Nɔmbɛs 30 - EBƆRƐ BE KAWƆL

Nnɔ naseso be mbra be asheŋ

¹ Le be keŋini ere nɛ Mosis daŋ ta n sa Israɛl be eyiri na be bejuŋkparpoana.

² Esa kama baŋ nase kɔnɔ n sa Enyɛnpe Ebɔrɛ na, ŋko m bɔ ntaŋ fanɛ e maaŋ wora kusɔ ko, k daga e ka bɛ kɔnɔ naseso na so n wora kusɔ kama nɛ e kaŋɛ fanɛ e beeŋ wora na.

³ Nɛ kasuŋgurbia nɛ e kraa wɔ mo tuto be laŋ to baŋ nase kɔnɔ n sa Enyɛnpe Ebɔrɛ na, ŋko n nase kɔnɔ fanɛ e beeŋ yige kusɔ ko be kewora,

⁴ kumo ere a daga fanɛ e ka wora kusɔ kama nɛ e kaŋɛ na m bɔlɔ so, ama mo tuto baŋ nu kumo nna nseŋ wule ŋ kini kumo.

⁵ Nɛ mo tuto ju mo fanɛ e sa maŋ wora m bɔlɔ mbe kɔnɔ naseso na so bre, kumo ere k maŋ daga fanɛ e wora m bɔlɔ kumo so. Enyɛnpe Ebɔrɛ malɛ beeŋ ta m paŋ mo ŋkpal mo tuto ka maŋ shuli fanɛ e wora m bɔlɔ kumo so so.

⁶ Nɛ fanɛ kebichebi nase kɔnɔ nna ŋko m malga kesariaso n nase kɔnɔ fanɛ e beeŋ yige kusɔ ko be kewora pɔɛŋ nseŋ ya kil,

⁷ kumo ere a daga e ka wora m bɔlɔ kusɔ kama nɛ e nase kɔnɔ fanɛ e beeŋ wora na so, ama mo kul baŋ nu kumo nna nseŋ kini kumo.

⁸ Nɛ mo kul ju mo fanɛ e sa maŋ wora m bɔlɔ kɔnɔ naseso na so bre, kumo ere k maŋ naŋ daga fanɛ e wora m bɔlɔ kumo so. Enyɛnpe Ebɔrɛ malɛ beeŋ ta m paŋ mo.

⁹ Ekulpoche ŋko eche nɛ e kini mo kul, daga e ka wora m bɔlɔ kɔnɔ naseso kama nɛ e nase ŋko kusɔ kama nɛ e kaŋɛ fanɛ e beeŋ yige kewora na so.

¹⁰ Nɛ fanɛ eche kilpo baŋ nase kɔnɔ ŋko ŋ kaŋɛ fanɛ e beeŋ yige kusɔ ko be kebaawora,

¹¹ kumo ere a daga e ka wora m bɔlɔ mbe kɔnɔ naseso na ŋko kusɔ nɛ e kaŋɛ na so, ama mo kul baŋ nu kumo nna nseŋ kaŋɛ fanɛ e maŋ shuli kumo.

¹² Nɛ mo kul nu kumo nseŋ ju mo fanɛ e sa maŋ wora m bɔlɔ kɔnɔ naseso na so bre, kumo ere k maŋ daga e ka wora m bɔlɔ kumo so. Enyɛnpe Ebɔrɛ malɛ beeŋ ta m paŋ mo ŋkpal mo kul ka ju mo na so.

¹³ Mo kul kɔ ekpa nɛ e shuli ŋko ŋ kini kɔnɔ naseso kama nɛ e nase ŋko kusɔ kama nɛ e kaŋɛ fanɛ e beeŋ wora.

¹⁴ Ama nɛ mo kul nu kɔnɔ naseso na be asheŋ nsaa maŋ kaŋɛ shɛŋ hale nɛ epeŋi ya tɔr, kumo ere a daga e ka wora m bɔlɔ kusɔ kama nɛ e kaŋɛ na so ŋkpal manɛ so mo kul be kelato na bee ŋini fanɛ e shuli kumo nna na.

¹⁵ Ama nɛ fanɛ mo kul na jo nchɛnnyɔ pɔɛŋ nseŋ kaŋɛ fanɛ e maŋ shuli eche na be kɔnɔ naseso na bre kumo ere mo kul na e naŋ nya kumo be kasogberge.

¹⁶ Mbra nɛ Enyɛnpe Ebɔrɛ daŋ ta n sa Mosis a yɔ egbawuche nɛ b wɔ bumo tutoana be elaŋ to nɛ bechekilpoana nna na.