Nɔmbɛs 25 - EBƆRƐ BE KAWƆL

Israɛlebi nɛ b wɔ Piyɔɔ na be asheŋ

¹ Saŋɛ nɛ Israɛlebi na daŋ wora bumo be keeyi to ashi kepla nɛ baa tre Akasia na, nɛ bumo be benyɛn ko fara a di Mowab be beche nɛ b wɔ ndoŋ na.

² Le be beche ere daa tre Israɛlebi na nna a yɔ Mowab be kegbir na be esarga be kejigboŋ to. Israɛlebi na daa tu bumo a ji agbirjibi na nna nsaa bunyaŋ

³ kegbir nɛ baa tre Baal Piyɔɔ na. Amoso Enyɛnpe Ebɔrɛ daŋ nya agbo alegaiso nna n wɔtɔ bumo

⁴ nseŋ kaŋɛ Mosis le: “Keta Israɛl be bejuŋkparpo kama nɛ baa yɔ kegbir na to na m ba mɔ bumo kapiidi ma anishito, saŋɛ na so, ma agbo maaŋ ba Israɛlebi na kikɛ so.”

⁵ Nɛ Mosis kaŋɛ Israɛl be benimuana na le: “Menyi be ekama e mɔ menyi be yiri to be esa kama nɛ e bee bunyaŋ kegbir nɛ baa tre Baal Piyɔɔ na.”

⁶ Mosis nɛ Israɛlebi na kikɛ ka shɛr Enyɛnpe Ebɔrɛ be wajɛbu na ase a shu na, nɛ Israɛlebi na be eko keta Midian be eche m bɔla bumo be anishito n yɔ mbe wajɛbu to.

⁷ Eliaza pibinyɛn Finihas nɛ e la bɔrɛmatapo Ɛɛrɔn mo nanabi na ka wu bumo, nɛ e lar nshɛr na to n ya ta mbe kekpa,

⁸ m bɛ Israɛl be kanyɛn na nɛ eche na so n yɔ mbe wajɛbu to n ya da mo nɛ eche na kikɛ m mata abar. Ndoŋ nna nɛ Enyɛnpe Ebɔrɛ shin nɛ aleblawu nɛ k bee tɔrɔ Israɛlebi na kikɛ kuu.

⁹ Ama basa nɛ aleblawu na daŋ mɔ daa la ŋgboŋ adunyɔ nɛ ana nna.

¹⁰ Kede be kaman nɛ Enyɛnpe Ebɔrɛ kaŋɛ Mosis le:

¹¹ “Ŋkpal kusɔ nɛ Finihas wora ere so, ma agbo maŋ naa wɔ Israɛlebi so. E maŋ shuli fanɛ esa kikɛ e shuŋ kegbir n ti ma Enyɛnpe Ebɔrɛ na so. Kumo so nɛ m maŋ kaa agbo m mur Israɛlebi kikɛ na.

¹² Amoso kaŋɛ mo fanɛ mee kre ma nɛ mo be kefɛato be kagbenewushi be ŋkre nɛ k beeŋ baa wɔtɔ mbaanaayɔ.

¹³ Mo nɛ mbe kaman to ebi beeŋ baa la bɔrɛmatapoana hale mbaanaayɔ ŋkpal e ka bee kɔ kukɔrkɔ a sa ma nseŋ shin nɛ Israɛlebi na nya alubi be ketampaŋ so.”

¹⁴ Israɛl b esa nɛ b daŋ mɔ mo nɛ Midianche na be ketre e daa la Zimri nɛ mo tuto la Saalu nɛ e daa la Simiɔn be yiri na to be enimu na.

¹⁵ Midianche na be ketre e daa la Kuuzbi. Mo tuto e daa la Zur nɛ e daa la Midian be mbuna na be kuko be enimu na.

¹⁶ Ndoŋ nna nɛ Enyɛnpe Ebɔrɛ kaŋɛ Mosis le:

¹⁷ “Ya kɔ Midianebi na kena m mur bumo kikɛ,

¹⁸ ŋkpal b ka ku efɛ n wora kulubi ŋ gbiti fo ashi Piyɔɔ nɛ ŋkpal b ka mɔ Kuuzbi aleblawu be saŋɛ ashi Piyɔɔ na so.”