Nɔmbɛs 3 - EBƆRƐ BE KAWƆL

Ɛɛrɔn be mbinyɛnsobi be asheŋ

¹ Jemanɛ nɛ Enyɛnpe Ebɔrɛ daŋ malga Mosis kutɔ ashi kebeegboŋ nɛ baa tre Sainai na so na,

² Ɛɛrɔn daa kɔ mbinyɛnsobi ana nna. Nadab e daa la enimuso, n ta Abihu nɛ Eliaza nɛ Itama m bɛ so.

³ Bumo be amu so nɛ b daŋ chulgi ŋku n wurgeso n lara bumo n yili fanɛ bɔrɛmatapoana nna.

⁴ Ama Nadab nɛ Abihu bre daŋ wu, saŋɛ nɛ b daŋ ta edɛ nɛ a maŋ daga n chɔ sarga nɛ b lara n sa Enyɛnpe Ebɔrɛ ashi Sainai be keshishɛrsawule na so nna. Bumo alɛ daa maŋ kɔ mbinyɛnsobi. Amoso Eliaza nɛ Itama nawule e daa la bɔrɛmatapoana jemanɛ nɛ bumo tuto, Ɛɛrɔn daa wɔ ŋkpa to na kikɛ.

Livaiebi be kushuŋ be asheŋ

⁵ Ndoŋ nna nɛ Enyɛnpe Ebɔrɛ na kaŋɛ Mosis le:

⁶ “Lara Livai be yiri na nɛ b baa chɛ bɔrɛmatapo Ɛɛrɔn nɛ mbe mbia to a shuŋ kabɔrɛmata be kushuŋ.

⁷ Bumo e naaŋ baa chɛ bɔrɛmatapoana na to a shuŋ Israɛlebi na ashi Enyɛnpe be wajɛbu na to.

⁸ Livaiebi na e naaŋ baa keni Enyɛnpe be wajɛbu na nɛ asɔ nɛ a wɔ kumo to kikɛ so a sa Israɛlebi na kikɛ.

⁹ Bumo koŋwule na malɛ e naaŋ baa chɛ Ɛɛrɔn nɛ mbe mbinyɛnsobi to a shuŋ nshɛr be wajɛbu na to.

¹⁰ Lara Ɛɛrɔn nɛ mbe bibinyɛn nɛ b baa la bɔrɛmatapoana. Esa pɔtɛ kama nɛ e pɛl n shuŋ bɔrɛmatapo be kushuŋ b mɔ mo.”

¹¹ Kede be kaman nɛ Enyɛnpe Ebɔrɛ naŋ kaŋɛ Mosis le:

^12-13 “Ŋ ka daŋ mɔ Ijiptebi na be ewurkoŋnyɛn na, n daŋ yili kumo nna fanɛ Israɛlebi be ewurkoŋnyɛn kikɛ nɛ bumo be asɔbɔya be ewurkoŋnyɛn la meya nna. Ama naniere bre Livaiebi na nɛ n lara fanɛ b tal Israɛlebi na be ewurkoŋnyɛn to. Amoso b la meya nna. Ma e la Enyɛnpe Ebɔrɛ na.”

B ka karga Livaiebi na be asheŋ

¹⁴ Le nɛ Enyɛnpe Ebɔrɛ naŋ kaŋɛ Mosis ashi Sainai be keshishɛrsawule na so:

¹⁵ “Karga Livaiebi na be benyɛn kikɛ nɛ b fo kufɔl ŋko m baŋ so mbuna mbuna so nɛ kanaŋ kanaŋ so.”

¹⁶ Nɛ Mosis wora loŋ.

¹⁷ Livai daa kɔ mbinyɛnsobi asa nna. Bumo e daa la Gɛshɔn nɛ Kohaf nɛ Mɛrari. Bumo e daŋ ki bumo be mbuna be benimu.

¹⁸ Gɛshɔn be mbinyɛnsobi e daa la Libni nɛ Shimei.

¹⁹ Kohaf malɛ be mbinyɛnsobi e daa la Amram nɛ Izha nɛ Hibrɔn nɛ Uziɛl.

²⁰ Nɛ Mɛrari malɛ be mbinyɛnsobi daa la Maali nɛ Muushi. Bede e daa la Livai be mbinyɛnsobi nɛ mo nanabinyɛnsoana. Bumo alɛ e daŋ ba ki Livai be kaman to ebi.

²¹ Libni nɛ Shimei be nnaŋ e la Gɛshɔn be kabuna ebi na.

²² Benyɛn nɛ b fo kufɔl ŋko m baŋ so nɛ b daŋ karga ashi Gɛshɔn be kabuna kikɛ, daa wɔ ŋgboŋ ashunu nɛ alfa anu.

²³ Gɛshɔn be kabuna ebi na beeŋ wora bumo be echenakpa ashi nshɛr be wajɛbu na be epeŋitɔrkpa be kaba so na

²⁴ nɛ Laɛl pibinyɛn Eliazaf e baa la bumo be enimu.

^25-26 Bumo be kushuŋ e la kebaakeni Enyɛnpe be wajɛbu na gbagba so nɛ asɔ nɛ baa ta a yuu kumo nɛ amo nɛ baa ta a yuu a kulti kumo nɛ kumo be epatisa nɛ efɔlana nɛ asɔ kama nɛ a ti amo so na.

²⁷ Amramebi nɛ Izaaebi nɛ Hibrɔnebi nɛ Uziɛlebi e la Kohaf be kabuna ebi na.

²⁸ Benyɛn nɛ b fo kufɔl ŋko m baŋ so nɛ b daŋ karga ashi Kohaf be kabuna daa wɔ benyɛn ŋgboŋ aburwa nɛ alfa ashe. Kohafebi na e daa keni Enyɛnpe be wajɛbu na so.

²⁹ Kohaf be kabuna ebi na beeŋ wora bumo be echenakpa ashi wajɛbu na be kelargato be kaseto be kaba so.

³⁰ Uziɛl pibinyɛn Elizafan e daa la bumo be enimu.

³¹ Bumo e naa keni ŋkre be deka nɛ k wɔ acheembiana to be kakpa cheembi na so, nɛ teebɔl na nɛ kefitilatɔl na nɛ ebɔrɛsureana na nɛ ntishaŋ nɛ bɔrɛmatapoana na bee ta a wora asheŋ ashi Enyɛnpe be wajɛbu na to nɛ patisa nɛ k wɔ acheembiana to be kakpa cheembi na be kabuna to na kikɛ so. Bumo e naa bela le be asɔ ere a yili mboŋ nseŋ naa bela amo ashi to.

³² Bɔrɛmatapo nimuso Ɛɛrɔn pibinyɛn Eliaza e daa la Livaiebi na be enimu. Mo nɛ b daŋ lara fanɛ e baa la basa nɛ baa shuŋ Enyɛnpe be wajɛbu na to na be ejuŋkparpo.

³³ Maali nɛ Muushi la nnaŋ nɛ ashi Mɛrari be kabuna ebi nna.

³⁴ Bumo be benyɛn nɛ b fo kufɔl ŋko m baŋ so nɛ b daŋ karga daa wɔ ŋgboŋ ashe nɛ alfa anyɔ.

³⁵ Mɛrari be kabuna ebi na beeŋ wora bumo be echenakpa ashi wajɛbu na be kelargato be esoso be kaba so nɛ Abihail pibinyɛn Zuriɛl e baa la kabuna na be enimu.

³⁶ Bumo e naaŋ baa keni wajɛbu na be ndibi yuuso nɛ amo be adeŋiso nɛ amo be atɔl nɛ amo be asɔ nɛ a ti amo so na kikɛ so. Bumo e daa wora wajɛbu na be keyu be kushuŋ kikɛ.

³⁷ Bumo koŋwule na e daa keni Enyɛnpe be wajɛbu na be kelɔnɛ be ndibi yuuso nɛ amo be atɔl nɛ amo be ayir nɛ efɔlana kikɛ so.

³⁸ Mosis nɛ Ɛɛrɔn nɛ Ɛɛrɔn be mbia beeŋ wora bumo be echenakpa ashi wajɛbu na be anishito a laŋɛ epeŋilarkpa be kaba so. Bumo e naaŋ baa juŋkpar Israɛlebi na nɛ b baa bunyaŋ Enyɛnpe Ebɔrɛ. Esa pɔtɛ kama malɛ nɛ e pɛl n sɔ Mosis ŋko Ɛɛrɔn be kushuŋ a shuŋ, b mɔ mo.

³⁹ Benyɛn nɛ b fo kufɔl ŋko m baŋ so nɛ Enyɛnpe Ebɔrɛ daŋ kaŋɛ Mosis nɛ Ɛɛrɔn fanɛ b karga ashi Livai be kabuna na kikɛ daa wɔ basa ŋgboŋ adunyɔ nɛ anyɔ.

Livaiebi na ka yili ewurkoŋnyɛn be katelamu to be asheŋ

⁴⁰ Nɛ Enyɛnpe Ebɔrɛ naŋ kaŋɛ Mosis le: “Sibɛ Israɛlebi be ewurkoŋnyɛn nɛ b fo kufɔl ŋko m baŋ so be atre n wɔtɔ kawɔl to.

⁴¹ Shin nɛ Livaiebi na e yili Israɛlebi na be ewurkoŋnyɛn be katelamu to n shin nɛ Livaiebi na be asɔbɔya e yili Israɛlebi na be asɔbɔya be ewurkoŋ be katelamu to n sa ma. Ŋkpal manɛ so, b la meya nna.”

⁴² Ndoŋ nna nɛ Mosis wora Enyɛnpe Ebɔrɛ kasonu nseŋ karga ewurkoŋnyɛn na kikɛ n sibɛ bumo be atre n wɔtɔ kawɔl to.

⁴³ Ewurkoŋnyɛn nɛ b fo kufɔl ŋko m baŋ so nɛ b daŋ sibɛ bumo be atre na kikɛ daa wɔ ŋgboŋ adunyɔ nɛ anyɔ nɛ alfa anyɔ nɛ adushunu nɛ asa.

⁴⁴ Nɛ Enyɛnpe Ebɔrɛ naŋ kaŋɛ Mosis le:

⁴⁵ “Shin nɛ Livaiebi na e yili Israɛlebi be ewurkoŋnyɛn be katelamu to nɛ Livaiebi na be asɔbɔya malɛ e tal Israɛlebi na be asɔbɔya be ewurkoŋ to.

⁴⁶ Ŋkpal Israɛlebi be ewurkoŋnyɛn ka shi a chɔ Livaiebi kikɛ na so, a daga b ka tɔ ewurkoŋnyɛn alfa anyɔ nɛ adushunu nɛ asa nɛ b chɔ so na ashi ma kutɔ.

⁴⁷ Shin nɛ b tɔ bumo be ekama gbiti be ndarbi anu fanɛ kananɛ baa karga amansherbi wajɛbu na to na.

⁴⁸ A daga fanɛ b ta le be amansherbi ere n sa Ɛɛrɔn nɛ mbe mbinyɛnsobi.”

⁴⁹ Ndoŋ nna nɛ Mosis sɔ ewurkoŋnyɛn alfa anyɔ nɛ adushunu nɛ asa nɛ b chɔ so na be amansherbi.

⁵⁰ Amansherbi na kikɛ daa wɔ gbiti be ndarbi kagboŋ nɛ alfa asa nɛ adeshe nɛ anu.

⁵¹ Mosis daŋ ta amo nna n sa Ɛɛrɔn nɛ mbe mbinyɛnsobi fanɛ kananɛ Enyɛnpe Ebɔrɛ kaŋɛ mo na.