Nɔmbɛs 23 - EBƆRƐ BE KAWƆL

¹ Kumo be kaman nɛ Balaam kaŋɛ Ewura Balak le: “Shin nɛ b pɔr ebɔrɛsure ashunu nfe n sa ma nseŋ bar ma egbolu ashunu nɛ ekpakpa ashunu.”

² Nɛ Ewura Balak shin nɛ b wora loŋ nɛ mo nɛ Balaam ta gbolu koŋwule nɛ kpakpa koŋwule n lara sarga bɔrɛsure na be kekama so.

³ Ndoŋ nna nɛ Balaam kaŋɛ Ewura Balak le: “Baa yil fo sarga ere ase nɛ n yɔ anishito n ya keni, Enyɛnpe Ebɔrɛ beeŋ ba ma kutɔ a? Saŋɛ na so meeŋ kaŋɛ fo kusɔ kama nɛ e lara ŋ ŋini ma, nseŋ dii n yɔ kebee na be kakpa nɛ ndibi nɛ afitiri maŋ wɔ na.”

⁴ Ndoŋ nɛ Ebɔrɛ ba tu mo, nɛ Balaam kaŋɛ: “Enyɛnpe Ebɔrɛ, m pɔr ebɔrɛsure ashunu nseŋ ta gbolu nɛ kpakpa n lara sarga amo be kekama so.”

⁵ Nɛ Enyɛnpe Ebɔrɛ na ta kubɔya n sa Balaam fanɛ e ya sa Ewura Balak.

⁶ Nɛ Balaam bɛta n ya tu Ewura Balak nɛ mo nɛ Mowab be benimu yil mbe esarga na ase.

⁷ Ndoŋ nna nɛ Balaam kaŋɛ: “Mowab be ewura Balak e bar ma ashi Siriya nɛ k wɔ abee be efuli so na fanɛ m ba sho Israɛlebi kɔnɔ n shin nɛ b mur.

⁸ Ama nuso nɛ meeŋ tiŋ n sho basa nɛ Ebɔrɛ nɛfa kɔnɔ, ŋko n shin nɛ basa nɛ Ebɔrɛ maŋ kaŋɛ fanɛ b mur, e mur?

⁹ N yili kebee be esoso n wu bumo. N wɔ kebee so a keni bumo. B la basa nɛ b kɔr bekama to nna. Basa nɛ Ebɔrɛ nɛfa.

¹⁰ Wanɛ e naŋ tiŋ ŋ karga Israɛlebi nɛ b shi m baŋ so ere? Shin nɛ ma lalaloge be nchɛ e baa du fanɛ Ebɔrɛ be basa peya. Shin nɛ n wu fanɛ esa niŋiso.”

¹¹ Nɛ Ewura Balak kaŋɛ Balaam le: “Manɛ nɛ fee wora loŋ? M bar fo nna nɛ fo ba sho n doŋana kɔnɔ, nɛ fo ba kilgi a nɛfa bumo a!”

¹² Nɛ Balaam kaŋɛ: “Kusɔ nɛ Enyɛnpe Ebɔrɛ kaŋɛ fanɛ ŋ kaŋɛ nɛ meeŋ kaŋɛ.”

Balaam be kubɔya nyɔsopo be asheŋ

¹³ Nɛ Ewura Balak kaŋɛ mo: “Shin nɛ an yɔ kaboŋ pɔtɛ nɛ fo ya wu Israɛlebi na be gbrɛbi nɛ b maŋ fo bumo nɛ fo wu na so, saŋɛ na so feeŋ sho bumo kɔnɔ n sa ma.”

¹⁴ Ndoŋ nna nɛ e keta Balaam n yɔ Zɔfim be ndɔ to be kebeegboŋ nɛ baa tre Pisga na be esoso n ya pɔr ebɔrɛsure ashunu ndoŋ gba, nseŋ mɔ gbolu nɛ kpakpa amo be kekama so n lara sarga.

¹⁵ Ndoŋ nna nɛ Balaam kaŋɛ Ewura Balak le: “Baa yil fo sarga ere be kakpa nɛ n yɔ Enyɛnpe Ebɔrɛ na kutɔ m ba.”

¹⁶ Nɛ Enyɛnpe Ebɔrɛ lar Balaam so ŋ kaŋɛ mo kusɔ nɛ e beeŋ ya kaŋɛ Ewura Balak nseŋ shin nɛ e bɛta n yɔ.

¹⁷ Nɛ Balaam bɛta n ya tu Ewura Balak nɛ mo nɛ Mowab be benimu kraa yil esarga na ase. Nɛ Ewura Balak bishi Balaam kusɔ nɛ Enyɛnpe Ebɔrɛ kaŋɛ.

¹⁸ Nɛ Balaam kaŋɛ: “Ewura Balak kaŋ kusoe n nu nfe! Zippɔ pibi Ewura Balak nu nfe.

¹⁹ Ebɔrɛ maŋ la dimɛdi nna a ku efɛ ŋko nyiŋgbasa a chɛrga mbe nfɛra, kusɔ kama nɛ e nase kɔnɔ fanɛ e beeŋ wora, mo alɛ beeŋ wora kumo. E bee malga nna nɛ k bee wora.

²⁰ Ebɔrɛ kaŋɛ ma nna fanɛ m baa nɛfa. M maaŋ tiŋ n chɛrga kusɔ nɛ Ebɔrɛ nɛfa.

²¹ Mee keni a wu fanɛ Israɛl be echefoso be kebaawɔtɔ maaŋ ba kɔ kumulubi nɛ tɔrɔ. Ŋkpal manɛ so Enyɛnpe, bumo be Ebɔrɛ na, wɔ bumo kutɔ nna. B yɛ, mo e la bumo be ewura.

²² Ebɔrɛ e lara bumo ashi Ijipt be kasawule so. Mo e naa kɔ a sa bumo fanɛ kupuntona na.

²³ Kudur ŋko kegbaya be eleŋ kikɛ maŋ wɔtɔ nɛ k beeŋ tiŋ ŋ kɔ m pɔɔ Israɛl be efuli ere so, Basa beeŋ ji Israɛl be asheŋ be shɛda ŋ kaŋɛ le: ‘Men keni kusɔ nɛ Ebɔrɛ wora n sa mbe basa!’

²⁴ Israɛlebi du fanɛ buluŋ lempo nna. K maa wushi kikɛ, ama k baŋ mɔ kumo be kusɔ jiso nna n ji, nseŋ dente kumo be ŋklaŋ.”

²⁵ Ndoŋ nna nɛ Ewura Balak kaŋɛ Balaam le: “Fo ka kini kesho Israɛlebi kɔnɔ ere, kumo ere sa maŋ kaŋ nɛfa bumo gba!”

²⁶ Nɛ Balaam kaŋɛ le: “M maŋ kaŋɛ fo fanɛ kusɔ nɛ Enyɛnpe Ebɔrɛ na kaŋɛ nɛ mee wora a?”

Balaam be kewuŋkaŋɛ sasopo be asheŋ

²⁷ Nɛ Ewura Balak kaŋɛ le: “Ba, nɛ n naŋ keta fo n yɔ kaboŋ ko. Ashere ndoŋ bre beeŋ bɔlɔ Ebɔrɛ kenishi nɛ e shin nɛ fo sho bumo kɔnɔ n sa ma.”

²⁸ Ndoŋ nna nɛ Ewura Balak keta Balaam n yɔ kebeegboŋ nɛ baa tre Piyɔɔ na be esoso be kakpa nɛ feeŋ yili n wu keshishɛrsawule na so kikɛ na.

²⁹ Nɛ Balaam kaŋɛ Ewura Balak le: “Shin nɛ b pɔr ebɔrɛsure ashunu n yili nfe nseŋ pɛ egbolu ashunu nɛ ekpakpa ashunu m bar ma.”

³⁰ Nɛ Ewura Balak wora kusɔ nɛ Balaam kaŋɛ na nseŋ mɔ gbolu nɛ kpakpa n lara sarga ebɔrɛsure na be kekama so.