Nɔmbɛs 31 - EBƆRƐ BE KAWƆL

Israɛlebi ka kɔ Midianebi kena be asheŋ

¹ Le nɛ Enyɛnpe Ebɔrɛ daŋ kaŋɛ Mosis:

² “Pɔɛŋ nɛ fo wu na, a daga fo ka gberge Midianebi na kusoe nɛnɛ ŋkpal kusɔ nɛ b wora Israɛlebi na so.”

³ Ndoŋ nna nɛ Mosis kaŋɛ basa na le: “Men bela ase n ya kɔ Midianebi na kena ŋ gberge bumo kusoe ŋkpal kusɔ nɛ b wora Enyɛnpe Ebɔrɛ na so.

⁴ Men lara benapo kagboŋ ashi Israɛl be eyiri na be kekama to nɛ b yɔ kena na to.”

⁵ Amoso benapo kagboŋ nɛ b daŋ lara eyiri na be kekama to nɛ bumo kikɛ ya yili benapo ŋgboŋ kuduanyɔ.

⁶ Nɛ Mosis shin nɛ Eliaza pibinyɛn Finihas ta Enyɛnpe be wajɛbu na to be asɔ cheembi nɛ mbel nɛ baaŋ ba ta a tre abar n tu bumo n yɔ kena na to.

⁷ Kananɛ Enyɛnpe Ebɔrɛ baŋ kaŋɛ Mosis na gbagba nɛ b bɛ so n ya kɔ Midianebi na kena m mɔ bumo be benyɛn kikɛ

⁸ n ta Evi nɛ Rekɛm nɛ Zur nɛ Hur nɛ Reeba nɛ b daa la Midianebi be bewura na n ti so. B daŋ mɔ Biyɔɔ pibinyɛn Balaam gba kena na to nna.

⁹ Israɛlebi na daŋ pɛ Midianebi na be beche nɛ mbia nna n ta bumo be ana nɛ mbolpɔ nɛ bumo be asɔ kikɛ,

¹⁰ nseŋ chɔɔ bumo be ndeana nɛ bumo be nyi to kikɛ.

¹¹ B daŋ ta asɔ na nɛ basa nɛ b pɛ na nɛ asɔbɔya na kikɛ nna

¹² n yɔ Mowab be kepla nɛ k mata Jɔɔdan be lɔr nɛ Jɛriko wɔ kumo be kaba ndoŋ na.

¹³ Ndoŋ nɛ Mosis nɛ bɔrɛmatapo Eliaza nɛ bejuŋkparpoana na kikɛ ya shɛr benapo na to.

¹⁴ Mosis daŋ nya agbo nna n wɔtɔ benapo na be benimuana nɛ b daŋ shi kena to m ba na,

¹⁵ nseŋ bishi bumo le: “Manɛ nna nɛ men maŋ mɔ beche na bre?

¹⁶ Bumo e daŋ bɛ Balaam be keŋini so n fule Israɛlebi na nɛ b kini Enyɛnpe Ebɔrɛ n ya ka shuŋ kegbir nɛ baa tre Baal ashi Piyɔɔ, nɛ Enyɛnpe Ebɔrɛ shin nɛ aleblawu ba mbe basa so na.

¹⁷ Naniere, men mɔ mbinyɛnsobi nɛ beche kama nɛ b nyi benyɛn na,

¹⁸ ama men sa maŋ mɔ mbichesobi nɛ b maŋ nyi benyɛn na bre. Men ta bumo ŋ ki menyi be beche.

¹⁹ Menyi be ekama malɛ nɛ e mɔ esa ŋko m beta ebuni, e lar keeyi na to n yɔ kakpa ko nchɛ ashunu. Bumo nɛ basa nɛ b pɛ kena to na e fɔr bumo be eyur so daŋkare be ekpa so kachɛ sasopo nɛ kushunusopo na.

²⁰ A daga fanɛ b fɔr bumo be epiŋi nɛ kusɔ kama nɛ b ta kawɔl ŋko kaboe be afuibi ŋko kedibi n lɔŋɛ kikɛ so daŋkare be ekpa so.”

²¹ Ndoŋ nna nɛ bɔrɛmatapo Eliaza kaŋɛ benapo nɛ b shi kena to m ba na le: “Le be keŋini ere nɛ Enyɛnpe Ebɔrɛ ta n sa Mosis.

^22-23 E yɛ: ‘Nɛ men baa sha kefɔr kusɔ nɛ k maa chɔɔ fanɛ shuwa ŋko gbiti ŋko danyaŋ ŋko kebɛlso ŋko epal so, daŋkare be ekpa so, kumo ere men ta kumo n wɔtɔ edɛ to. Kusɔ kama nɛ k bee chɔɔ bre men ta nchu n fɔr kumo so daŋkare be ekpa so.

²⁴ Men baŋ fɔr men be epiŋi kachɛ shunusopo na, menyeeŋ nyalɛ so daŋkare be ekpa so nseŋ nya ekpa m bɛta n yɔ keeyi to.’ ”

B ka barga asɔ nɛ b muu kena to na be asheŋ

²⁵ Nɛ Enyɛnpe Ebɔrɛ kaŋɛ Mosis le:

²⁶ “Fo nɛ bɔrɛmatapo Eliaza nɛ Israɛl be bejuŋkparpoana na e karga basa kama nɛ asɔbɔya kama nɛ b pɛ kena na to na

²⁷ nseŋ barga amo to ntuŋ anyɔ dede, n ta katuŋ koŋwule n sa benapo na nseŋ ta kukoŋwule malɛ n sa Israɛlebi nɛ b ka na.

²⁸ Asɔ nɛ benapo na nya na, dimɛdi ŋko kusɔbɔya, be kekama be alfa anu to be kukoŋwule la Ebɔrɛ be kachige nna.

²⁹ Men ta amo n sa bɔrɛmatapo Eliaza fanɛ Enyɛnpe Ebɔrɛ be kachige.

³⁰ Israɛlebi malɛ be asɔ nɛ b nya na, dimɛdi ŋko kusɔbɔya, be kekama be adunu kikɛ to be kukoŋwule la Livaiebi nɛ baa keni Enyɛnpe Ebɔrɛ be wajɛbu na so na be kachige nna.”

³¹ Ndoŋ nna nɛ Mosis nɛ Eliaza wora kusɔ nɛ Enyɛnpe Ebɔrɛ kaŋɛ na kikɛ.

^32-35 Asɔ nɛ benapo na daŋ ya nya kena na to nde: Mbɔlpo nɛ mboe daa la ŋgboŋ alfa ashe nɛ adushunu nɛ anu, nɛ ana daa la ŋgboŋ adushunu nɛ anyɔ, nɛ ekurma daa la ŋgboŋ adeshe nɛ kako, nɛ besuŋgurbi nɛ b maŋ nyi benyɛn daa la ŋgboŋ adesa nɛ anyɔ.

^36-40 Benapo na be kachige daa la mbolpɔ nɛ mboe ŋgboŋ alfa asa nɛ adesa nɛ ashunu nɛ alfa anu nɛ amo be alfa ashe nɛ adushunu nɛ anu daa la Enyɛnpe Ebɔrɛ peya. Ana ŋgboŋ adesa nɛ ashe e daa la benapo na peya nɛ amo be adushunu nɛ anyɔ la Enyɛnpe Ebɔrɛ peya. Ekurma ŋgboŋ adesa nɛ alfa anu e daa la benapo na peya nɛ amo to be adeshe nɛ kako daa la Enyɛnpe Ebɔrɛ peya. Beche nɛ b daa maŋ nyi benyɛn nsaa la benapo na peya daa la ŋgboŋ kuduashe nna nɛ bumo be adesa nɛ anyɔ la Enyɛnpe Ebɔrɛ peya.

⁴¹ Ndoŋ nna nɛ Mosis bɛ kusɔ nɛ Enyɛnpe Ebɔrɛ ŋini mo na gbagba so n ta asɔ nɛ a la Enyɛnpe Ebɔrɛ peya na n sa Eliaza.

^42-46 Israɛlebi nɛ b ka na be kachige nɛ benapo na kikɛ be kachige daa sasa nna. Amo nde: Mbɔlpo nɛ mboe daa la ŋgboŋ alfa asa nɛ adesa nɛ ashunu nɛ alfa anu, nɛ ana daa la ŋgboŋ adesa nɛ ashe, nɛ ekurma daa la ŋgboŋ adesa nɛ alfa anu nɛ besuŋgurbi nɛ b maŋ nyi benyɛn malɛ daa la ŋgboŋ kuduashe.

⁴⁷ Bumo be kachige na to, Mosis daŋ lara edimɛdi nɛ asɔbɔya na to be adunu kikɛ to be kukoŋwule nna n sa Livaiebi nɛ baa keni Enyɛnpe Ebɔrɛ be wajɛbu na so na fanɛ kananɛ Enyɛnpe Ebɔrɛ kaŋɛ mo na gbagba chap.

⁴⁸ Ndoŋ nna nɛ benapo na be benimuana na yɔ Mosis kutɔ

⁴⁹ n ya kaŋɛ le: “Fo nyɛrbi ya karga benapo nɛ baa keni so na nseŋ wu fanɛ bumo be ekoŋwule gba maŋ foe.

⁵⁰ Amoso an kɔ shuwa be abitasɔ nɛ enɔ to be mpinibi nɛ enɔ to be ashembi nɛ mpinibi nɛ akonde nɛ abɔtoshembi a ba nɛ an ba sa Enyɛnpe Ebɔrɛ ŋkpal e ka kuŋ anyi ashi kena na to so.”

⁵¹ Nɛ Mosis nɛ Eliaza kikɛ sɔ shuwa be abitasɔ na ashi benapo na be benimu na kutɔ.

⁵² Benapo be benimuana na be ŋkɛ nɛ b bar na kikɛ be egbɛ daa la kilo alfa anyɔ nna.

⁵³ Benapo nɛ b daa maŋ la benimu na bre daŋ maŋ ta shuwa be abitasɔ nɛ b nya na n sa.

⁵⁴ Mosis nɛ Eliaza daŋ ta shuwa na nna n yɔ wajɛbu na to, saŋɛ na so, Enyɛnpe Ebɔrɛ beeŋ ba kraa kuŋ Israɛlebi na.