Nɔmbɛs 27 - EBƆRƐ BE KAWƆL

Zelofehad be mbicheso be asheŋ

¹ Heefa pibinyɛn Zelofehad be mbichesobi e daa la Maala nɛ Nowa nɛ Hogla nɛ Milka nɛ Tirza. Heefa malɛ mo tuto e daa la Giliad nɛ Giliad malɛ mo tuto daa la Makiir nɛ Makiir malɛ mo tuto daa la Manase nɛ Manase malɛ mo tuto daa la Josɛf.

² Kachako nɛ mbe mbichesobi na ya yili Mosis nɛ bɔrɛmatapo Eliaza nɛ bejuŋkparpoana na nɛ kade na to ebi kikɛ be anishito ashi Enyɛnpe Ebɔrɛ be wajɛbu na be kabuna to ŋ kaŋɛ le:

³ “An tuto daŋ wu keshishɛrsawule na so nna. Mo alɛ daŋ maŋ wu nna ŋkpal e ka bɛ Koora so nseŋ kini kebɛ Enyɛnpe Ebɔrɛ so so. Mo gbagba be kulubi e daŋ mɔ mo. Mo alɛ daŋ maŋ kurge mbinyɛnsobi.

⁴ K daga fanɛ an tuto be ketre ka mur Israɛl to ŋkpal e ka maŋ kurge mbinyɛnsobi so a? Men sa anyi alɛ gba kapetɛ nɛ k la an tuto be kabuna peya na.”

⁵ Ndoŋ nna nɛ Mosis ta bumo be asheŋ na n yɔ Enyɛnpe Ebɔrɛ kutɔ,

⁶ nɛ Enyɛnpe Ebɔrɛ kaŋɛ mo le:

⁷ “Zelofehad be mbichesobi na kɔ kashenteŋ. Ta kapetɛ nɛ bumo tuto daa beeŋ nya ashi mbe kanaŋ to na n sa bumo.

⁸ Kaŋɛ Israɛlebi na fanɛ a daga fanɛ esa kama nɛ e maŋ kurge ebinyɛn nseŋ wu, mo pibiche ka ji mbe kapetɛ.

⁹ Nɛ fanɛ e maŋ kɔ ebiche malɛ, fo ta mbe kapetɛ n sa mo sipo ŋko mo da nyɛnsoana.

¹⁰ Nɛ fanɛ e maŋ kɔ besipo ŋko beda nyɛnsoana malɛ, kumo ere mo tuto mo siponyɛnsoana e naŋ ji kapetɛ na.

¹¹ Nɛ fanɛ mo tuto maŋ kɔ besiponyɛnso ŋko bewɔpa, kumo ere b ta kapetɛ na n sa kanaŋ na to be ekurgepo nɛ e mata mo ga. Ma mbra nna na nɛ k daga Israɛlebi kikɛ ka bee bɛ kumo so.”

B ka lara Joshuwa fanɛ e sɔ Mosis so be asheŋ

¹² Kachako nɛ Enyɛnpe Ebɔrɛ kaŋɛ Mosis le: “Dii abeegboŋ nɛ baa tre Abarim na be esoso ŋ keni kasawule nɛ n ta n sa Israɛlebi na.

¹³ Fo baŋ keni kasawule na n loge fo alɛ gba beeŋ wu fanɛ kananɛ fo da Ɛɛrɔn wu na.

¹⁴ Ŋkpal manɛ so, Israɛlebi na ka fubel m bile asheŋ m malga ŋ gbiti ma ashi Mɛriba nɛ k mata Kadɛsh ashi Zin be keshishɛrsawule so na, kakpa nɛ n shin nɛ nchu lar kefalta to na, menyi basa anyɔ na daŋ maŋ yirda ma nseŋ kini keshin nɛ Israɛlebi na pin ma eleŋ.”

¹⁵ Nɛ Mosis kule Ebɔrɛ ŋ kaŋɛ le:

¹⁶ “Enyɛnpe Ebɔrɛ nɛ kusɔ kikɛ be ŋkpa wɔ fo enɔ to, jande lara esa nɛ e beeŋ tiŋ n juŋkpar basa ere

¹⁷ nsaa beeŋ tiŋ ŋ ŋini bumo kena be kekɔ saŋɛ na so fo basa maaŋ baa du fanɛ mbolpɔ nɛ b maŋ kɔ ekpapo na.”

¹⁸ Ndoŋ nna nɛ Enyɛnpe Ebɔrɛ kaŋɛ Mosis le: “Lara Nun pibinyɛn Joshuwa nɛ kiyoyu na bɔlɔ mo to na nseŋ ta fo enɔana n deŋi mbe kumu so.

¹⁹ Shin nɛ e yili bɔrɛmatapo Eliaza nɛ jimaŋ na kikɛ be anishito fanɛ esa nɛ e beeŋ sɔ fo so.

²⁰ Ta fo kenimu be eleŋ n sa mo, saŋɛ na so Israɛl be basa kikɛ beeŋ baa nu n sa mo.

²¹ Bɔrɛmatapowura Eliaza beeŋ baa ŋini mo kusɔ nɛ ma, Enyɛnpe Ebɔrɛ bee sha e ka bee wora. Loŋ e naŋ shin nɛ e baa tiŋ a juŋkpar Israɛlebi na a yɔ a ba.”

²² Nɛ Mosis wora kusɔ nɛ Enyɛnpe Ebɔrɛ bee sha e ka wora na kikɛ nseŋ keta Joshuwa n ya yili bɔrɛmatapo Eliaza nɛ jimaŋ na kikɛ be anishito.

²³ Mosis daŋ ta mbe enɔana nna n deŋi Joshuwa so n ta mo n ŋini Israɛl ebi fanɛ mo e ki bumo be ejuŋkparpo, fanɛ kananɛ Enyɛnpe Ebɔrɛ kaŋɛ na.