Nɔmbɛs 21 - EBƆRƐ BE KAWƆL

Israɛlebi ka kɔ m pɔɔ so Keenanebi be asheŋ

¹ Keenan be ewura nɛ e daa wɔ Keenan be kelargato be kaseto be kaba so a ji kuwura ashi Arad na ka nu fanɛ Israɛlebi na bɔla Atarim be kaba so a ba, nɛ e ya kɔ bumo kena nseŋ pɛ bumo be beko.

² Ndoŋ nna nɛ Israɛlebi na kule Enyɛnpe Ebɔrɛ nseŋ nase kɔnɔ le: “Nɛ feeŋ chɛ anyi to nɛ an kɔ m pɔɔ basa ere so bre, kumo ere anyi alɛ beeŋ mur bumo nɛ bumo be nde nɛ kusɔ kama nɛ b kɔ kikɛ.”

³ Nɛ Enyɛnpe Ebɔrɛ nu Israɛlebi na be kekule nseŋ chɛ bumo to nɛ b kɔ m pɔɔ Aradebi na so nseŋ mur bumo nɛ bumo be nde kikɛ.

Danyaŋ be kuwɔ na be asheŋ

⁴ Israɛlebi na ka lar kebeegboŋ nɛ baa tre Hɔɔr na ase n sɔ Teku peper na be kaba so a kra Edɔm be efuli a yɔ nɛ b nyiti ŋ gben,

⁵ nseŋ malga ŋ gbiti Ebɔrɛ nɛ Mosis ŋ kaŋɛ le: “Manɛ nna nɛ men lara anyi Ijipt be kasawule so m bar anyi nfe nɛ an ba wu keshishɛrsawule nɛ ajibi nɛ nchu gba maŋ wɔ ere so? Nfe be ajibi ere fi anyi.”

⁶ Ndoŋ nna nɛ Enyɛnpe Ebɔrɛ shin nɛ awɔ lubi luri bumo to n duŋ Israɛlebi na be bedamta nɛ b wu.

⁷ Nɛ basa na ba Mosis kutɔ m ba kaŋɛ le: “Ŋkpal an ka malga ŋ gbiti fo nɛ Enyɛnpe Ebɔrɛ so, an wora kulubi, amoso kule Ebɔrɛ nɛ e ju awɔ ere nfe naniere.” Ndoŋ nna nɛ Mosis kule Ebɔrɛ n sa bumo.

⁸ Ndoŋ nna nɛ Enyɛnpe Ebɔrɛ kaŋɛ Mosis fanɛ e ta danyaŋ n lɔŋɛ kuwɔ n shiga kedibi tenteŋ so, saŋɛ na so, ekama nɛ kuwɔ naŋ duŋ nɛ e maŋ kumu so ŋ keni kumo, maaŋ wu.

⁹ Ndoŋ nna nɛ Mosis ta danyaŋ n lɔŋɛ kuwɔ n shiga kedibi tenteŋ so. Ekama malɛ nɛ kuwɔ baŋ duŋ nɛ e maŋ kumu so ŋ keni kumo, bee nya alenfia nna.

Israɛlebi be keyɔ Mowab be asheŋ

¹⁰ Kede be kaman nɛ Israɛlebi na koso ndoŋ n ya wora bumo be keeyi to ashi Oboof.

¹¹ B ka lar Oboof nɛ b ya wora bumo be keeyi to ashi Abarim be alambure to ashi Mowab be efuli so be epeŋilarkpa be kaba so.

¹² Kumo alɛ be kaman nɛ b ya wora bumo be keeyi to ashi Zɛrɛd be kebeemase.

¹³ B ka naŋ koso ndoŋ, nɛ b ya dii Aanɔn be lɔr na n wora bumo be keeyi to ashi kumo be ekarso. Aanɔn be lɔr na e daa la Mowabebi nɛ Amɔriebi be egbaŋ to.

¹⁴ Amoso nɛ nwɔl nɛ a bee malga Enyɛnpe Ebɔrɛ be kena be asheŋ na bee kaŋɛ le na: “Wahɛb be kade nɛ k wɔ Sufa be kebonfu ko to na nɛ kumo be ataŋɛ, nɛ Aanɔn be Lɔr na,

¹⁵ nɛ kumo be ketaŋɛ nɛ k gbelge to a yɔ Ar be kade to be kaba so a laŋɛ Mowab be kasawule be egbaŋ to na be asheŋ na.”

¹⁶ B ka koso ndoŋ nɛ b yɔ ketirbu nɛ k mata kade nɛ baa tre Bia na ase nɛ Enyɛnpe Ebɔrɛ kaŋɛ Mosis le: “Gbargbar basa na kikɛ abar so nfe nɛ n sa bumo nchu nɛ b nuu.”

¹⁷ Ndoŋ nna nɛ Israɛl be basa boŋ le be kasha ere: “Ketirbu, bul nchu. Nɛ an boŋ kasha n chɔrɔ.

¹⁸ An be bewurbi nɛ bejuŋkparpo e kur ketirbu na. Bumo be awurakpabi nɛ akpabi nɛ b ta n ŋini kakpa nɛ b kur kumo.” Kumo be kaman nɛ Israɛlebi na lar keshishɛrsawule na so n yɔ Mataana,

¹⁹ nseŋ yili ndoŋ n yɔ Nahaliɛl, n ya yili Nahaliɛl malɛ n yɔ Bamɔf,

²⁰ nseŋ yili Bamɔf n yɔ Mowabebi be efuli so be kepla nɛ k gbelge to a yɔ kebeegboŋ nɛ baa tre Pisga nɛ k shoŋi keshishɛrsawule na.

Israɛlebi ka kɔ m pɔɔ Ewura Sihɔn nɛ Ewura Ɔg so be asheŋ

²¹ Kede be kaman nɛ Israɛlebi shuŋi mbɔ Sihɔn nɛ e la Amɔriebi be ewura na kutɔ fanɛ b ya kaŋɛ mo le:

²² “Men shin nɛ an bɔla men be kasawule ere so n choŋ. Anyi nɛ an be ana maaŋ yige ekpa n ya luri men be ndɔana nɛ men be asɔrso nɛ baa tre greep na be ndibi be adɔana to. Anyi alɛ maaŋ nuu menyi be atirbuana be nchu. Anyeeŋ baŋ bɔla kegbembi nna a yɔ hale nɛ an ya baŋ menyi be kasawule so.”

²³ Ama Sihɔn daa maŋ shuli fanɛ Israɛlebi na e bɔla mbe kasawule so n choŋ. E daŋ chala mbe benapo kikɛ nna n yɔ kade nɛ baa tre Jahaaz nɛ k wɔ keshishɛrsawule so na n ya kɔ Israɛlebi na kena.

²⁴ Israɛlebi na daŋ mɔ bumo doŋana na kena na to ga nseŋ sɔ bumo be kasawule nɛ k wɔ yili Aanɔn be Lɔr nɛ k wɔ kelargato be kaseto be kaba so na n ya fo Jabɔk be lɔr nɛ k wɔ kelargato be esoso. Jabɔk be lɔr na e daa la Amɔriebi nɛ Ammɔnebi na be nsawule be egbaŋ to. Ammɔnebi na bre daŋ pɔr egbal ŋ kulti bumo be nde nna.

²⁵ Israɛlebi na daŋ sɔ Amɔriebi na be nde kikɛ nna n ta bumo be kadegboŋ nɛ baa tre Hishbɔn nɛ ndewurbi nɛ a kulti kumo na n ti so.

²⁶ Hishbɔn daa la Amɔriebi be ewura Sihɔn be kadegboŋ nna. E daŋ kɔ Mowab be ewura ko kena nna n sɔ mbe kasawule n ya fo Aanɔn be lɔr na be kelargato be esoso be ekarso,

²⁷ Amoso nɛ beshɛbompo bee boŋ kashɛ fanɛ: “Men ba Hishbɔn nɛ k la Sihɔn be kadegboŋ na to! Anyee sha kelɔnɛ m pɔr kumo nna n yili nɛnɛ.

²⁸ Sihɔn be benapo daa kɔ kena nna fanɛ edɛ ka bee chɔɔ a ba na. B daŋ mur Mowab be kade nɛ baa tre Ar na nna nseŋ jija bumo be abee ase be nsawule nɛ a wɔ Aanɔn be lɔrkar na kikɛ cheche.

²⁹ Asheŋ maaŋ nyalɛ n sa menyi Mowabebi! Chemɔsh be kegbir nɛ menyee shuŋ na mur cheche! Men be kegbir na shin nɛ men be benyɛn shile kena n yɔ efuli pɔtɛ so. Nɛ beche na malɛ ki basa nɛ Amɔriebi be bewura pɛ kena to.

³⁰ An pɔɔ Mowabebi kikɛ so. An yili Hishbɔn m mur bumo be nde kikɛ n ya fo Dibɔn nseŋ yili Nashim m mur amo n ya fo Noofa nɛ k mata Mɛdiba na.”

³¹ Israɛlebi na ka sɔ Amɔriebi be kasawule n chena so na,

³² nɛ Mosis shuŋi benyɛn ko fanɛ b ya keni kananɛ baaŋ wora ŋ kɔ kade nɛ baa tre Jeeza na kena. Kumo be kaman nɛ Israɛlebi na ya kɔ kade na kena n sɔ kumo nɛ ndewurbi nɛ a kulti kumo na, nseŋ ju Amɔriebi nɛ b wɔ ndoŋ na.

³³ Kumo be kaman nɛ Israɛlebi na naŋ kilgi n sɔ Bashan be kaba so, nɛ Bashan be ewura Ɔg keta mbe benapo nɛ e ya kɔ bumo kena ashi Edrei.

³⁴ Nɛ Enyɛnpe Ebɔrɛ kaŋɛ Mosis le: “Sa maa ŋana Ɔg nɛ mbe benapo. Meeŋ sa fo eleŋ nɛ fo kɔ m pɔɔ so bumo so fanɛ kananɛ fo wora Hishbɔn be ewura Sihɔn na. Ewura Ɔg be kasawule beeŋ ki menyeya.”

³⁵ Ndoŋ nna nɛ Israɛlebi na mɔ ewura Ɔg nɛ mbe mbinyɛnsobi nɛ mbe basa kikɛ nseŋ sɔ mbe kasawule na n chena so. Mbe esa kikɛ daa maŋ ji efute.