Nɔmbɛs 22 - EBƆRƐ BE KAWƆL

Mowab be ewura ka shuŋi n tre Balaam be asheŋ

¹ Kumo be kaman nɛ Israɛlebi naŋ ya wora bumo be keeyi to Mowab be keplasawule so ashi Jɔɔdan be lɔr na be epeŋilarkpa be kaba so, nɛ Jɛriko be kadegboŋ na wɔ kumo be kaba ndoŋ.

² Zippɔ pibinyɛn Ewura Balak nɛ e daa la Mowabebi be ewura na, ka nu kusɔ nɛ Israɛlebi na wora Amɔriebi nɛ kananɛ Israɛlebi na shibi alegaiso na,

³ nɛ kufu pɛ mo nɛ mbe basa kikɛ ga.

⁴ Nɛ Mowabebi na kaŋɛ Midianebi be bejuŋkparpo na le: “Jimaŋ ere beeŋ ba mur anyi be kusɔ kama fanɛ kananɛ gbolu bee we afitiri adɛdɛ so ashi kupuŋ to na.” Amoso Ewura Balak

⁵ daŋ kpal loŋ so nna, n shuŋi mbɔ fanɛ b ta le be kubɔya n ya sa Biyɔɔ pibinyɛn Balaam nɛ e wɔ Pɛɛtɔ nɛ k mata lɔrgboŋ nɛ baa tre Yufreetes nɛ k wɔ Amawu be kasawule so na. “Mee sha nɛ fo pin fanɛ efuli lelemu be basa shi Ijipt be efuli so m ba. Bumo alɛ bee salga to nna a sɔ kaplɛkama nsaa sha kesɔ anyi be kasawule kikɛ.

⁶ B kɔ eleŋ a chɔ anyi ga, amoso jande, ba sho bumo kɔnɔ n sa ma. Ashere loŋ e naaŋ shin nɛ an tiŋ m pɔɔ bumo so nseŋ ju bumo ashi anyi be kasawule ere so. M baa nyi geeŋ fanɛ fo baŋ nɛfa basa, baa nya nɛfa nna, fo naŋ sho basa kɔnɔ, kɔnɔsho bee pɛ bumo nna.”

⁷ Ndoŋ nna nɛ Mowabebi nɛ Midianebi be bejuŋkparpoana na ta amansherbi nɛ Ewura Balak be kubɔya na n yɔ nɛ b ya sa Balaam nɛ e ba shuŋ n sa bumo.

⁸ Nɛ Balaam kaŋɛ bumo le: “Men dese nɛ kare e chɛ nɛ ŋ kaŋɛ menyi kusɔ nɛ Enyɛnpe Ebɔrɛ na kaŋɛ ma.” Amoso bejuŋkparpoana na daŋ dese Balaam kutɔ nna ŋklade.

⁹ Loŋ be kanyɛ na nɛ Ebɔrɛ ba bishi Balaam le: “Basa mo malɛ e wɔ fo kutɔ ere?”

¹⁰ Nɛ e kaŋɛ le: “Mowab be Ewura Balak e shuŋi bumo fanɛ b ba kaŋɛ ma

¹¹ fanɛ basa ko e shi Ijipt be kasawule so m ba sɔ bumo be kasawule so kikɛ n chena. Amoso e bee sha nna fanɛ m ba sho bumo kɔnɔ n sa mo nɛ e tiŋ ŋ kɔ m pɔɔ so bumo so n ju bumo n lar mbe kasawule so.”

¹² Nɛ Enyɛnpe Ebɔrɛ kaŋɛ Balaam le: “Sa maŋ kaŋ tu basa ere n yɔ, fo alɛ maŋ kraa sho Israɛlebi na kɔnɔ, ŋkpal manɛ so ma nɛfa wɔ bumo so nna.”

¹³ Kare ka chɛ kachipurso, nɛ Balaam koso n ya kaŋɛ Ewura Balak be mbɔ le: “Men bɛta n yɔ epe, ŋkpal manɛ so, Enyɛnpe Ebɔrɛ maŋ sa ma ekpa fanɛ n tu menyi n yɔ.”

¹⁴ Ndoŋ nna nɛ mbɔ na bɛta n ya kaŋɛ Ewura Balak fanɛ Balaam kini kebɛ bumo so m ba.

¹⁵ Nɛ Ewura Balak naŋ shuŋi benimu nɛ b shi nsaa kɔ bunyaŋ a chɔ sososo be bumo nɛ e shuŋi na.

¹⁶ Nɛ bumo alɛ ta Ewura Balak be kubɔya n ya kaŋɛ Balaam le: “Ewura Balak yɛ fo sa maŋ shin nɛ kusɔ kama e kuŋ fo keba anyi kutɔ akpa!

¹⁷ E yɛ e beeŋ ka fo kukɔ nseŋ naŋ sa fo kusɔ kama nɛ fee sha n ti so. Amoso jande, ba sho basa na kɔnɔ.”

¹⁸ Ama le nɛ Balaam daŋ kaŋɛ bumo: “Hale Ewura Balak ta ewurkpa be shuwa nɛ gbiti kikɛ gba n sa ma, maaŋ kini kenu n sa Enyɛnpe ma Ebɔrɛ na ekpa kama so.

¹⁹ Menyi alɛ gba beeŋ tiŋ n dese nfe kanyɛ ere fanɛ kananɛ bumo na wora na, nɛ ŋ keni ŋko Enyɛnpe Ebɔrɛ kɔ kusɔ pɔtɛ ko nɛ e kaŋɛ a yɔ kumo be kaplɛa so a!”

²⁰ Kumo be kanyɛso nɛ Ebɔrɛ kaŋɛ Balaam le: “Meeŋ shin nɛ fo tu Ewura Balak be mbɔ na n yɔ Mowab, ama ya wora kusɔ kama nɛ meeŋ kaŋɛ fo.”

²¹ Kumo be ŋklade kachipurso, nɛ Balaam ta gaare n deŋi mbe kurma so nɛ mo nɛ benimuana na yɔ.

Balaam be kurma be asheŋ

²² Balaam daŋ dii mbe kurma nna nɛ mbe nyɛrbi anyɔ ko tu mo a yɔ Mowab, nɛ Ebɔrɛ nya agbo ŋkpal Balaam ka daŋ tu basa na a yɔ so nseŋ shin nɛ mbe malaika ya kuŋ mo akpa.

²³ Balaam be kurma na ka wu malaika ka keta tokobi a yil ekpa na to, nɛ k gbɛ n luri adɔ to. Nɛ Balaam bri kumo nɛ k bɛta m ba ekpa to.

²⁴ Ndoŋ nna nɛ malaika na naaŋ ya yili ekpa mɔebi, nɛ k dese asɔrso nɛ baa tre greep na be adɔana anyɔ nɛ b pɔr ajembu be egbal ŋ kulti na be nferinto.

²⁵ Kurma na ka wu malaika na, nɛ k gbɛ n ya mata egbal na nɛ Balaam be keyadra nyɛa egbal na. Ndoŋ nna nɛ Balaam naŋ bri kumo.

²⁶ Nɛ malaika na naŋ firgi n yɔ anishito n ya yili ekpa na be kakpa mɔebi nɛ kurma na maaŋ nya kakpa ŋ gbɛ n choŋ.

²⁷ Kurma na ka naŋ wu malaika na nɛ k kilgi n dese. Nɛ agbo pɛ Balaam ga nɛ e ta mbe kekpabi a bri kumo.

²⁸ Ndoŋ nna nɛ Enyɛnpe Ebɔrɛ shin nɛ kurma na malga Balaam kutɔ ŋ kaŋɛ le: “Manɛ nɛ n wora fo nɛ fo bri ma ale asa kikɛ?”

²⁹ Nɛ Balaam kaŋɛ: “Ŋkpal fo ka shin nɛ ŋ ki ewulpo na so, n daa kɔ tokobi gba nna, dafanɛ meeŋ mɔ fo.”

³⁰ Ndoŋ nna nɛ kurma na kaŋɛ mo le: “Manɛ ma nɛ fee dii nfɛ damta ere kikɛ na a? Fo daŋ wu ŋ ka wora fo le kikɛ a?” Nɛ Balaam kaŋɛ: “M-m.”

³¹ Nɛ Enyɛnpe Ebɔrɛ bugi Balaam be anishi nɛ e wu malaika na ka keta tokobi a yil ekpa na to. Ndoŋ nna nɛ Balaam kurgi kumu n yuu kasawule.

³² Nɛ malaika na kaŋɛ Balaam le: “Manɛ nna nɛ fo bri fo kurma ale asa kikɛ? M ba nna nɛ m ba kuŋ fo ekpa nɛ fo maaŋ yɔ fo enite ere to.

³³ Fo kurma na wu ma nna nseŋ gbɛ ma ale asa kikɛ. Kurma na daa maŋ gbɛ ma nna, dafanɛ m mɔ fo n yige kumo ere.”

³⁴ Nɛ Balaam kaŋɛ le: “N wora kulubi. N daa maŋ nyi fanɛ fo yil ekpa na to nna a kuŋ ma akpa, ama nɛ fo wu fanɛ k maŋ daga ŋ ka yɔ ndoŋ bre, meeŋ bɛta n yɔ epe.”

³⁵ Nɛ malaika na kaŋɛ: “Fo nɛ Ewura Balak be benimuana ere e baa yɔ, ama ya malga kusɔ nɛ meeŋ kaŋɛ fo na nawule.” Ndoŋ nna nɛ Balaam tu bumo n yɔ.

Ewura Balak ka wora Balaam ansaŋ nɛ keba be asheŋ

³⁶ Ewura Balak ka nu fanɛ Balaam bee ba, nɛ e yɔ nɛ e ya shɛr mo to ashi kade nɛ baa tre Ar nɛ k wɔ Aanɔn be lɔr be ekarso ashi Mowab be kasawule be ekarso na.

³⁷ Nseŋ kaŋɛ mo le: “Manɛ nna nɛ n shuŋi n tre fo sososo na nɛ fo kini keba? Ŋko fee fɛ fanɛ maaŋ tiŋ ŋ ka fo nɛnɛ nna a?”

³⁸ Nɛ Balaam kaŋɛ le: “To m ba nna na! Ama maŋ kɔ eleŋ nɛ ŋ kaŋɛ kusɔ nɛ mee sha. Kusɔ nɛ Ebɔrɛ baŋ kaŋɛ nɛ mee malga.”

³⁹ Ndoŋ nna nɛ Balaam nɛ Ewura Balak kikɛ yɔ Kiriaf Huzɔɔf.

⁴⁰ Nɛ Ewura Balak ya mɔ ana nɛ mbolpɔ nseŋ ta amo be eblaŋ na be ako n sa Balaam nɛ benimu nɛ b wɔ mo kutɔ na.

Balaam be sososo be kewuŋkaŋɛ be asheŋ

⁴¹ Ŋklade kachipurso nɛ Ewura Balak keta Balaam n dii n yɔ Bamɔf Baal, kakpa nɛ Balaam beeŋ tiŋ n wu Israɛlebi na be beko.