Nɔmbɛs 32 - EBƆRƐ BE KAWƆL

Jɔɔdan be epeŋilarkpa be kaba so be eyiriana be asheŋ

¹ Ruben nɛ Gad be eyiriana nɛ b kɔ asɔbɔya ga na ka wu fanɛ Jeeza nɛ Giliad be kasawule na kɔ ana nɛ mbolpɔ nɛ mboe be ejikpa lela,

² nɛ b yɔ Mosis nɛ bɔrɛmatapo Eliaza nɛ Israɛlebi be bejuŋkparpoana na kutɔ n ya kaŋɛ bumo le:

^3-4 “Enyɛnpe Ebɔrɛ chɛ anyi to nɛ an sɔ Atarɔf nɛ Dibɔn nɛ Jeeza nɛ Nimra nɛ Hishbɔn nɛ Eliale nɛ Sibma nɛ Neebo nɛ Bɛɔn be ndeana be nsawule nɛ a walɛ n sa asɔbɔya be kebela. Anyi alɛ kɔ asɔbɔya ga.

⁵ Amoso jande ta kasawule ere n sa anyi nɛ k ki anyi be kapetɛ, saŋɛ na so, anyi ere maaŋ naŋ dii n yɔ Jɔɔdan be lɔr na be kaba ndoŋ n ya chena.”

⁶ Ndoŋ nna nɛ Mosis kaŋɛ le: “Menyee sha kebaawɔ nfe nna nɛ men braana Israɛlebi nɛ b ka na bre e baa yɔ kena to a?

⁷ Men wora loŋ, menyeeŋ shin nɛ Israɛlebi na be aba e pɔ nɛ b kini kedii Jɔɔdan be lɔr na n yɔ kasawule nɛ Enyɛnpe Ebɔrɛ ta n sa bumo na so.

⁸ Loŋ nɛ men nananyɛnana gba daŋ wora saŋɛ so nɛ n daŋ yili Kadɛsh Bania n shuŋi bumo fanɛ b ya dara kasawule na.

⁹ B daŋ yɔ nna n ya fo Eshkɔl be ketaŋɛ na nseŋ yili ndoŋ ŋ keni kasawule na nseŋ bɛta m ba kaŋɛ Israɛlebi na fanɛ b maaŋ tiŋ n yɔ kasawule nɛ Enyɛnpe Ebɔrɛ ta n sa bumo na so.

¹⁰ Kumo be kamɔnchɛ nɛ Enyɛnpe Ebɔrɛ nya agbo nseŋ nase le be kɔnɔ:

¹¹ ‘Ma e naa kaŋɛ na fanɛ, ŋkpal b ka maŋ ji kashenteŋ n sa ma na so, bumo be bekama nɛ b shi Ijipt be kasawule so m ba nseŋ fo nfɛ adunyɔ ŋko m baŋ so na be ekama maaŋ yɔ kasawule nɛ n nase kɔnɔ fanɛ meeŋ sa Eebraham nɛ Aizek nɛ Jeekɔb na so.’

¹² Jefune nɛ e la Keniz be esa na pibinyɛn Kalɛb nɛ Nun pibinyɛn Joshuwa nawule e daŋ ji kashenteŋ n sa Enyɛnpe Ebɔrɛ na.

¹³ Enyɛnpe Ebɔrɛ daŋ nya agbo nna n wɔtɔ Israɛlebi na nseŋ shin nɛ b nite keshishɛrsawule na so a kilgi to a kulti nfɛ adena, nɛ bumo to be bumo nɛ b daa maŋ wora Enyɛnpe Ebɔrɛ be aparsheŋ na kikɛ wu.

¹⁴ Kusɔ nɛ men nananyɛnana daŋ wora na nɛ menyi Rubenebi nɛ Gadebi gba bee wora naniere a shin nɛ Enyɛnpe Ebɔrɛ be agbo bee kaa Israɛlebi so.

¹⁵ Men baŋ kini kebɛ Enyɛnpe Ebɔrɛ so, e beeŋ naŋ kplaŋ mbe basa so ashi keshishɛrsawule ere so nɛ bumo be alubi e baa bɛ menyi.”

¹⁶ Ndoŋ nna nɛ Rubenebi na nɛ Gadebi kaŋɛ Mosis le: “Shin nɛ an pɔr anyi be asɔbɔya be aluu nseŋ pɔr egbal ŋ kulti nde n sa anyi be beche nɛ mbia pɔɛŋ,

¹⁷ nseŋ wora shiriya n juŋkpar an braana Israɛlebi n ya kɔ kena n shin nɛ b ya chena kasawule nɛ k beeŋ ba la bumoya na so. Saŋɛ na so, basa nɛ b wɔ kasawule ere so ere maaŋ nya ekpa n tɔrɔ anyi be beche nɛ mbia.

¹⁸ Anyi maaŋ bɛta n yɔ epe ama Israɛlebi na kikɛ baaŋ sɔ kasawule nɛ b ta n sa bumo na nna n chena so pɔɛŋ.

¹⁹ Anyi alɛ maaŋ tu bumo m barga kasawule nɛ k wɔ Jɔɔdan be lɔr na be kaba ndoŋ na to ŋkpal manɛ so, anyi ere tiŋ n nya anyi be kachige ashi Jɔɔdan be lɔr na be epeŋilarkpa be kaba so nfe.”

²⁰ Ndoŋ nna nɛ Mosis kaŋɛ le: “Nɛ menyeeŋ wora kusɔ nɛ men kaŋɛ ere bre, kumo ere men wora shiriya Enyɛnpe Ebɔrɛ na be anishito nfe n yɔ kena to.

²¹ Men be benapo kikɛ e dii Jɔɔdan be lɔr na be kaba ndoŋ nɛ Enyɛnpe Ebɔrɛ e juŋkpar menyi n ju an doŋana kasawule na so n sɔ kumo.

²² Kumo be kaman nɛ men bɛta n yɔ epe nɛ Enyɛnpe Ebɔrɛ e shin nɛ kasawule nɛ k wɔ Jɔɔdan be epeŋilarkpa be kaba so na e ki menyeya.

²³ Ama nɛ men baa maŋ bɛ men be kɔnɔ naseso ere so bre, menyeeŋ wora alubi ŋ gbiti Enyɛnpe Ebɔrɛ na nsaa beeŋ nya kumo be kasogberge.

²⁴ Amoso men pɔr egbalana ŋ kulti men be nde nseŋ wora men be asɔbɔya be aluu ama men wora kusɔ nɛ men nase kɔnɔ fanɛ menyeeŋ wora na.”

²⁵ Ndoŋ nna nɛ Gad nɛ Ruben be benyɛn na kikɛ kaŋɛ le: “Anyeeŋ wora kusɔ kama nɛ an nyɛnpe kaŋɛ anyi.

²⁶ Anyi be beche nɛ mbia nɛ anyi be ana nɛ mbolpɔ bre beeŋ baa wɔ Giliad be nde to nfe.

²⁷ Ama anyi alɛ kikɛ wora shiriya nɛ an bɛ kusɔ nɛ Enyɛnpe Ebɔrɛ kaŋɛ na so nseŋ dii Jɔɔdan be lɔr na be kaba ndoŋ n ya kɔ fanɛ kananɛ fo kaŋɛ na.”

²⁸ Ndoŋ nna nɛ Mosis kaŋɛ Eliaza nɛ Joshuwa nɛ Israɛl be bejuŋkparpoana na le:

²⁹ “Nɛ Gad nɛ Ruben be benyɛn tu menyi n dii Jɔɔdan be lɔr na be kaba ndoŋ nɛ men ya kɔ n sɔ kasawule na, kumo ere men ta Giliad be kasawule na n sa bumo fanɛ bumo be kapetɛ.

³⁰ Ama nɛ b maŋ dii Jɔɔdan be lɔr na n ya chɛ menyi to ŋ kɔ bre, kumo ere baaŋ nya bumo be kasawule be kachige ashi Keenan be kasawule so nna fanɛ menyi.”

³¹ Ndoŋ nna nɛ Gad nɛ Ruben be benyɛn na kaŋɛ le: “Anyeeŋ wora kusɔ nɛ Enyɛnpe Ebɔrɛ kaŋɛ anyi ere.

³² Anyeeŋ bɛ mbe kamalga so nseŋ dii n yɔ Keenan be kasawule so n ya kɔ n sa Enyɛnpe Ebɔrɛ, ama kasawule nɛ k wɔ Jɔɔdan be lɔr na be epeŋilarkpa be kaba so na e naaŋ baa la anyi be kapetɛ.”

³³ Ndoŋ nna nɛ Mosis ta ewura Sihɔn nɛ e la Amɔriebi be ewura na, nɛ ewura Ɔg nɛ e la Bashan be ewura na be nsawule nɛ efuli na so be nde nɛ a kulti ndoŋ na kikɛ n sa Manase be yiri be bargato nɛ Gad nɛ Ruben be eyiriana.

³⁴ Gad be yiri na daŋ lɔŋɛ nna m pɔr Dibɔn nɛ Atarɔf nɛ Arowa nɛ

³⁵ Atrɔf Shofan nɛ Jeeza nɛ Jogbeha

³⁶ nɛ Bɛf Nimra nɛ Bɛf Haran be nde nseŋ pɔr egbal ŋ kulti amo kikɛ.

³⁷ Nɛ Ruben be yiri na malɛ lɔŋɛ m pɔr Hishbɔn Eliale nɛ Kiryatayim

³⁸ nɛ Sibma nɛ nde nɛ b daa tre Nebo nɛ Baal Miɔn na. B daŋ nase nde nɛ b pɔr egbal ŋ kulti na atre popɔr nna.

³⁹ Manase pibinyɛn Makiir e daŋ kɔ n sɔ Giliad be kasawule nseŋ ju Amɔriebi nɛ b wɔ ndoŋ na n sɔ kumo n chena so.

⁴⁰ Amoso Mosis daŋ ta Giliad be kasawule na nna n sa Makiir be kabuna ebi nɛ b chena ndoŋ.

⁴¹ Jair nɛ e shi Manase be yiri to na e daŋ ya kɔ n sɔ ndewurbi ko nseŋ nase amo Jair be ndewurbi.

⁴² Nooba e daŋ kɔ n sɔ Kenaaf nɛ ndewurbi nɛ a kulti kumo na nseŋ ta mbe ketre Nooba n nase amo.