Nɔmbɛs 29 - EBƆRƐ BE KAWƆL

Kafɛ popɔr be kachɛgboŋ be esarga be asheŋ

¹ “Kufɔl shunusopo to be kachɛ juŋkparso na, ekama e sa maŋ shuŋ kushuŋ kikɛ. Men shɛr n foŋ mbel m bunyaŋ Enyɛnpe Ebɔrɛ kumo be kamɔnchɛ.

² Men ta gbolu fɔlbi nɛ k maŋ kɔ ndulgi nɛ kpakpa nɛ k maŋ kɔ ndulgi nɛ nfɛ koko be ekpakpafɔlbi ashunu nɛ a maŋ kɔ ndulgi kikɛ m ba lara sarga nɛ kumo be efɛa wɔ ebel n sa Enyɛnpe Ebɔrɛ.

³ Men ta nyifu lela kurwa asa nɛ b ta ɔlif be ŋku m baga amo n ti gbolu na so, n ta nyifu kurwa anyɔ n ti kpakpa na so,

⁴ nseŋ ta nyifu kurwa koŋwule n ti nfɛ koko be ekpakpa na be kekama so n lara sarga.

⁵ Men ta kaboelote n ti amo so n lara alubi be sarga.

⁶ Men lara amo n ti sarga chɔɔso nɛ menyee lara kufɔl kikɛ be kachɛ juŋkparso na nɛ karechɛ kama be esarga chɔɔso na nɛ amo be nyifu nɛ yabra be esarga nɛ amo be efɛa bee wora Enyɛnpe Ebɔrɛ ebel na so.

Alubi be ketampaŋ be esarga be asheŋ

⁷ Men sa maŋ kaŋ shuŋ kushuŋ kikɛ ŋko n ji ajibi kufɔl shunusopo na be kachɛ kudusopo na. Men ba abar so m ba bunyaŋ Enyɛnpe Ebɔrɛ kumo be kamɔnchɛ.

⁸ Men ta gbolu fɔlbi nɛ k maŋ kɔ ndulgi nɛ kpakpa nɛ k maŋ kɔ ndulgi nɛ nfɛ koko be ekpakpafɔlbi ashunu nɛ a maŋ kɔ ndulgi kikɛ m ba lara sarga nɛ kumo be efɛa wɔ ebel n sa Enyɛnpe Ebɔrɛ.

⁹ Men ta nyifu lela kurwa asa nɛ b ta ɔlif be ŋku m baga amo n ti gbolu na so, n ta nyifu kurwa anyɔ n ti kpakpa na so,

¹⁰ nseŋ ta nyifu kurwa koŋwule n ti ekpakpafɔlbi na be kekama so n lara sarga.

¹¹ Men ta kaboelote n ti amo so n lara alubi be ketampaŋ be sarga. Men lara amo n ti kachɛ kama be esarga chɔɔso na so.

Nwu be esarga be asheŋ

¹² Men shɛr kufɔl shunusopo na be kachɛ kuduanusopo na n ji kachɛgboŋ m bɛ abar so nchɛnshunu m maŋkura Enyɛnpe Ebɔrɛ. Men sa maŋ shuŋ kushuŋ kikɛ loŋ be kachɛ na.

¹³ Kumo be kachɛ juŋkparso na men ta egbolu fɔlbi kuduasa nɛ a maŋ kɔ ndulgi nɛ ekpakpa anyɔ nɛ a maŋ kɔ ndulgi nɛ nfɛ koko be ekpakpafɔlbi kuduana nɛ a maŋ kɔ ndulgi n lara ajibi be sarga nɛ amo be efɛa wɔ ebel n sa Enyɛnpe Ebɔrɛ.

¹⁴ Men ta nyifu lela kurwa asa nɛ b ta ɔlif be ŋku m baga n ti gbolu na be kekama so, n ta nyifu kurwa anyɔ n ti kpakpa na be kekama so,

¹⁵ nseŋ ta nyifu kurwa koŋwule n ti ekpakpafɔlbi na be kekama so n lara sarga.

¹⁶ Men ta kaboelote n lara alubi be sarga n ti amo nɛ kachɛ kama be esarga chɔɔso nɛ amo be yabra nɛ nyifu be esarga so.

¹⁷ Kachɛ nyɔsopo na, men ta egbolu fɔlbi nɛ a maŋ kɔ ndulgi kuduanyɔ nɛ ekpakpa nɛ a maŋ kɔ ndulgi anyɔ nɛ nfɛ koko be ekpakpafɔlbi nɛ a maŋ kɔ ndulgi kuduana n lara sarga.

^18-19 Men ta nyifu nɛ yabra kananɛ k daga fanɛ b ta n ti kusɔbɔya kama so, nɛ kaboelote n ti asɔbɔya na so n lara sarga.

²⁰ Kachɛ sasopo na men ta egbolu fɔlbi kudukako nɛ ekpakpa anyɔ nɛ nfɛ koko be ekpakpafɔlbi kuduana n lara sarga.

^21-22 Men ta nyifu nɛ yabra kananɛ k daga fanɛ b ta n ti kusɔbɔya kama so, nɛ kaboelote n ti asɔbɔya na so n lara sarga na.

²³ Kachɛ nasopo na, men ta egbolu fɔlbi kudu nɛ ekpakpa anyɔ nɛ nfɛ koko be ekpakpafɔlbi nɛ amo kikɛ maŋ kɔ ndulgi n lara sarga.

^24-25 Men ta nyifu nɛ yabra kananɛ k daga fanɛ b ta n ti kusɔbɔya kama so, nɛ kaboelote n ti asɔbɔya na so n lara sarga na.

²⁶ Kachɛ nusopo na, men ta egbolu fɔlbi akpanu nɛ ekpakpa anyɔ nɛ nfɛ koko be ekpakpafɔlbi kuduana nɛ amo kikɛ maŋ kɔ ndulgi n lara sarga.

^27-28 Men ta nyifu nɛ yabra fanɛ kananɛ men daŋ wora kachɛ juŋkparso na n ti asɔbɔya na so n lara sarga.

²⁹ Kachɛ shesopo na, men ta egbolu fɔlbi aburwa nɛ ekpakpa anyɔ nɛ nfɛ koko be ekpakpafɔlbi kuduana nɛ amo kikɛ maŋ kɔ ndulgi n lara sarga.

^30-31 Men ta nyifu nɛ yabra kananɛ k daga fanɛ b ta n ti kusɔbɔya kama so, nɛ kaboelote n ti asɔbɔya na so n lara sarga na.

³² Kachɛ shunusopo na, men ta egbolu ashunu nɛ ekpakpa anyɔ nɛ nfɛ koko be ekpakpafɔlbi kuduana nɛ amo kikɛ maŋ kɔ ndulgi n lara sarga.

^33-34 Men ta nyifu nɛ yabra kananɛ k daga fanɛ b ta n ti kusɔbɔya kama so, nɛ kaboelote n ti asɔbɔya na so n lara sarga na.

³⁵ Kachɛ burwasopo na nɛ men shɛr abar so m bunyaŋ Ebɔrɛ. Menyi alɛ e sa maŋ kaŋ shuŋ loŋ be kachɛ.

³⁶ Men ta gbolu koŋwule nɛ kpakpa koŋwule nɛ nfɛ koko be ekpakpafɔlbi ashunu nɛ amo kikɛ maŋ kɔ ndulgi n lara sarga chɔɔso nɛ kumo be efɛa bee wora Enyɛnpe Ebɔrɛ na ebel n sa mo.

^37-38 Men ta nyifu nɛ yabra nɛ asɔ nɛ a daga kikɛ fanɛ kananɛ men daŋ wora kachɛ juŋkparso na n ti asɔbɔya na so n lara sarga na.

³⁹ Men baa lara le be esarga ere kachɛgboŋ achɛ kikɛ n ti keparso ŋko kɔnɔ be ketia be esarga so.”

⁴⁰ Ndoŋ nna nɛ Mosis kaŋɛ Israɛlebi na kusɔ nɛ Enyɛnpe Ebɔrɛ kaŋɛ mo na.