵ K daga b ka kuŋ emɔpo na ashi esa nɛ e bee fin mo nɛ e mɔ n tal to na kutɔ n yɛr mo kesɔnyige be kade to nɛ e ya ka wɔ ndoŋ hale nɛ bɔrɛmatapo nimuso na e ya wu.

²⁶ Ama nɛ fanɛ emɔpo na lar kesɔnyige be kade na to nna

²⁷ nɛ k ba fanɛ esa nɛ e mɔ na mo kurgepoana wu mo nseŋ mɔ mo, kumo ere b maŋ wora kulubi.

²⁸ Emɔpo na daga fanɛ e baa wɔ kade na to n ya fo saŋkama nɛ bɔrɛmatapo nimuso na wu pɔɛŋ nɛ e bɛta n yɔ epe.

²⁹ Le be mbra ere beeŋ baa wɔtɔ n sa menyi nɛ men be kaman to ebi kikɛ mbaanaayɔ.

³⁰ Basa anyɔ baŋ ji shɛda fanɛ esa mɔ esa, kumo ere a daga b ka mɔ amodoŋwura gba. Esa koŋwule be shɛda bre maaŋ tiŋ n shin nɛ b mɔ esa nɛ e mɔ esa.

³¹ Emɔpo kikɛ daga fanɛ b mɔ mo alɛ gba. A maŋ daga fanɛ b ka amansherbi n sɔ mo.

³² Esa kama nɛ e shile n yɔ kesɔnyige be kade kama nɛ b ji mbe demu nseŋ wu fanɛ e maŋ la emɔpo, maŋ daga e ka amansherbi nseŋ nya ekpa m bɛta n yɔ epe pɔɛŋ nɛ bɔrɛmatapo nimuso na e wu.

³³ Nɛ men baŋ wora loŋ, kumo ere menyeeŋ jija kasawule nɛ men chena so ere. Ŋkpal manɛ so ŋklaŋ be kewurge bee jija kasawule nna. Esa nɛ e shin nɛ ŋklaŋ wurge malɛ be ŋklaŋ e naaŋ tiŋ n shin nɛ kasawule nɛ kejija e naŋ nyalɛ.

³⁴ Men sa maŋ kaŋ jija kasawule nɛ men wɔ so ere, ŋkpal manɛ so, ma e la Enyɛnpe Ebɔrɛ na. Ma alɛ wɔ menyi to nna.”