Nɔmbɛs 24 - EBƆRƐ BE KAWƆL

¹ Ŋkpal Balaam ka tea nyi fanɛ Enyɛnpe Ebɔrɛ bee sha fanɛ e nɛfa Israɛlebi na so, e daa maŋ wora ŋkilgisheŋ kikɛ fanɛ kananɛ e chɛr a wora saŋko saŋko na. E daŋ kilgi mbe anishi nna n shoŋi keshishɛrsawule na be kaba so

² nseŋ wu Israɛlebi na ka wora bumo be nyi to n chena eyiri yiri be ntuŋ so. Ndoŋ nna nɛ Enyɛnpe Ebɔrɛ be kiyoyu gbelge mo so,

³ nɛ e kaŋɛ le: “Biyɔɔ pibinyɛn Balaam be kubɔya nde: Emo nɛ e bee wu nɛnɛ,

⁴ nsaa nu kusɔ nɛ Ebɔrɛ bee kaŋɛ na. Ma anishi yil nna nɛ k wora ma lemm fanɛ edare na nɛ n nya bɔrɛdare ashi Enyɛnpe Ebɔrɛ kutɔ.

⁵ Israɛlebi, men be ewajɛbu na walɛ pasaa!

⁶ A du nna fanɛ abii be ndibi ka yili m bɛ abar so le siir, ŋko kudɔbi nɛ k mata lɔrkar. A du nna fanɛ asɔrso be ndibi nɛ Enyɛnpe Ebɔrɛ na gbagba du, ŋko ndibi nɛ baa tre sida na ka wɔ eboŋkar.

⁷ Baaŋ nya mbɔrɛchu damta nseŋ duu bumo be adɔjibi kasawule nɛ k kɔ kayul nɛnɛ so. Bumo be ewura be kuwurji beeŋ baa chɔ Amalɛk be ewura Agag peya. Mbe kuwura beeŋ ji eleŋ ga nɛ mbe ketre e dii.

⁸ Ebɔrɛ e lara bumo ashi Ijipt be kasawule so. B kɔ eleŋ nna fanɛ kupuntona na, nsaa kɔ a pɔɔ bumo doŋana so. Baaŋ to bumo doŋana ata nɛ bumo be awibi kikɛ e buri to.

⁹ Bumo be efuli du nna fanɛ buluŋ lempo na. K baa di, wanɛ e naaŋ tiŋ n ya tiŋi kumo. Esa kama nɛ e nɛfa Israɛl, gba bee nya nɛfa nna; Esa kama malɛ nɛ e sho Israɛl kɔnɔ, bee nya kɔnɔsho nna.”

¹⁰ Ndoŋ nna nɛ Ewura Balak nya agbo alegaiso n wɔtɔ Balaam nseŋ a chicha ŋ kaŋɛ le: “N tre fo nna fanɛ fo ba sho n doŋana kɔnɔ, nɛ fo kini nseŋ nɛfa bumo ale asa kikɛ.

¹¹ Lar nfe naniere kikɛ n yɔ epe! N daŋ nase kɔnɔ nna fanɛ meeŋ ka fo kukɔ nɛnɛ ama Enyɛnpe Ebɔrɛ na kuŋ kumo be loŋ be ekpa na.”

¹² Nɛ Balaam malɛ kaŋɛ Ewura Balak le: “Kusɔ nɛ ŋ kaŋɛ mbɔ nɛ fo shuŋi na e la fanɛ,

¹³ hale nɛ fo ta fo ewurkpa be shuwa nɛ gbiti kikɛ gba ŋ kɛ ma, m maaŋ kini kenu n sa Enyɛnpe Ebɔrɛ kikɛ. Kusɔ nɛ Enyɛnpe Ebɔrɛ kaŋɛ, nɛ meeŋ wora.”

Balaam be lalaloge be kewuŋkaŋɛ be asheŋ

¹⁴ Kumo be kaman nɛ Balaam kaŋɛ Ewura Balak le: “Naniere bre mee bɛta a yɔ epe nna na, ama kefiɛso nɛ ŋ kɔ a sa fo a laŋɛ kusɔ nɛ Israɛlebi beeŋ wora menyi kachako so nde.”

¹⁵ Ndoŋ nna nɛ e kaŋɛ le: “Biyɔɔ pibinyɛn Balaam be kubɔya nde, emo nɛ e bee wu nɛnɛ na be mmalga nde.

¹⁶ Mo e naa nu Ebɔrɛ be mmalga nsaa pin amo to; Mo e kɔ nfɛra nɛ k shi Enyɛnpetale Ebɔrɛ na kutɔ, nsaa nya kewuŋkaŋɛ Enyɛnpetale Ebɔrɛ na kutɔ, nsaa tɔr kasawule a bunyaŋ mo na.

¹⁷ N wu fanɛ kachako so, Ewura ko beeŋ lar Israɛl be efuli so a du fanɛ kechɛkpabi nɛ k fulto parr na. E beeŋ lar fanɛ kuwurkpabi ashi Israɛl. E beeŋ mur Mowabebi kikɛ, nseŋ mur Sɛt be kaman to ebi cheche.

¹⁸ E beeŋ kɔ m pɔɔ so mo doŋana Edɔmebi so nseŋ ta bumo be kasawule ŋ ki mbe kapetɛ. Israɛl beeŋ baa kɔ a pɔɔ so saŋkama.

¹⁹ Ejuŋkparpo ko beeŋ ba lar Israɛl kachako m mur basa nɛ b ka kade na to kikɛ.”

²⁰ Balaam ka ku bɔrɛdare n wu Amalɛkebi na, nɛ e kaŋɛ le: “Amalɛk e daa la efuliana ere be kelempo, ama saŋko k beeŋ mur cheche.”

²¹ Kusɔ nɛ e wu ŋ kaŋɛ a laŋɛ Kenebi be kaplɛa so mbe bɔrɛdare na to nde: “Menyee fɛ fanɛ men nya kekuŋ nna, fanɛ kananɛ kabuibi bee tɔl kasha kebee be esoso na.

²² Ama Asiriyaebi kaŋ pɛ menyi, menyeeŋ mur cheche.”

²³ Nɛ Balaam naŋ wu ŋ kaŋɛ le: “Nɛ Ebɔrɛ shuli n wora le, wanɛ bre e naaŋ lar?

²⁴ Basa beeŋ ta nchu so be ekuloŋgboŋana n shi Saiprus m ba kɔ m pɔɔ Asiriya nɛ Heba so. Ama kumo be kaman Saiprus gba beeŋ mur cheche.”

²⁵ Balaam ka malga n loge nɛ e bɛta n yɔ epe nɛ Ewura Balak malɛ gba bɛta mbe ayamu so.