Nɔmbɛs 34 - EBƆRƐ BE KAWƆL

Israɛl be kasawule be egbaŋto be asheŋ

¹ Enyɛnpe Ebɔrɛ daŋ ta le be mmalga ere nna n sa Mosis

² fanɛ e sa Israɛlebi na: “Nɛ men baŋ luri Keenan be kasawule nɛ ŋ kɔ a sa menyi na to, kananɛ men be kasawule be egbaŋto egbaŋto beeŋ baa du nde:

³ Kumo be kelargato be kaseto be kaba so beeŋ yili Zin be keshishɛrsawule na nɛ Edɔm be kasawule be kelargato be esoso be epeŋitɔrkpa be kaba so. Kumo be ekar beeŋ fara Nfɔl be Teku na be kelargato be kaseto be kaba so be epeŋilarkpa be kaba so,

⁴ nseŋ kilgi m bɔla kelargato be kaseto be kaba so a yɔ Akrabim be kepla be kaba so n ta m bɔla Zin n ya luri Kadɛsh Bania ashi kelargato be kaseto be kaba so. Nseŋ naŋ yili ndoŋ ŋ kilgi m bɔla kelargato be esoso be epeŋitɔrkpa be kaba so n yɔ Heeza Adar hale n ya fo Azmɔn.

⁵ Nseŋ naŋ yili ndoŋ ŋ kilgi m bɔla ketaŋɛ nɛ k dese Ijipt be kasawule be ekar n ta n ya fo Mɛditerenia be Teku na.

⁶ Kumo be epeŋitɔrkpa be ekar e naŋ baa la Mɛditerenia be Teku na.

⁷ Kumo be kelargato be esoso be kaba so beeŋ bɛ Mɛditerenia be Teku na so n ya fo kebeegboŋ nɛ baa tre Hɔɔr na,

⁸ nseŋ yili ndoŋ n yɔ Hamaf be kepla na ŋ keta n ya fo Zedad

⁹ nɛ Zifrɔn n ta n ya tar Heeza Enaan.

¹⁰ Men be epeŋilarkpa be kaba so be kasawule be ekar bre beeŋ fara Heeza Enaan nna n ya fo Shefam,

¹¹ nseŋ naŋ bɔla kelargato be kaseto be kaba so n ya fo Habeɛl nɛ k wɔ Ain be epeŋilarkpa be kaba so na, n ta n ya fo Tekugboŋ nɛ baa tre Galili na be epeŋilarkpa be kaba so,

¹² nseŋ ta m bɛ Jɔɔdan be lɔr na so n ya tar Nfɔl be Teku na. Kananɛ kasawule na be abonfuana na be ekar beeŋ ba du nna na.”

¹³ Ndoŋ nna nɛ Mosis kaŋɛ Israɛlebi na le: “Enyɛnpe Ebɔrɛ ta kasawule ere nna n sa eyiri akpanu nɛ bargato na. Men to beri m barga amo to n sa abar.

¹⁴ Ruben nɛ Gad be eyiri nɛ Manase be yiri be bargato na bre tiŋ n nya bumo be kasawule

¹⁵ ashi Jɔɔdan be lɔr nɛ Jɛriko wɔ kumo be kaba ndoŋ na be epeŋilarkpa na be kaba so.”

Bejuŋkparpo nɛ baaŋ yilito nɛ b barga kasawule na to be asheŋ

¹⁶ Kumo be kaman nɛ Enyɛnpe Ebɔrɛ kaŋɛ Mosis le:

¹⁷ “Bɔrɛmatapowura Eliaza nɛ Nun pibinyɛn Joshuwa e naŋ barga kasawule na to n sa basa na.

¹⁸ Ejuŋkparpo koŋwule ashi yiri kama to beeŋ chɛ bumo to m barga kumo to.”

¹⁹ Bejuŋkparpo na nde. Jefune pibinyɛn Kalɛb e daa la Juda be yiri to be ejuŋkparpo.

²⁰ Amihuud pibinyɛn Shelumiɛl e daa la Simiɔn be yiri to be ejuŋkparpo.

²¹ Chislɔn pibinyɛn Elidad e daa la Bɛnjamin be yiri to be ejuŋkparpo.

²² Jogli pibinyɛn Buuki e daa la Dan be yiri to be ejuŋkparpo.

²³ Efod pibinyɛn Haniɛl e daa la Manase be yiri to be ejuŋkparpo.

²⁴ Shiftan pibinyɛn Kemuɛl e daa la Efreim be yiri to be ejuŋkparpo.

²⁵ Panaak pibinyɛn Elizafan e daa la Zebulun be yiri to be ejuŋkparpo.

²⁶ Azan pibinyɛn Paltiɛl e daa la Isaaka be yiri to be ejuŋkparpo.

²⁷ Shelomi pibinyɛn Ahihuud e daa la Asha be yiri to be ejuŋkparpo.

²⁸ Amihuud pibinyɛn Padahɛl e daa la Naftali be yiri to be ejuŋkparpo.

²⁹ Le be basa ere nɛ Enyɛnpe Ebɔrɛ daŋ shin nɛ b chɛ Eliaza nɛ Joshuwa to m barga kasawule na to n sa Israɛlebi na ashi Keenan be efuli so.