Nɔmbɛs 28 - EBƆRƐ BE KAWƆL

Karechɛ kama be esarga be asheŋ

¹ Nɛ Enyɛnpe Ebɔrɛ kaŋɛ Mosis

² fanɛ e kaŋɛ Israɛlebi na kenishipereso nɛ b baa ta bumo be ajibi be esarga nɛ amo be efɛa bee wora Enyɛnpe Ebɔrɛ ebel ga na m ba ka sa Ebɔrɛ saŋɛ nɛ k daga.

³ B ta nfɛ koko be ekpakpa anyɔ nɛ a maŋ kɔ ndulgi kikɛ n lara karechɛ kikɛ be ajibi be sarga chɔɔso.

⁴ B ta kukoŋwule n lara sarga kachipurso nseŋ ta kenyɔsopo na malɛ n lara sarga kaaseso saŋɛ nɛ kakpa bee pɛ anishi na.

⁵ B ta ɔlif be ŋku kɔlba koŋwule m baga ayunyifu kurwa koŋwule n ti mbolpɔ na be kekama so.

⁶ Kebeegboŋ nɛ baa tre Sainai na so nɛ b daŋ lara sososo be karechɛ kama be sarga chɔɔso nɛ amo be efɛa bee wora Enyɛnpe Ebɔrɛ ebel ga ere.

⁷ B ta yabra belbelso kɔlba koŋwule n chulgi n wurge bɔrɛsure na so n ti ekpakpafɔlbi na be kekama so n lara sarga n sa Enyɛnpe Ebɔrɛ.

⁸ Men ta kpakpafɔlbi nyɔsopo na nɛ yabra nɛ ayunyifu n lara kaaseso be sarga na fanɛ kananɛ men wora kachipurso na. Le be sarga be edishi be efɛa bee wora Enyɛnpe Ebɔrɛ na ebel nna.

Kewushiachɛ be sarga be asheŋ

⁹ B ta nfɛ koko be ekpakpa anyɔ nɛ a maŋ kɔ ndulgi kikɛ nseŋ ta ɔlif be ŋku m baga nyifu kurwa anyɔ n ti yabra belbelso n lara sarga Kewushiachɛ.

¹⁰ B baa lara le be sarga chɔɔ so ere Kewushiachɛ kikɛ n ti karechɛ kama be ayu nɛ yabra be esarga na so.

Kufɔl kikɛ to be kachɛ juŋkparso be sarga be asheŋ

¹¹ Kufɔl kikɛ be kachɛ juŋkparso men lara egbolu fɔlbi anyɔ nɛ b maŋ kɔ ndulgi, nɛ kpakpa koŋwule nɛ k maŋ kɔ ndulgi, nɛ nfɛ koko be ekpakpa ashunu nɛ a maŋ kɔ ndulgi m ba sa Enyɛnpe Ebɔrɛ.

¹² B ta nyifu kurwa asa nɛ b ta ɔlif be ŋku m baga n ti gbolu kama so, nɛ nyifu kurwa anyɔ n ti kpakpa kama so,

¹³ nɛ nyifu kurwa koŋwule n ti nfɛ koko be ekpakpa na be kekama malɛ so n lara esarga nɛ amo be efɛa bee wora Enyɛnpe Ebɔrɛ na ebel.

¹⁴ B ta yabra kɔlba anyɔ n ti gbolu kama so, n ta yabra kɔlba koŋwule nɛ bargato n ti kpakpa kama so nseŋ ta yabra kɔlba koŋwule malɛ n ti nfɛ koko be ekpakpa na be kekama so n lara yabra be sarga. Kafɛ kikɛ be kufɔl kikɛ be kachɛ juŋkparso be sarga be mbra nna na.

¹⁵ B ta kaboelote n ti karechɛ kama be sarga chɔɔso na nɛ yabra be sarga na so n lara alubi be sarga.

Bodobodo nɛ a maŋ kɔ yiisi na be sarga be asheŋ

¹⁶ Kufɔl juŋkparso na be kachɛ kuduanasopo kikɛ b baa ji kebansonchoŋ be kejigboŋ na a maŋkura Enyɛnpe Ebɔrɛ na.

¹⁷ Nseŋ yili kufɔl na be kachɛ kuduanusopo n ji kachɛgboŋ na m bɛ abar so nchɛ ashunu nsaa ji bodobodo nɛ a maŋ kɔ yiisi loŋ be nchɛ na.

¹⁸ Kachɛ juŋkparso nɛ baa ji kachɛgboŋ na, b sa maŋ shuŋ kushuŋ kikɛ ama b ba abar so m ba bunyaŋ Ebɔrɛ.

¹⁹ B ta egbolu fɔlbi anyɔ nɛ a maŋ kɔ ndulgi nɛ kpakpa koŋwule nɛ k maŋ kɔ ndulgi nɛ nfɛ koko be ekpakpa ashunu nɛ b maŋ kɔ ndulgi m ba lara sarga chɔɔso n sa Enyɛnpe Ebɔrɛ.

²⁰ B ta nyifu kurwa asa nɛ b ta ɔlif be ŋku m baga n ti gbolu kama so, n ta nyifu kurwa anyɔ n ti kpakpa kama malɛ so,

²¹ nseŋ ta nyifu kurwa koŋwule n ti nfɛ koko be kpakpa kama malɛ so n lara esarga.

²² B ta kaboelote n ti so n lara alubi be sarga daŋkare be ekpa so n sa basa na.

²³ B lara amo n ti karechɛ kama be sarga nɛ baa lara kachipurso kikɛ na so.

²⁴ Loŋ koŋwule na e daga fanɛ b lara ajibi nɛ amo be efɛa wɔ ebel be sarga n sa Enyɛnpe Ebɔrɛ nchɛ ashunu nɛ a bɛ abar so na gba.

²⁵ Men shɛr abar so kachɛ shunusopo na m bunyaŋ Enyɛnpe Ebɔrɛ. Menyi alɛ e sa maŋ kaŋ shuŋ kushuŋ kikɛ kumo be kamɔnchɛ.

Kasɔteŋi be kejigboŋ be sarga be asheŋ

²⁶ A daga fanɛ men be ekama ka wushi ashi mbe ashuŋ to kasɔteŋi be kachɛgboŋ na be kachɛ juŋkparso, nseŋ ta mbe ayu popɔr be sarga m ba sa Enyɛnpe Ebɔrɛ na, nseŋ shɛr abar so m bunyaŋ mo.

²⁷ Men ta egbolu fɔlbi anyɔ nɛ a maŋ kɔ ndulgi nɛ kpakpa koŋwule nɛ k maŋ kɔ ndulgi nɛ nfɛ koko be ekpakpa ashunu nɛ a maŋ kɔ ndulgi m ba lara sarga chɔɔso nɛ amo be efɛa bee wora Enyɛnpe Ebɔrɛ ebel na n sa mo.

²⁸ Men ta ayunyifu kurwa asa nɛ b ta ɔlif be ŋku m baga n ti gbolu kama so, n ta ayunyifu kurwa anyɔ n ti kpakpa kama so,

²⁹ nseŋ ta ayunyifu kurwa koŋwule n ti nfɛ koko be ekpakpa na be kekama so n lara sarga na.

³⁰ Men ta kaboelote n ti so n lara alubi be sarga.

³¹ Men ta asɔbɔya na nɛ yabra n ti asɔ nɛ b kɔ a lara karechɛ kama be sarga chɔɔso nɛ ayu be sarga na so n lara sarga. Men baa da so nɛ asɔbɔya na be kekama maaŋ ba kɔ ndulgi.